کاجل آج بھی آنکھوں کی خوبصورتی کیلئے اہم
ہر دور میں فیشن کے نئے انداز اور تقاضے ہوتے ہیں، میک اپ میں بھی جدت گزرتے وقت کے ساتھ آئی ہے ۔کیا آپ جانتی ہیں کاجل کے ذریعے بھی آنکھوں کی خوبصورتی میں اضافہ کیا جا سکتا ہے۔ آج کل لائٹ میک اپ کا رواج عام ہے۔لائٹ میک اپ کے ساتھ کاجل کو اس انداز سے لگائیں کہ میک اپ نمایاں نظر آئے۔چہرہ نکھرا نکھرا ہو،مگر آنکھیں خالی ہوں تو کچھ کمی سی محسوس ہوتی ہے۔
اس کمی کو پورا کرنے میں کاجل کی ایک پتلی لکیر اہم کردار ادا کرتی ہے۔آپ نے میک اپ بالکل صحیح طریقے سے کیا ہو لیکن کاجل نہیں لگایا ہو تو کچھ ادھورا سا لگتا ہے۔کاجل کا وہ سٹائل جس میں اوپر نیچے ایک گولائی یا لکیر میں کاجل لگایا جائے تو اس اسٹائل کو بیسک کاجل اسٹائل کہا جاتا ہے۔اگر آپ جلدی کسی تقریب میں جانا چاہتی ہیں تو بیسک کاجل اسٹائل لگائیں یہ بآسانی دومنٹ میں آپ کی آنکھوں کی خوبصورتی میں اضافہ کردے گا۔
اگر آپ کسی عام تقریب میں جا رہی ہیں تو اپرلیش لائن کاجل اسٹائل آپ کیلئے بہترین ہے۔لائن کاجل استعمال کرنے کیلئے آنکھ کے اُپر حصے پر کاجل لگائیں اور نچلے حصے کو یو نہی چھوڑ دیں یہ سٹائل آپ کی آنکھوں کی خوبصورتی میں اضافہ کرے گا۔ اگر آپ سموکی آئی اسٹائل کاجل لگانا چاہتی ہیں تو لیش لائن کاجل لگائیں اور تھوڑی سی مقدار میں پیٹرولیم جیلی لے کر آنکھوں کو ہلکے ہاتھ سے رگڑیں جس سے کاجل لگانا سموکی سٹائل بن جائے گا۔منفرد نظر آنے کی خواہشمند خواتین مصری اسٹائل سے ہی کاجل لگاتی ہیں۔
