بچوں کا انسائیکلو پیڈیا
برف پر پھسلنابرف کی سطح بہت چکنی ہوتی ہے جب آپ کے جوتے کا چکنا تلا اس پر لگتا ہے تو آپ کو آسانی سے پھسلنے سے کوئی چیز نہیں روک سکتی۔ برفانی کھڑائوں (skates)سے پھسلنا اور زیادہ آسان ہو جاتا ہے۔ آپ کا وزن کھڑائوں کے نیچے برف کو پگھلا کر پانی کی تہہ بنا دیتا ہے۔ اس لئے کھڑائوں کے تلے پر لگے بلیڈ بہت پھسلواں ہو جاتے ہیں۔
کہُر(Fog) کیوں پیدا ہوتی ہے؟
کہُر دراصل ایک قسم کا بادل ہے جو زمین کے نزدیک بنتا ہے۔ کہُر تب پیدا ہوتی ہے جب نظر نہ آنے والے آبی بخارات پانی کی نظر آنے والی بڑی بوندوں میں تبدیل ہوتے ہیں ۔بادل بنانے کا یہ عمل تکثیف اس وقت شروع ہوتا ہے جب گرم ہوا ٹھنڈی ہونے لگتی ہے، کیونکہ ٹھنڈی ہوا نمی کو اتنی دیر تک گرفت میں نہیں رکھ سکتی جتنی دیر تک گرم ہوا۔
سمندری طوفان کیسے آتے ہیں؟
طوفان سمندر کے گرم پانی پر بنتے ہیں۔ سمندر کی سطح سے بہت زیادہ آبی بخارات اٹھتے ہیں۔ پھر بڑے بڑے طوفانی بادلوں کے ستون تیزی سے اٹھتی ہوئی ہوا میں پیدا ہونے شروع ہو جاتے ہیں پھر جب ان میں توانائی اور جھگڑ پیدا ہوتے ہیں تو یہ گھومنا شروع کر دیتے ہیں۔ آخر کار بادلوں کا ایک شدید بھنوران میں بنتا ہے اور وہ طوفان کی شکل اختیار کرکے سمندر پر آگے کی طرف بڑھنے لگتا ہے۔
طوفان، تیز بارش کیوں برساتے ہیں؟
طوفان پانی سے بھرے ہوئے ہوتے ہیں۔ یہ پانی وہ گرم سمندر کے اوپر چلنے والی ہوائوں سے لیتے ہیں۔ پھر اسے بارش کی شکل میں زمین پر برساتے ہیں۔ جب طوفان سمندر سے خشکی کی طرف حرکت کرتا ہے تو وہ تیز بارش اور ہوا ساتھ لاتا ہے اور چند گھنٹوں کے اندر لوگوں کی زندگی اور املاک کو زبردست نقصان پہنچا دیتا ہے۔ نہایت تیز بارش اور تیز ہوا، طوفان کے درمیانی حصے سے یعنی اس کی آنکھ کے کنارے سے آتی ہے۔ کبھی کبھی بارش اس قدر طوفانی اور زبردست ہوتی ہے کہ سیلابی ریلا بندوں کا پانی بھی اپنے ساتھ شامل کرکے گاڑیاں اور انسان سب کو بہا لے جاتا ہے یہ جھگڑ اس قدر تیز ہوتے ہیں کہ عمارتوں اور درختوں کو بھی گرادیتے ہیں۔
مون سون ہوا کسے کہتے ہیں؟
گرمیوں میں ایک گرم ہوا جسے مون سون کہتے ہیں چلتی ہے جو تیز بارش لاتی ہے۔ مون سون موسم میں زمین پر ہوا گرم ہو کر اوپر اٹھتی ہے اور سمندر کی گرم اور نم ہوا کو کھینچ لاتی ہے۔ جب یہ ہوا اوپر جاتی ہے تو اس کے بخارات بارش برسانے والے بادل بن جاتے ہیں جب تک ہوا اس سمت میں چلتی رہتی ہے بارش ہوتی رہتی ہے۔
موسم کیوں بدلتے ہیں؟
موسم اس لئے بدلتا ہے کہ ہوا آسمان پر ہمیشہ گردش میں رہتی ہے۔ وہ اس لئے حرکت کرتی ہے کہ دنیا کے کچھ حصوں پر سورج کی گرمی زیادہ پہنچتی ہے اور اس سے گرم ہوا اوپر اٹھتی ہے اور ٹھنڈی ہوا نیچے کی طرف چلتی ہے۔ گردش کرتی ہوئی ہوا موسموں کے بدلنے کا سبب بنتی ہے۔
قوس قزح کسے کہتے ہیں؟
سورج کی بارش کے دوران ہمیں قوس قزح نظر آتی ہے۔ جب بارش ہونے کے بعد آسمان صاف ہوتا ہے اور سورج کی روشنی نظر آنے لگتی ہے تو قوس قزح نظر آتی ہے۔ سورج کی روشنی میں منعکس ہونے والے وہ تمام رنگ ہوتے ہیں جو پانی کے ہوا میں معلق قطروں سے بنتے ہیں۔ قوس قزح کے رنگ لال، نارنجی، ہرے، پیلے، نیلے اور بنفشی ہوتے ہیں۔ یہ ہمیشہ ایک ہی ترتیب میں ہوتے ہیں۔ یہ سب رنگ جب ملتے ہیں تو سفید روشنی پیدا ہوتی ہے لیکن یہ رنگ جب پانی کی بوندوں کی وجہ سے بکھر جاتے ہیں تو قوس قزح بن جاتی ہے۔