آج کا دن
اسپیشل فیچر
لاسارنو معاہدہ (Treaty of Locarno)
1 دسمبر 1925ءکو"لاسارنو معاہدہ" پر لندن میں باضابطہ طور پر دستخط کئے گئے۔ یہ ایک اہم سیاسی اور سفارتی معاہدہ تھا جو اکتوبر 1925ءمیں سوئٹزرلینڈ کے شہر لاسارنو میں طے پایاتھا۔ اس معاہدہ کے فریقین میں جرمنی، فرانس، برطانیہ، اٹلی اور بیلجیم شامل تھے۔ معاہدے کا مقصد پہلی جنگ عظیم کے بعد یورپ میں امن قائم کرنا اور مستقبل کے تنازعات کو روکنا تھا۔ جرمنی نے فرانس اور بیلجیم کے ساتھ اپنی مغربی سرحدوں کو تسلیم کیا اور ان پر حملہ نہ کرنے کا عہد کیا۔
یوگوسلاویہ: فضائی حادثہ
یکم دسمبر1987ءکو یوگوسلاویہ ایئر لائنز کا ایک مسافر بردار طیارہ جزیرہ کورسیکا میں گر گیا جس میں178 افراد ہلاک ہوئے۔ یہ پرواز معمول کے مطابق یوگو سلاویہ سے مغربی یورپ کے کسی شہر کی طرف روانہ تھی اور راستے میں کورسیکا کے قریب حادثے کا شکار ہو گئی۔یہ حادثہ یوگوسلاویہ کی تاریخ میں ایک افسوسناک واقعہ کے طور پر یاد رکھا جاتا ہے۔ ابتدائی اطلاعات کے مطابق، حادثے کی ایک بڑی وجہ خراب موسم تھی جبکہ حادثے کے بعد کی رپورٹ میں پائلٹ کی ممکنہ غلطی یا نیویگیشن کی خامیوں کو بھی زیر غور لایا گیا۔
پیرس میں جدید سینما کی تعمیر
1906ءمیں پیرس میں دنیا کا پہلا جدیدسینما گھر کھولا گیا۔یہ سینما فلم بینی کےلئے مخصوص جدید عمارتوں میں سے ایک تھا۔ فرانس سینما کی ترقی میں اہم کردار ادا کرنے والے ممالک میں شامل ہے۔ لومیئر برادران، جو سینما کے بانیوں میں شامل ہیں نے بھی فرانس میں فلمی صنعت کو فروغ دینے میں اہم کردار ادا کیا۔
پہلی کاراسمبلی لائن کا آغاز
1913ءمیں آج کے روز فورڈ موٹر کمپنی نے دنیا کی پہلی موٹر اسمبلی لائن متعارف کرائی۔ہنری فورڈ نے 1903ءمیں فورڈ موٹر کمپنی قائم کی تھی۔ یہ کمپنی جلد ہی آٹو موبائل انڈسٹری میں سب سے نمایاں ادارہ بن گئی۔ہنری فورڈ نے اسمبلی لائن کا تصور متعارف کرایا، جس کے ذریعے گاڑیاں بنانے کا عمل نہایت موثر اور تیز ہوا۔ اس تکنیک نے مزدوروں کی پیداواریت میں اضافہ کیا اور کاروں کی قیمت کو کم کر دیا۔
