مقبوضہ کشمیر دنیا کی نظر میں!
بھارت کی تمام تر کوششوں اور ڈراموں کے باوجود دنیا بخوبی جان چکی ہے کہ مقبوضہ کشمیر میں انسانی حقوق کی سنگین خلاف ورزیاں جاری ہیں۔
مقبوضہ کشمیر میں انسانی تاریخ کا بدترین محاصرہ 1279دنوں سے جاری ہے۔ آج دنیا کے ایوانوں میں بھی کشمیری عوام کے حق میں آوازیں اٹھ رہی ہیں۔
٭…برطانوی پارلیمان کے ممبران نے کھل کر بھارتی ریاستی دہشت گردی کے خلاف اور مقبوضہ کشمیر کے مظلوم عوام کے حق میں آواز اٹھائی ہے۔ برطانوی پارلیمان کے ارکان نے مقبوضہ کشمیر میں جاری قتل عام اور عورتوں پر جنسی تشدد کے واقعات کی بھی بھر پور مذمت کی۔ معزز اراکین نے کہا کہ 70سال سے زیادہ عرصے سے کشمیری ایک جہنم میں رہ رہے ہیں اور آج حق خودارادیت تو درکنار ان کا اپنا وجود خطرے میں پڑ گیا ہے۔
٭…کشمیر 7دہائیوں سے مسلسل زیرِ عتاب ہے۔ بھارت اب تک 96 ہزارسے زائد کشمیریوں کا قتلِ عام کر چکا ہے۔ تقریباً 23ہزار عورتوں کو بیوہ، ایک لاکھ 7ہزار سے زائد بچوں کو یتیم جبکہ11ہزار سے زائد عورتوں کی آبرو ریزی کی گئی۔
٭…دنیا بارہا بھارت کے اس بے بنیاد دعوے کو مسترد کر چکی ہے کہ کشمیر بھارت کا اندورنی معاملہ ہے۔
٭…’’ای یو ڈس انفولیب‘‘ کی چشم کشا رپورٹ نے بھارت کے عالمگیر پراپگنڈے کو بری طرح بے نقاب کر دیا ہے۔
٭…آج جب مغربی دارالحکومتوں میں جمہوریت اور انسانی حقوق کی بات کی جا رہی ہے اور کشمیر کے محکوم عوام کے حقوق کی مسلسل پامالی کے خلاف مزید زوردار اور مؤثر آوازیں اٹھیں گی۔
٭…اتنے عشروں بعد سکیورٹی کونسل میں کشمیر دوبارہ زیر بحث ہے۔
٭…جنرل سیکرٹری اقوام متحدہ انتونیو گوتریس نے اس بات پر زور دیا کہ مسئلہ کشمیر کا فوجی حل ممکن نہیں، پاکستان اور بھارت کے درمیان کسی بھی قسم کی محاذ آرائی کے نتائج خطے اور دنیا کیلئے بے حد تباہ کن ہوں گے۔
٭…اگست 2019 سے اب تک عالمی میڈیا مقبوضہ کشمیر میں جاری بھارت کے انسانیت سوز اور غیر جمہوری اقدامات کی مذمت کرتا آ رہا ہے۔
٭…واشنگٹن پوسٹ نے اس غیر آئینی اقدام کو ’’india`s Dark Moment in Kashmir‘‘ قرار دیا۔
٭…دی گارڈین نے اسے کشمیر کو انڈین کالونی بنانے کی کوشش سے تعبیر کیا۔
٭…ان کے علاوہ بی بی سی، فرانس 24، DW نیوز، TRT ورلڈ، CNBC سمیت مختلف خبر رساں اداروں نے کشمیر کی فقید المثال کوریج کی۔
٭…Genocide Watch اور Human Rights Watch کی کشمیر میں جاری نسل کشی اور انسانی حقوق کی پامالیوں پر مبنی رپورٹس بھی ناقابلِ تردید دستاویزات ہیں۔
٭…الجزیرہ ٹی وی چینل نے بھارتی فوج کے ہاتھوں بے دردی سے شہید کیے گئے تین نوجوان طلباء کے لواحقین کی آہیں دنیا کو سنوائیں کہ جن کو ان معصوموں کی میتیں بھی نہیں دی گئیں۔
٭…بھارتی اقدامات اقوام متحدہ کی اٹھارہ قراردادوں کی کھلم کھلا خلاف ورزی کے زمرے میں آتے ہیں۔
٭…اس کے علاوہ 16 یورپین پارلیمنٹ ممبران نے مقبوضہ کشمیر کی صورتحال پر یورپین اعلیٰ نمائندے کو خط لکھا۔