محنتی چیونٹی۔۔
کسی جنگل میں درخت کے نیچے ایک چوہا اپنے ماں باپ کے ساتھ رہتا تھا۔ وہ اپنا زیادہ وقت آرام اور سستی میں گزارنے کا عادی تھا۔بس ہر وقت یوں ہی پڑا رہتا اور کوئی کام نہ کرتا تھا ۔چوہے کی ماں اکثر سمجھاتی کہ بیٹا اچھے بچے کام کرتے ہیں ،محنت کرتے ہیں ، یوں سستی اور کاہلی کے ساتھ نہیں رہتے،تم چھوٹی سی چیونٹی کو نہیں دیکھتے جو محنت کرتی ہے اور اپنے سے کئی گنا زیادہ بوجھ اٹھاتی ہے۔یہ سن کر چوہا بولا ’’ امی یہ چیونٹی کہاں رہتی ہے ،مجھے اس کو دیکھنے کا بہت شوق ہے‘‘۔چوہے کی ماں نے کہا تم گھر سے باہر نکلو تو تمہیں کچھ پتا چلے ، اگرچیونٹی دیکھنے کا اتنا ہی شوق ہے تو جاؤ جا کر اس کو تلاش کرو اور دیکھو وہ کس قدر محنت کرتی ہے ، اپنا اور اپنے گھروالوں کاپیٹ بھرتی ہے۔
چوہے کے دل میں چیونٹی کو دیکھنے کا شوق بڑھ گیا اور وہ ایک روز اپنی امی سے اجازت لے کر چل پڑا ۔چلتے چلتے اسے ایک جانور دکھائی دیا جو اپنی پشت پر بہت وزن اٹھائے جا رہا تھا۔ چوہے نے اسے چیونٹی سمجھ کر سلا م کیا۔ اس جانور نے بتایا کہ میں چیونٹی نہیں بلکہ کچھوا ہوں۔
چوہا آگے بڑھا کچھ دور جا کر وہ ایک جانور کو دیکھ کر کہنے لگا بھائی چیونٹی سلام،اس جانور نے جواب دیا کہ میں تمہیں چیونٹی نظر آتا ہوں ؟ میں خرگوش ہوں ۔چوہا وہاں سے بھاگا۔ آگے پہنچا تو ہاتھی کو چیونٹی سمجھ کر سلام کیا، ہاتھی سونڈاٹھا کر چنگھاڑا،چوہا ڈر کر بھاگ کھڑا ہوا۔جب بھاگتے بھاگتے تھک گیا تو ایک پتھر پر بیٹھ گیا۔ اتنے میں اس نے قریب سے ایک آواز سنی ’’ بھائی ذرا احتیاط سے ! یہ ہمارا راستہ ہے ‘‘ چوہے نے نیچے دیکھا تو وہاں زمین پر ایک ننھا سا کیڑاتھا جس کے ساتھ ہی ایسے بہت سے کیڑوں کی ایک قطار تھی وہ اپنے منہ میں بڑے بڑے دانے پکڑے جارہے تھے۔ ان میں ایک کیڑا بولا، میاں چوہے ذرا ایک طرف ہو کر بیٹھ جاؤ، ہم کھانا اپنے گھر لے کر جارہے ہیں ،چوہے نے حیران ہو کر کہا اتنا بڑا دانا تم کیسے اٹھا کر لے جا رہے ہو۔ کیڑے نے جواب دیا ہم چھوٹے ضرور ہیں مگر اپنا ہر کام ہمت اور حوصلے سے مل جل کر کرتے ہیں۔ہم سردیاں آنے سے پہلے ہی اپنے لئے خوراک کا بندوبست کر لیتے ہیں ،ہم میں بہت اتفاق اور اتحاد ہے۔ اس چیز میں بڑی دولت ہے۔
چوہے نے ایک ننھے سے کیڑے سے یہ باتیں سنیں تو بہت حیران ہوا اور کہنے لگا مگر تم لوگ ہو کون؟۔ایک ننھے سے کیڑے نے آگے بڑھ کر جواب دیا ’ ہمیں چیونٹی کہتے ہیں‘‘ چوہا بہت خوش ہوا اور بولا بھئی چیونٹی تمہارے بارے میں جو کچھ سنا تھا تم ویسی ہی نکلیں ۔تم لوگ اپنا کام بڑی محنت،لگن اور منظم ہو کر کرتی ہو۔چوہا اپنے گھر واپس پہنچا اور اپنی ماں سے وعدہ کیا کہ آئندہ چیونٹی کی نصیحت پر عمل کرے گا۔
بچوں آج کل بھی موسم تبدیل ہو رہا ہے ، گرمی رخصت ہونے والی ہے اور سردی کی آمد آمد ہے ،آپ نے دیکھا ہو گا کہ کچن یا گھر کے کسی کونے میں چیونٹیاں قطار بنا کر کچھ نہ کچھ منہ میں ڈالے کسی سوراخ میں داخل ہو رہی ہوں گی ،اصل میں وہ سردیاں آنے سے پہلے اپنا کھا نا سٹور کر لیتی ہیں تاکہ سردی کی شدت میں انہیں مشکلات پیش نہ آئیں اور ایسا وہ مل جل کر کرتی ہیں۔بچّو، اتفاق اور اتحاد میں بہت بر کت ہے، کوئی بھی کام اتحاد سے کیا جائے تو اس کا فائدہ بھی زیادہ ہوتا ہے اور نقصان سے بھی بچا جا سکتا ہے اور یہ تو آپ لوگ جانتے ہی ہیں کہ محنت میں عظمت ہے۔