مسائل اور ان کا حل
گاہک کا دکاندار کے پاس سامان بھول جاناسوال:۔مفتی صاحب!ایک بندے کی کاج اوور لاک کی دکان ہے،کچھ لوگ کپڑے دیتے ہیں اور پھر واپس لینا بھول جاتے ہیں۔ کئی سالوں کے کافی کپڑے جمع ہوگئے ہیں۔
ایسے کپڑوں کا کیا کیا جائے؟ (عبدالأحد: کراچی)
جواب:۔دکاندار پر لازم ہے کہ حتی الامکان اصل مالکوں کو تلاش کر کے ا ن کے کپڑے ان کے حوالہ کرے۔اگرکوشش کے باوجود مالک نہ مل سکیں اوراتنی مدت گزر جا ئے کہ دکاندارکوغالب گمان ہوکہ اب مالک یہ کپڑے وصول کرنے نہیں آئیں گے تو ایسی صورت میں دکاندار، مالکوں کی طرف سے مذکورہ کپڑے کسی غریب کو صدقہ کردے۔ (وفی الدر المختار ،ص: 355)،(الدر المختار وحاشیۃ ابن عابدین 4/ 278)
جبرائیل نام رکھا جاسکتا ہے
سوال:۔جناب مفتی صاحب! جبرائیل نام رکھا جاسکتا ہے یا نہیں؟
جواب:۔فرشتوں کے نام رکھنا مکروہ ہے۔ جبرائیل فرشتہ کا نام ہے، اس کی جگہ انبیائؑ اور صحابہ کرامؓ کے ناموں سے نام رکھنے چاہئیں (دارالعلوم زکریا 915/7)، (جامع الأحادیث 35/ 396)
بھانجے اور بھتیجے سے پردہ کرنا
سوال:۔عورت کا عدت کے دوران اپنے بھانجے اور بھتیجے سے پردہ ہوگا یا نہیں؟ جواب:۔عورت کے اپنے سگے بھتیجے اور بھانجے محرم ہیں، ان سے جس طرح عدت کے علاوہ پردہ نہیں ہے اسی طرح عدت میں بھی پردہ نہیںہے۔ ( سورۃ النور:31)، ( سورۃ الأحزاب: 55)،( سورۃ النساء: 23)،(صحیح البخاری 8/ 20)
چوری کا سامان خریدنا
سوال:۔جناب مفتی صاحب! چوری کا موبائل خریدنا جائز ہے یا نہیں؟
جواب:۔موبائل خریدنے والے کو یقین یا غالب گمان ہو کہ یہ چوری کا ہے تواس کا خریدنا جائز نہیں ہے۔(وفی الدر المختار 5/ 59)، (وفی الفتاوی الہندیۃ 2/ 184)
(مفتی محمد اویس اسماعیل ایگزیکٹیو ڈائریکٹر، الاخوان مجلس ِ افتاء۔کراچی
