آج کا پکوان
ٹھنڈا موسم ۔۔۔اور گرما گرم سوپ سردیوں کے موسم میں گرما گرم سُوپ ناصرف توانائی فراہم کرتے ہیں بلکہ ان کا لذیذ ذائقہ منہ کا مزہ بھی خوشگوار بنانے میں معاون ہے۔ ذیل میں سوپ کی کچھ لذیذ اقسام کے بارے میں معلومات دی جا رہی ہیں جو دنیا بھر میں مقبول ہیں۔ خود کو گرم، پُرجوش اور چُست رکھنے کیلئے آپ بھی ان مزیدار سوپس کو گھر پر آسانی سے بنا سکتی ہیں۔
اٹالین نوڈلزسوپ
اجزا :چکن کی یخنی چھ کپ،ہرے دھنیے کی ڈنڈیاں چھ عدد،کٹی ادرک ایک چائے کا چمچ، چکن بون لیس 6 سے 8 بوٹیاں، نوڈلز ایک پیکٹ، ہری یا لال مرچیں کٹی ہوئی، ہری پیاز دو عدد، فش ساس ایک کھانے کا چمچ، نمک حسب ذائقہ
ترکیب: یخنی گرم کرکے دھنیے کی ڈنڈیاں ، ادرک اور نمک ڈال دیں، چند ابال آنے کے بعد یخنی چھان لیں۔ یخنی کو اب چکن کی باریک کٹی ہوئی سینے کی بوٹیوں کے ساتھ پکائیں۔ اس کے ساتھ نوڈلز بھی توڑ کر شامل کر دیں۔گوشت کے گلنے اور نوڈلز کے نرم ہونے کے بعد ہری پیاز اور لال مرچیں شامل کریں، فش ساس ڈال کر دھنیے کے پتوں کو پیالے کے اوپر ڈال کر سرو کریں۔
چقندر کا سوپ
اجزاء:چقندر تین عدد، گاجر دو عدد، نمک حسب ذائقہ، ادرک ایک انچ کا ٹکڑا، کُٹی ہوئی کالی مرچ ایک چمچ، پیاز ایک عدد درمیانی، چکن کی یخنی چار پیالی، کوکونٹ ملک ایک پیالی، لیموں کا رس دو کھانے کے چمچ، ڈبل روٹی کا سلائس ایک عدد، فریش کریم حسب پسند، کوکنگ آئل دو کھانے کے چمچ۔
ترکیب:گاجر اور چقندرکو چھیل کر ٹکڑے کر لیں (آدھا چقندر محفوظ کر لیں) ادرک کو باریک کاٹ لیں۔ کوکنگ آئل میں باریک کٹی ہوئی پیاز کو فرائی کریں پھر اس میں چقندر اور گاجر ڈال کر فرائی کریں اور یخنی ڈال دیں، جب سبزیاں گلنے پر آ جائیں تو انہیں لیموں کا رس، نمک اور کالی مرچ ڈال کر بلینڈ کر لیں۔ دوبارہ سے پین میں ڈال کر پکنے رکھیں اور اس میں کوکونٹ ملک، ادرک اور باریک کٹا ہوا چقندر شامل کر کے آٹھ سے دس منٹ دم پر رکھ دیں۔
ایگ سوپ
اجزاء: چکن کی یخنی چار پیالی، انڈے تین عدد ،نمک حسب ذائقہ، کچلا ہوا لہسن ایک چائے کا چمچ، ہری پیازدو عدد، سویاسوس دوکھانے کے چمچ، کالی مرچ پسی ہوئی آدھ چائے کا چمچ،کارن فلار دو کھانے کے چمچ، آئل دو کھانے کے چمچ۔
ترکیب:پین میں آئل ڈالیں، اس میں لہسن کو ہلکا سا فرائی کریں اوراس میں چکن کی یخنی ڈال دیں۔درمیانی آنچ پر پکاتے ہوئے ابال آنے دیں۔ابال آنے پر اس میں نمک اور کالی مرچ شامل کریں۔پھر ہلکے سے پھینٹے ہوئے انڈوں کو تیزی سے چمچ چلاتے ہوئے شامل کریں۔کارن فلور کے چارکھانے کے چمچ پانی میں گھول کر سوپ میں ڈال اور گاڑھا ہونے پر چولہے سے اتارلیں۔گرم گرم ڈش میں نکال کر اس میں سرکہ اور سویا سوس ڈالیں اور باریک کٹی ہوئی ہری پیاز چھڑک کر پیش کریں۔
