قومی گندم پالیسی، صوبوں کو عملدرآمد یونٹس قائم کرنیکی ہدایت
ملک میں گندم کی کوئی قلت نہیں،قومی ضروریات کیلئے وافر ذخائرموجود :راناتنویر
اسلام آباد (نامہ نگار)وفاقی وزیر قومی غذائی تحفظ و تحقیق رانا تنویر حسین نے کہا ہے کہ ملک میں گندم کی کوئی قلت نہیں اور قومی ضروریات پوری کرنے کے لیے وافر ذخائر موجود ہیں۔ انہوں نے تمام صوبوں کو عبوری قومی گندم پالیسی پر مؤثر عملدرآمد کے لیے صوبائی سطح پر عملدرآمد یونٹس قائم کرنے کی ہدایت کی۔بدھ کو قومی گندم نگران کمیٹی کے دوسرے اجلاس کی صدارت کرتے ہوئے وفاقی وزیر نے ربیع 2025-26 کے لیے گندم کی کاشت، موجودہ ذخائر اور پالیسی کے نفاذ کے طریقۂ کار کا جائزہ لیا۔ انہوں نے خوراک کے تحفظ، منڈیوں کے استحکام اور کسانوں کی معاونت کے لیے وفاقی و صوبائی حکومتوں کے درمیان قریبی ہم آہنگی پر زور دیا۔اجلاس میں بتایا گیا کہ پنجاب میں گندم کی کاشت بروقت مکمل ہوئی ہے اور بہتر بیج و کھاد کی دستیابی کے باعث اچھی پیداوار کی توقع ہے ۔ سندھ میں کاشت مقررہ اہداف سے تجاوز کر گئی ہے ۔ بلوچستان میں بارشوں کی کمی کے باعث کاشت کم ہے تاہم آئندہ بارشوں سے بہتری کی توقع ہے ، جبکہ خیبر پختونخوا میں زیادہ تر علاقوں میں کاشت مکمل ہو چکی ہے ۔کمیٹی کو موجودہ گندم ذخائر سے آگاہ کرتے ہوئے وفاقی وزیر نے یقین دہانی کرائی کہ رواں غذائی سال کے دوران ملک میں گندم کی فراہمی مکمل طور پر یقینی ہے ۔
