بھرپور زندگی جینے کا راز، کمزوریوں کو نظرانداز کریں، اچھائیوں پر توجہ دیں
ہم میں سے اکثر لوگ صرف اپنے مدار میں زندگی گزارتے رہتے ہیں اور بہت جلد خود کو بیکار، تھکا ہوا اور بیزار محسوس کرنے لگتے ہیں۔ ایسے لوگوں کیلئے زندگی ایک انعام نہیں بلکہ ایک عذاب ہوتی ہے ۔حقیقت اس کے بالکل برعکس ہے، یہ زندگی جو اللہ تعالیٰ نے ہمیں عطا کی ہے بہت خوبصورت اور قیمتی ہے، اسے ضائع مت کیجئے۔اگر آپ خود کو سمجھنا اور جاننا چاہتے ہیں تو یہ کام آپ آج بھی کر سکتے ہیں ۔ درج ذیل دی گئی چند تجاویز آپ کیلئے خود کو جاننے اور سمجھنے میں مدد گار ثابت ہوں گی۔
1:۔ہم سب یہاں اس جہاں میں کسی خاص مقصد کے تحت موجود ہیں۔ ہر شخص دوسرے سے مختلف ہے اور یہ مختلف ہونا ہی ایک اہم بات ہے۔ ہو سکتا ہے ابھی آپ پر اس دنیا میں آنے کا مقصد واضح نہ ہو لیکن اس کو سمجھنا اور واضح کرنا ہی ایک چیلنج ہے۔
2:۔ذات کی تکمیل کا سب سے بڑا راز''خود کو جاننا‘‘ ہے۔ جب تک آپ اپنی ذات سے آشنا نہیں ہوں گے، آپ ترقی نہیں کر سکیں گے اور نہ ہی آپ زندگی کا بھرپور لطف اٹھا سکیں گے۔ جب تک آپ کو اپنی کمزوریاں، اپنی قوت، اپنی اچھائیاں، اپنی پسند و ناپسند خود معلوم نہیں ہوگی آپ کیسے کسی کام کو بہتر طور پر کر سکیں گے ۔یہی وجہ ہے کہ اس معاشرے میں بے شمار لوگ بے سکونی اور بے چینی کی زندگی گزار رہے ہیں کیونکہ وہ نہیں جانتے کہ وہ خود کیا بہتر کر سکتے ہیں ۔ جب ہمیں علم ہوتا ہے کہ ہماری کمزوریاں یا ہماری ناکامی کی وجہ کیا ہے تو ہم انہیں درست کرنے کی کوشش کرتے ہیں اور یہیں سے ترقی کا زینہ شروع ہوتا ہے۔
3:۔اپنی ذات کی تکمیل کا دوسرا راز اس علم کا استعمال ہے جو آپ کو اپنی ذات کے بارے میں ہے کہ آپ کی فطرت کیسی ہے اور آپ حقیقتاً کس طرح کی زندگی گزارنا چاہتے ہیں۔ جتنا زیادہ آپ کو خود کے بارے میں علم ہو گا اتنا ہی آپ کی زندگی کا مقصد آپ پر واضح ہوتا چلا جائے گا۔ جتنا آپ کو اپنی قوتوں کا علم ہوگا اتنا اور اسی طرح سے آپ ان کا استعمال کریں گے اور یہی راستہ آپ کو ترقی کی بلندیوں کی طرف لے جائے گا۔
4:۔اپنی کمزوریوں پر توجہ دینے کی بجائے اپنی طاقت اور اچھائیوں پر توجہ دیں۔ زندگی میں جو کچھ آپ ٹھیک طرح سے نہیں کر پائے اس پر رونا چھوڑ دیں اور آگے کی سوچیں۔ وہ دیکھئے جو ممکن ہے، جو ابھی ہونا باقی ہے۔ آپ کی مثبت سوچ ہی دراصل یہ ظاہر کرتی ہے کہ آپ کیا ہیں یہ آپ کی شخصیت کا آئینہ ہے۔
5:۔آپ کی ذات میں جو اچھائیاں اور مثبت پہلو موجود ہیں ان کو جاننے اور سمجھنے کے بعد ان کو مزید نکھاریں۔ انہیں اس قدر پالش کریں کہ آپ کی ذات کے منفی پہلو اس میں چھپ جائیں۔
6:۔ زندگی کی ان چھوٹی چھوٹی باتوں، لمحات یا چیزوں پر خاص توجہ دیں جو آپ کو خوشی فراہم کرتی ہیں۔ ان لمحات کو نوٹ کر لیں تاکہ آپ ایک خوشگوار زندگی گزار سکیں۔ اپنی زندگی کی ان چھوٹی چھوٹی چیزوں پر بھی توجہ دیں جو آپ کی اداسی یا مایوسی کا سبب بنتی ہیں۔ جن سے آپ لطف اندوز نہیں ہوتے اور پھر ان چیزوں، ان لمحات یا ان لوگوں سے دور رہنے یا ان واقعات کو ختم کرنے کی کوشش کریں۔
7:۔زندگی میں کئے گئے اچھے کاموں( جن پر آپ کو خود فخر ہے) کو کسی جگہ نوٹ کر لیں ۔ یہ واقعات جب بھی آپ کی نظر سے گزریں گے آپ اچھا محسوس کریں گے۔
8:۔ اپنی قدر کریں، خود کو سراہیں، اپنے اچھے کاموں پر خود کو داد دیں۔ جب آپ مثبت ہوں گے تو آپ کے گرد موجود لوگ بھی آپ کو پسند کرینگے۔
ہمیشہ اپنی سوچ مثبت رکھیں، اپنے بارے میں بھی اور دوسروں کے بارے میں بھی۔ خود کو جانیں گے تو دوسروں کو بھی جان اور پرکھ سکیں گے۔ یہیں سے آپ کو زندگی گزارنے کا طریقہ اور راستہ مل سکے گا۔ اپنے دوستوں، اساتذہ اور اچھی کتابوں سے مشورہ لیں۔ سیکھنے کا عمل زندگی میں کبھی ختم نہیں ہوتا۔ جتنا زیادہ جانیں گے اتنی ہی زندگی آسان ہوتی جائے گی اور آپ کو آپ کی زندگی پہلے سے زیادہ پر لطف، پرسکون اور بامقصد محسوس ہو گی۔ آپ زندگی سے بھرپور لطف اٹھا سکیں گے۔
بینش جمیل پشاور کے ایک تعلیمی ادارے
میں معلمہ ہیں اور کئی کتابوں کی مصنفہ ہیں