ارشدندیم پرانعامات کی بارش
اسلام آباد،لاہور(نامہ نگار،سپیشل رپورٹر)قومی ایتھلیٹ ارشدندیم کے اولمپکس میں گولڈ میڈل جیتنے پر حکومت اور دیگر کی طر ف سے ان پر انعامات کی بارش کردی گئی۔
گورنرپنجاب سردار سلیم حیدر خان نے ارشد ندیم کیلئے 20 لاکھ روپے انعام کا اعلان کیا ،انہوں نے وطن واپسی پر قومی ہیروکو گورنر ہاؤس مدعو کرنے کا بھی کہہ دیا۔ عالمی شہرت یافتہ گلوکار علی ظفر نے سوشل میڈیا پر اپنے پیغام میں کہاکہ تاریخی کامیابی پر ارشد ندیم کو اپنی فاؤنڈیشن کے ذریعے 10 لاکھ روپے رقم بطورِ انعام دوں گا۔انہوں نے حکومت پاکستان سے ارشد ندیم کے نام پر سپورٹس اکیڈمی قائم کرنے کی اپیل بھی کی ۔سندھ حکومت5کروڑ اور گورنر سندھ کامران ٹیسوری 20 لاکھ روپے دینگے ۔ارشد ندیم کی اس تاریخ ساز کامیابی پر ان کے لئے سپانسرز کی جانب سے بھی آفر آنا شروع ہوگئی ہیں ۔ میئر کراچی مرتضیٰ وہاب کی جانب سے ارشد ندیم کے نام سے کراچی میں سپورٹس اکیڈمی کھولنے کا اعلان کیا گیا ہے جبکہ سکھر کے میئر نے ارشد ندیم کو سونے کا تاج پہنانے کا اعلان کیا ۔ انٹرنیشنل ایسوسی ایشن آف ایتھلیٹکس فیڈریشنز نے بھی اعلان کررکھا ہے وہ 2024 پیرس اولمپکس میں گولڈ میڈل جیتنے والوں کو پچاس ہزار ڈالر انعام دے گی۔ کراچی پریس کلب نے اولمپکس میں گولڈ میڈل جیتنے پر ارشد ندیم کو کراچی پریس کلب کی اعزازی ممبر شپ دینے کا اعلان کردیا۔
