آج کا پکوان: سردیوں کی سوغات حلوہ جات
سردی کی آمدکے ساتھ ہی عموماً مختلف اقسام کے مزیدار حلوہ جات کی مانگ بڑھ جاتی ہے۔ اکثر لوگ ان سے لطف اندوز ہونے کیلئے مٹھائی کی دکانوں کا رخ کر تے ہیں۔موسمِ سرما میں اصلی گھی سے تیار شدہ حلوہ جات کھانے کاالگ ہی مزہ ہوتا ہے اور یہ لطف توتب دوبالا ہوجاتا ہے، جب یہ حلوے گھر پر تیار کیے جائیں، تو لیجیے، تراکیب حاضر ہیں۔
بیسن کا حلوہ
اجزاء : بیسن ایک پاؤ، دودھ ایک پاؤ، جینی حسب ذائقہ، الائچی تین عدد، آئل ایک پاؤ، پانی (شیرا بنانے کے لیے)،پستہ کٹا ہوا 4 چمچ،بادام کٹے ہوئے 4 چمچ
ترکیب: چینی میں تھوڑا سا پانی ڈال کر اس کا شیرا تیار کر لیں۔آئل گرم کرکے اس میں الائچی ڈال لیں اور پھر اس میں بیسن ڈال کر ہلکی آنچ پر بھونیں۔اب اس میں دودھ ملا کر اچھی طرح دودھ کو مکس کر لیں۔اس میں شیرا بھی ڈال دیں اور ان سب اجزاء کو اچھی طرح مکس کر لیں۔اس حلوے کو کسی بڑی پلیٹ میں نکال کر اس کے اوپر پستہ اور بادام چھڑک دیں۔آپ کا مزیدار بیسن کا حلوا تیار ہے۔
فوائد: بیسن کو وزن کم کرنے اور موٹاپے سے نجات حاصل کرنے کیلئے بہترین آپشن سمجھا جاتا ہے کیوں کہ بیسن میں کولیسٹرول اور کیلوریز کافی کم مقدار میں پائی جاتی ہیں۔ بیسن میں پائے جانے والے حل پذیر فائبر کی وجہ سے آپ کے دل کی صحت میں بہتری آتی ہے کیوں کہ اس فائبر کی وجہ سے کولیسٹرول کی سطح نارمل رہتی ہے۔
سیب کا حلوہ
اجزاء:سیب ایک کلو، دودھ ایک لیٹر، چینی ایک پیالی، سوجی آدھی پیالی، کھویا ایک پیالی، بادام پستے حسب پسند، چھوٹی الائچی دو سے تین عدد، زردے کا رنگ آدھا چائے کا چمچ، کوکنگ آئل ایک پیالی۔
ترکیب: سیب کو چھیل کر کش کر لیں اور انہیں دودھ میں ڈال دیں۔کڑاہی میں آدھی پیالی کوکنگ آئل میں باریک کٹے ہوئے بادام پستے اور الائچی کے دانے ڈال دیں۔ جب خوشبو آنے لگے تو اس میں سوجی ڈال کر اچھی طرح بھونیں۔ اس دوران دودھ کے پین کو تیز آنچ پر رکھیں، دودھ پھٹ کر پانی علیحدہ ہو جائے تو اس کو بھوننا شروع کریں۔ جب پانی خشک ہونے لگے تو اس میں بھنی ہوئی سوجی چینی اور زردے کا رنگ شامل کر دیں۔ آخر میں کوکنگ آئل ڈالتے ہوئے بھونیں اور گھی علیحدہ ہونے پر کھویا ڈال کر چولہے سے اتار لیں۔
فوائد: سیب کیلوریز،کاربوہائیڈریٹ، فائبر، پوٹاشیم،وٹامن سی سے بھرپور ہوتا ہے ۔یہ وزن کم کرنے میں مدد کرتا ہے، کولیسٹرول کو کم کرتا ہے۔ ہاضمے کو بہتر بناتا ہے۔ کینسر کے خطرے کو کم کرتا ہے۔ ہائی بلڈ پریشر کی کمی میں مدد کر تا ہے۔ دل کے امراض کے خطرے کو کم کرتا ہے۔ سیب ہماری جلد کو ہائیڈریٹ کرتا ہے۔
