دنیا کے وہ شہر جو فاصلے میں دور مگرایک ہی لائن(عرض بلد) پر واقع ہیںدنیا کے مختلف شہر اگرچہ اپنی ثقافت، موسم اور طرزِ زندگی میں ایک دوسرے سے بہت مختلف نظر آتے ہیں، لیکن حیرت انگیز طور پر کچھ شہر جغرافیائی طور پر ایک ہی عرضِ بلد (Latitude) پر واقع ہوتے ہیں۔ جدید نقشہ جات اور سا ئنسی تحقیق یہ دلچسپ حقیقت سامنے لائی ہے کہ بظاہر دور دکھائی دینے والے شہر دراصل زمین کے ایک ہی فرضی خط پر موجود ہیں۔ مثال کے طور پر نیویارک اور میڈرڈ جیسے بڑے شہر ایک ہی عرضِ بلد پر واقع ہیں، جس سے ان کے موسم اور دن رات کے اوقات میں کئی مماثلتیں پائی جاتی ہیں۔ یہ انکشاف جغرافیہ اور انسانی رہائش کے درمیان تعلق کو سمجھنے کیلئے نہایت اہمیت رکھتا ہے۔ہم میں سے زیادہ تر لوگ اپنے آبائی شہر کو نقشے پر آسانی سے تلاش کر سکتے ہیں لیکن کیا کبھی آپ نے سوچا ہے کہ دنیا کے کونسے شہر اسی عرضِ بلد پر واقع ہیں؟ ایک نیا انٹر ایکٹونقشہ: (vicnaum.github.io/parallel-cities) یہ دلچسپ امکان فراہم کرتا ہے کہ آپ دیکھ سکیں کہ دنیا بھر میں آپ کے شہر کے برابر کون کونسے مقامات موجود ہیں۔اس نقشے کے مطابق لاہور، شنگھائی اور قاہرہ31° شمالی عرضِ بلد پر واقع ہیں، جبکہ کراچی اور تائیوان کا دارالحکومت تے پائی 25.1° شمالی عرضِ بلد پر ایک ہی خط میں آتے ہیں۔اسی طرح نیویارک اور میڈرڈ 40.9° شمالی عرضِ بلد پر موجود ہیں، جن کے ساتھ نیپلز، استنبول اور بیجنگ بھی اسی لائن میں شامل ہیں۔جنوبی نصف کرے میں بوئنوس آئرس اور پرتھ 32.2° جنوبی عرضِ بلد پر ایک دوسرے کے متوازی واقع ہیں۔یہ نقشہ ایک ایکس صارف(@vicnaum) کی تخلیق ہے جن کا کہنا ہے کہ ا س سادہ ویب سائٹ کے ذریعے لوگ دیکھ سکتے ہیں کہ کون سے شہر ایک ہی متوازی خط پر ہیں، اور ساتھ ہی دوسرے نصف کرے میں اس کا عکس بھی معلوم کیا جا سکتا ہے۔ ان کے مطابق آپ ان مقامات پر تقریباً یکساں سورج کی روشنی کے اوقات کی توقع کر سکتے ہیں (یعنی دن اور رات کی لمبائی میں مشابہت)۔ اس نقشے کو آزمانے والے صارفین نے اپنی دلچسپ آرا آن لائن شیئر کی ہیں۔ایک شخص نے تبصرہ کیا کہ انہیں انٹارکٹیکا جتنی ہی سورج کی روشنی ملتی ہے۔ایک صارف نے حیرت کا اظہار کرتے ہوئے کہا کہ انہیں اندازہ نہیں تھا کہ اورلینڈو اور دہلی ایک ہی عرضِ بلد پر ہیں۔ ایک اور شخص نے لکھا کہ جب آپ شکاگو میں سردی سے کانپ رہے ہوں تو یاد رکھیں کہ یہ میڈرڈ کے برابر عرضِ بلد پر ہے۔ دیگر متوازی مقامات میں لندن اور کینیڈا کا شہر سسکاٹون شامل ہیں، دونوں 52.1° شمالی عرضِ بلد پر واقع ہیں۔ اسی طرح اینڈورا ، شکاگو کے برابر عرضِ بلد پر ہے۔برازیل کا شہر ریو ڈی جنیرو آسٹریلوی شہر ایلس اسپرنگز کے متوازی ہے۔ایک ہی عرضِ بلد پر واقع مقامات پر عموماً دن یکساں طوالت کے ہوتے ہیں تاہم ان مقامات پر سورج طلوع اور غروب ایک ہی وقت پر نہیں ہوتا اور نہ ہی انہیں لازمی طور پر سورج کی ایک جیسی روشنی ملتی ہے کیونکہ اس کا انحصار موسمی حالات پر بھی ہوتا ہے۔ عام طور پر جیسے جیسے آپ خطِ استوا سے دور جاتے ہیں دن اور رات کے اوقات میں موسمی تبدیلیاں زیادہ واضح اور شدید ہوتی جاتی ہیں۔ اسی طرح سورج کے طلوع اور غروب کا اصل وقت اس بات پر بھی منحصر ہوتا ہے کہ کوئی جگہ مشرق یا مغرب میں کتنی دور ہے۔دوسری جانب ماہرین نے اس بات کو بھی واضح کیا ہے کہ Mercator Projection جو دنیا بھر میں عام طور پر تجارتی اور تعلیمی نقشوں کیلئے استعمال ہوتا ہے، دراصل زمین کی اصل جسامت کو درست انداز میں ظاہر نہیں کرتا بلکہ اس میں کافی بگاڑ پایا جاتا ہے۔اس نقشے میں شمالی امریکہ اور روس کو افریقہ کے برابر یا اس سے بڑا دکھایا جاتا ہے جبکہ حقیقت میں افریقہ شمالی امریکہ سے تقریباً تین گنا بڑا ہے اور روس سے بھی کہیں زیادہ وسیع و عریض ہے۔ برطانوی سائنسدانوں کا نیا نقشہ دکھاتا ہے کہ کئی ممالک جن میں روس، کینیڈا اور گرین لینڈ شامل ہیں حقیقت میں اس قدر بڑے نہیں جتنے عام طور پر محسوس ہوتے ہیں۔گزشتہ سال افریقی ممالک نے مطالبہ کیا کہ دنیا کے بگڑے ہوئے نقشے کو دوبارہ بنایا جائے تاکہ براعظم افریقہ کا اصل حجم درست طور پر ظاہر ہو سکے۔ افریقن یونین نے اس مہم کی حمایت کی ہے جس کا مقصد حکومتوں اور بین الاقوامی اداروں کی جانب سے 16ویں صدی کے Mercator Projection کے استعمال کو ختم کرنا ہے اور اس کی جگہ ایسا نقشہ اپنانا ہے جو افریقہ کے اصل سائز کو زیادہ درست انداز میں دکھا سکے۔ 55 ممالک پر مشتمل اس بلاک نے اس نقشے پر اعتراض کیا ہے کہ یہ براعظموں کے سائز کو غلط پیش کرتا ہے۔ اس کے مطابق یہ نقشہ قطبین کے قریب علاقوں، جیسے شمالی امریکہ اور گرین لینڈ کو غیر حقیقی طور پر بڑا دکھاتا ہے جبکہ افریقہ اور جنوبی امریکہ جیسے بڑے براعظموں کو نسبتاً چھوٹا ظاہر کرتا ہے۔ ان ممالک کا مؤقف ہے کہ یہ بگاڑ افریقہ کے اصل حجم اور اہمیت کو کم کرتا ہے جبکہ امریکہ اور یورپ کو غیر متناسب طور پر بڑا دکھا کر ان کی وسعت کو حقیقت سے زیادہ نمایاں کرتا ہے۔ ان کا کہنا ہے کہ اس طرح کے منفی تصورات میڈیا، تعلیم اور پالیسی سازی پر اثر انداز ہوتے ہیں۔ مہم چلانے والوں کے مطابق نقشے میں افریقہ کا کم دکھایا جانا اس کے جغرافیائی اور معاشی کردار کے بارے میں غلط فہمیاں پیدا کرتا ہے، جو عالمی سطح پر اس کی اہمیت کو کم کر کے پیش کرتا ہے۔

دنیا بھر میں ہر سال 25 مئی کو ‘‘ٹاول ڈے'' منایا جاتا ہے۔ بظاہر یہ دن ایک عام تولیے سے منسوب محسوس ہوتا ہے، مگر حقیقت میں اس کے پیچھے ادب، مزاح، سائنس فکشن اور تخلیقی سوچ کی ایک دلچسپ داستان موجود ہے۔ یہ دن معروف برطانوی مصنف Douglas Adams کے مداحوں کی جانب سے ان کی یاد میں منایا جاتا ہے۔ ڈگلس ایڈمز نے اپنی مشہور تصنیف '' The Hitchhikers Guide To The Galaxy‘‘ کے ذریعے دنیا بھر میں شہرت حاصل کی اور لاکھوں قارئین کو اپنے منفرد اندازِ تحریر سے متاثر کیا۔ٹاول ڈے کی ابتدا 2001ء میں ہوئی، جب ڈگلس ایڈمز اچانک دل کا دورہ پڑنے سے 49برس کی عمر میں انتقال کر گئے۔ ان کے مداحوں نے ان کی خدمات کو خراجِ عقیدت پیش کرنے کیلئے ایک انوکھا طریقہ اختیار کیا اور فیصلہ کیا کہ ہر سال 25 مئی کو لوگ اپنے ساتھ تولیہ رکھ کر ان کی یاد تازہ کریں گے۔ دیکھتے ہی دیکھتے یہ روایت دنیا کے مختلف ممالک میں مقبول ہوگئی اور آج سوشل میڈیا، ادبی حلقوں اور سائنس فکشن کے شائقین میں بھرپور جوش و خروش سے منائی جاتی ہے۔ڈگلس ایڈمز کے ناول میں تولیہ ایک غیر معمولی اہمیت رکھتا ہے۔ ان کے مطابق کائنات میں سفر کرنے والے شخص کیلئے تولیہ سب سے کارآمد چیز ہے۔ یہ نہ صرف روزمرہ استعمال میں آتا ہے بلکہ مشکل حالات میں مددگار بھی ثابت ہو سکتا ہے۔ اسی تصور نے تولیے کو محض ایک عام کپڑے سے بڑھا کر ذہانت، تیاری اور مزاح کی علامت بنا دیا۔ یہی وجہ ہے کہ ٹاول ڈے پر لوگ اپنے کندھوں یا گردن پر تولیہ ڈال کر گھومتے ہیں اور اس ادبی روایت سے اپنی وابستگی ظاہر کرتے ہیں۔''ٹاول ڈے‘‘ صرف ایک ادبی دن نہیں بلکہ تخلیقی سوچ، مطالعے کے شوق اور فنونِ لطیفہ کی اہمیت کو اجاگر کرنے کا ذریعہ بھی ہے۔ آج کے دور میں جب نوجوانوں کی بڑی تعداد سوشل میڈیا اور غیر ضروری مصروفیات میں کھو چکی ہے، ایسے مواقع انہیں کتابوں کی دنیا کی طرف متوجہ کرتے ہیں۔ ڈگلس ایڈمز کی تحریروں میں مزاح کے ساتھ ساتھ فلسفہ، سائنس اور انسانی رویوں پر گہری سوچ بھی پائی جاتی ہے، جو قاری کو تفریح کے ساتھ علم بھی فراہم کرتی ہے۔اس دن مختلف ممالک میں تقریبات، ادبی نشستیں، کتابوں کی نمائشیں اور آن لائن مباحثے منعقد کیے جاتے ہیں۔ لوگ ڈگلس ایڈمز کی کتابوں سے اقتباسات شیئر کرتے ہیں، ان کے مشہور جملوں کو یاد کرتے ہیں اور سائنس فکشن ادب پر گفتگو کرتے ہیں۔ بعض تعلیمی ادارے طلبہ کو مطالعے کی اہمیت سمجھانے کیلئے بھی اس دن کو استعمال کرتے ہیں۔ یوں ''ٹاول ڈے‘‘ ادب اور تعلیم دونوں کے فروغ میں کردار ادا کرتا ہے۔ٹاول ڈے کا ایک اہم پہلو یہ بھی ہے کہ یہ ہمیں یاد دلاتا ہے کہ بظاہر چھوٹی اور سادہ چیزیں بھی بڑی معنویت رکھ سکتی ہیں۔ ایک عام تولیہ جو روزمرہ زندگی میں استعمال ہوتا ہے، ادب کے ذریعے عالمی ثقافتی علامت بن گیا۔ اس سے یہ سبق ملتا ہے کہ تخلیقی سوچ انسان کو عام چیزوں میں بھی غیر معمولی معنی تلاش کرنے کا ہنر عطا کرتی ہے۔پاکستان سمیت دنیا کے کئی ممالک میں نوجوان نسل اب سائنس فکشن ادب کی طرف دلچسپی لینے لگی ہے۔ اگرچہ ہمارے معاشرے میں اس صنف کو ماضی میں زیادہ اہمیت نہیں دی جاتی تھی، مگر اب حالات بدل رہے ہیں۔ انٹرنیٹ اور عالمی ادب تک آسان رسائی نے نوجوانوں میں نئی سوچ کو جنم دیا ہے۔ ٹاول ڈے جیسے عالمی دن نوجوانوں کو مطالعے، تحقیق اور تخلیقی سرگرمیوں کی طرف راغب کرتے ہیں، جو ایک مثبت رجحان ہے۔ڈگلس ایڈمز کی تحریریں اس بات کا ثبوت ہیں کہ ادب صرف تفریح کا ذریعہ نہیں بلکہ انسان کی سوچ کو وسیع کرنے کا طاقتور وسیلہ بھی ہے۔ انہوں نے اپنے مزاحیہ انداز میں انسانی کمزوریوں، سماجی رویوں اور کائناتی تصورات کو اس مہارت سے بیان کیا کہ قاری ہنستے ہوئے بھی گہری بات سمجھ لیتا ہے۔ یہی کامیاب ادب کی پہچان ہے۔ یہ کہنا بجا ہوگا کہ ''ٹاول ڈے‘‘ محض ایک تفریحی یا غیر رسمی دن نہیں بلکہ ادب، تخلیقی صلاحیت اور علمی شعور کی اہمیت کو اجاگر کرنے والی ایک منفرد روایت ہے۔ یہ دن ہمیں کتابوں سے محبت اور علم کی قدر کا احساس دلاتا ہے۔ اگر ہم اپنی نوجوان نسل میں مطالعے کی عادت پیدا کرنا چاہتے ہیں تو ایسے ادبی اور ثقافتی مواقع کی حوصلہ افزائی ضروری ہے۔

علی گڑھ میں نوکرکوآقا ہی نہیں ''آقائے نامدار‘‘ بھی کہتے ہیں اور وہ لوگ کہتے ہیں جو آج کل خود آقا کہلاتے ہیں بمعنی طلبہ! اس سے آپ اندازہ کرسکتے ہیں کہ نوکرکا کیا درجہ ہے۔ پھرایسے آقا کا کیا کہنا ''جو سپید پوش‘‘ واقع ہو۔ سپید پوش کا ایک لطیفہ بھی سن لیجئے۔ آپ سے دور اور میری آپ کی جان سے بھی دور ایک زمانے میں پولیس کا بڑا دور دورہ تھا اسی زمانہ میں پولیس نے ایک شخص کا بدمعاشی میں چالان کر دیا کلکٹر صاحب کے یہاں مقدمہ پیش ہوا۔ ملزم حاضر ہوا تو کلکٹر صاحب دنگ رہ گئے۔ نہایت صاف ستھرے کپڑے پہنے ہوئے صورت شکل سے مرد معقول بات چیت نہایت نستعلیق کلکٹر صاحب نے تعجب سے پیشکار سے دریافت کیا کہ اس شخص کا بدمعاشی میں کیسے چالان کیا گیا دیکھنے میں تو یہ بالکل بدمعاش نہیں معلوم ہوتا! پیشکار نے جواب دیا حضور! تامل نہ فرمائیں یہ سفید پوش بدمعاش ہے!‘‘ لیکن میں نے یہاں سفید پوش کا لفظ اس لیے استعمال کیا ہے کہ میں نے آج تک کسی دھوبی کو میلے کپڑے پہنے نہیں دیکھا۔ اور نہ اس کو خود اپنے کپڑے پہنے دیکھا۔ البتہ اپنا کپڑا پہنے ہوئے اکثر دیکھا ہے بعضوں کو اس پر غصہ آیا ہوگا کہ ان کا کپڑا دھوبی پہنے ہو۔ کچھ اس پر بھی جز بز ہوئے ہوں گے کہ خود ان کو دھوبی کے کپڑے پہننے کا موقع نہ ملا۔ میں اپنے کپڑے دھوبی کو پہنے دیکھ کر بہت متاثر ہوا ہوں۔ کہ دیکھئے زمانہ ایسا آگیا کہ یہ غریب میرے کپڑے پہننے پر اتر آیا گو اس کے ساتھ یہ بھی ہے کہ اپنی قمیص دھوبی کو پہنے دیکھ کر میں نے دل ہی دل میں افتخار بھی محسوس کیا ہے۔ اپنی طرف سے نہیں تو قمیص کی طرف سے۔ اس لیے کہ میرے دل میں یہ وسوسہ ہے کہ اس قمیص کو پہنے دیکھ کر مجھے در پردہ کسی نے اچھی نظر سے نہ دیکھا ہو گا۔ ممکن ہے خود قمیص نے بھی اچھی نظر سے نہ دیکھا ہو۔دھوبی کپڑے چراتے ہیں بیچتے ہیں کرائے پر چلاتے ہیں، گم کرتے ہیں، کپڑے کی شکل مسخ کردیتے ہیں، پھاڑ ڈالتے ہیں یہ سب میں مانتا ہوں اور آپ بھی مانتے ہوں گے لیکن اس میں بھی شک نہیں کہ ہمارے آپ کے کپڑے اکثر ایسی حالت میں اترتے ہیں کہ دھوبی کیا کوئی دیوتا بھی دھوئے تو ان کو کپڑے کی ہیئت و حیثیت میں واپس نہیں کرسکتا۔ مثلاً غریب دھوبی نے ہمارے آپ کے ان کپڑوں کو پانی میں ڈالا ہو میل پانی میں مل گیا اللہ اللہ خیر سلا جیسے خاک کا پتلا خاک میں مل جاتا ہے خاک خاک میں آگ آگ میں پانی پانی میں اور ہوا ہوا میں۔ البتہ ان کپڑے پہننے والوں کا یہ کمال ہے کہ انہوں نے کپڑے کو تو اپنی شخصیت میں جذب کر لیا اور شخصیت کو کثافت میں منتقل کر دیا۔ مثلاً لطافت بے کثافت جلوہ پیدا کر نہیں سکتی! اور یہی کثافت ہم دنیا داروں کو قمیص، پگڑی اور شلوار میں نظر آتی ہو۔ یہ بات میں نے کچھ یوں ہی نہیں کہہ دی ہے۔ اونچے قسم کے فلسفے میں آیا ہے کہ عرض بغیر جوہر کے قائم رہ سکتا ہے اور نہ بھی آیا ہو تو فلسفیوں کو دیکھتے یہ بات کبھی نہ کبھی ماننی پڑے گی۔دھوبی کے ساتھ ذہن میں اوربہت سی باتیں آتی ہیں مثلاً گدھا، رسی، ڈنڈا، دھوبی کا کتا، دھوبن (میری مراد پرند سے ہے) استری (اس سے بھی میری مراد وہ نہیں ہے جو آپ سمجھتے ہیں) میلے ثابت پھٹے پرانے کپڑے وغیرہ۔ ممکن ہے آپ کی جیب میں بھولے سے کوئی ایسا خط رہ گیا ہو جس کو آپ سینے سے لگا رکھتے ہوں لیکن کسی شریف آدمی کو نہ دکھا سکتے ہوں اور دھوبی نے اسے دھو پچھاڑ کر آپ کا آنسو خشک کرنے کیلئے بلاٹنگ پیپر بنا دیا ہو یا کوئی یونانی نسخہ آپ جیب میں رکھ کر بھول گئے ہوں اوردھوبی اسے بالکل ''صاف نمودہ‘‘ کر کے لایا ہو۔لڑائی کے زمانے میں جہاں اور بہت سی دشواریاں ہیں۔ وہاں یہ آفت بھی کم نہیں کہ بچے کپڑے پھاڑتے ہیں عورتیں کپڑے سمیٹتی ہیں۔ دھوبی کپڑے چراتے ہیں دوکاندار قیمتیں بڑھاتے ہیں اور ہم سب کے دام بھگتے ہیں۔ لڑائی کے بعد زندگی کی ازسر نو تنظیم ہو یا نہ ہو کوئی تدبیرایسی نکالنی پڑے گی کہ کپڑے اوردھوبی کی مصیبتوں سے نوع انسانی کو کلیتہً نجات نہ بھی ملے تو بہت کچھ سہولت میسر آ جائے۔کپڑے کا مصرف پھاڑنے کے علاوہ حفاظت، نمائش اور ستر پوشی ہے میراخیال ہے کہ یہ باتیں اتنی حقیقی نہیں ہیں جتنی ذہنی یا رسمی۔ سردی سے بچنے کی ترکیب تویونانی اطبا اور ہندوستانی سادھو جانتے ہیں ایک کشتہ کھاتا ہے دوسرا جسم پر مل لیتا ہے۔ نمائش میں ستر پوشی اور ستر نمائی دونوں شامل ہیں۔ میرا خیال ہے کہ اگر ستر کے رقبہ پر کنٹرول عائد کر دیا جائے تو کپڑا یقیناً کم خرچ ہو گا اور دیکھ بھال میں بھی سہولت ہو گی۔ جنگ کے دوران میں یہ مراحل طے ہو جاتے تو صلح کا زمانہ عافیت سے گزرتا۔لیکن اگرایسا نہ ہو سکے تو پھردنیا کی حکومتوں کو چاہیے کہ وہ تمام سائنس دانوں اور کاریگروں کو جمع کر کے قوم کی اس مصیبت کو ان کے سامنے پیش کریں کہ آئندہ سے لباس کے بجائے ''انٹی دھوبی ٹینک‘‘ کیوں کر بنائے اوراوڑھے پہنے جا سکتے ہیں۔ اگریہ ناممکن ہے اوردھوبیوں کے پھاڑنے پچھاڑنے اور چرانے کے پیدائشی حقوق مجروح ہونے کا اندیشہ ہو جس کو دنیا کی خدا ترس حکومتیں گوارا نہیں کر سکتیں یا بعض بین الاقوامی پیچیدگیوں کے پیش آنے کا اندیشہ ہے تو پھر رائے عامہ کو ایسی تربیت دی جائے کہ لباس پہننا ہی یک قلم موقوف کر دیا جائے۔ اورتمام دھوبیوں کو کپڑا دھونے کے بجائے بین الاقوامی معاہدوں اورہندوستان کی تاریخوں کودھونے پچھاڑنے اور پھاڑنے پرمامورکردیا جائے۔

کسی باغ میں ایک کبوتر نے اپنا آشیانہ بنایا ہوا تھا۔ جس میں وہ دن بھر اپنے بچوں کو دانہ چگاتا۔ بچوں کے بال و پر نکل رہے تھے۔ ایک دن کبوتر دانہ چونچ میں دبائے باہر سے آیا تو سارے بچوں نے انہیں تشویش سے بتایا کہ اب ہمارے آشیانے کی بربادی کا وقت آ گیا ہے۔ آج باغ کا مالک اپنے بیٹے سے کہہ رہا تھا کہ پھل توڑنے کا زمانہ آ گیا ہے۔ کل میں اپنے دوستوں کو ساتھ لاؤں گا اور ان سے پھل توڑنے کا کام لوں گا۔ خود میں اپنے بازو کی خرابی کی وجہ سے یہ کام نہ کر سکوں گا۔کبوتر نے اپنے بچوں کو تسلی دیتے ہوئے کہا کہ باغ کا مالک کل اپنے دوستوں کے ساتھ نہیں آئے گا۔ فکر کرنے کی کوئی بات نہیں۔ حقیقتاً ایسا ہی ہوا اور باغ کا مالک دوسرے روز اپنے دوستوں کے ہمراہ پھل توڑنے نہ آیا۔ کئی روز بعد باغ کا مالک اپنے بیٹے کے ساتھ باغ میں آیا اور کہنے لگا کہ میں اس دن پھل توڑنے نہ آ سکا کیونکہ میرے دوست وعدے کے باوجود نہ آئے لیکن میرے دوبارہ کہنے پر انہوں نے پکا وعدہ کیا ہے کہ کل وہ ضرور آئیں گے اور پھل توڑنے باغ میں جائیں گے۔کبوتر نے یہ بات بچوں کی زبانی سن کر کہا کہ گھبراؤ نہیں، باغ کا مالک اب بھی پھل توڑنے نہیں آئے گا۔ یہ کل بھی گزر جائے گی۔ اسی طرح دوسرا روز بھی گزر گیا اور باغ کا مالک اور اس کے دوست باغ نہ آئے۔ آخر ایک روز باغ کا مالک اپنے بیٹے کے ساتھ پھر باغ میں آیا اور بولا: میرے دوست تو بس نام کے ہمدرد ہیں۔ ہر بار وعدہ کرکے بھی ٹال مٹول کرتے ہیں اور نہیں آتے۔ اب میں نے فیصلہ کیا ہے کہ ان پر بھروسہ کرنے کی بجائے اپنا کام میں خود کروں گا اور کل باغ سے پھل توڑوں گا۔کبوتر نے یہ بات سن کر پریشانی سے کہا بچو! اب ہمیں اپنا ٹھکانہ کہیں اور تلاش کرنا چاہیے۔ باغ کا مالک کل یہاں ضرور آئے گا کیونکہ اس نے دوسروں پر بھروسہ کرنا چھوڑ دیا ہے۔حاصل کلام: دوسروں پر بھروسہ ہمیشہ نقصان کا باعث بنتا ہے۔ اپنا کام خود کرنا چاہیے۔

٭...29 مارچ 1917ء کو جھنگ میں پیدا ہوئے۔ان کا اصل نام سید جعفر علی شاہ تھا۔٭...ابتدائی تعلیم علاقائی اسکول میں حاصل کی ، پرائیویٹ بی اے کیا اور فوج میں بھرتی ہوگئے۔٭... 1966ء میں فوج کی ملازمت سے سبکدوش ہونے کے بعد ریڈیو پاکستان راولپنڈی سے وابستگی اختیار کی اور اپنی وفات تک یہ تعلق برقرار رکھا۔٭...جعفر طاہر کے شعری مجموعے ''ہفت کشور، ہفت آسمان اور سلسبیل‘‘ کے نام سے اشاعت پذیر ہوئے تھے۔ ٭...جعفر طاہر کا شمار ان شعرا میں ہوتا ہے جنھوں نے غزل کو روایتی دائرے سے نکال کر تازگی بخشی اور اس صنف سخن کو تخلیق کے نئے آہنگ کے ساتھ وسعت عطا کی۔٭...جعفر طاہر کی غزلوں کے موضوعات اور ان کا اسلوب بھی اپنی انفرادیت کے سبب انھیں تخلیقی وفور سے مالا مال اور ثروت مند ظاہر کرتا ہے۔٭...انہوں نے غزلوں کے علاوہ نظمیں بھی کہیں، ساتھ ہی انہوں نے ایک نئی صنف 'کینٹو‘(Canto) کو متعارف کرایا۔٭... ان کے 'کینٹو‘ کا پہلا مجموعہ ''ہفت کشور‘‘ کے نام سے شائع ہوا۔ اس مجموعے کیلئے انہیں آدم جی ایوارڈ سے بھی نوازا گیا۔ ٭... 25 مئی 1977ء کو راولپنڈی میں وفات پائی۔اردو کے اس ممتاز شاعر کو جھنگ میں ان کے آبائی قبرستان میں سپردِ خاک کیا گیا۔چند اشعاراے وطن جب بھی سر دشت کوئی پھول کھلادیکھ کر تیرے شہیدوں کی نشانی رویا٭٭٭٭٭٭آپس کی گفتگو میں بھی کٹنے لگی زباںاب دوستوں سے ترک ملاقات چاہئے٭٭٭٭٭٭اک عمر بھٹکتے ہوئے گزری ہے جنوں میںاب کون فریب نگہ یار میں آئے٭٭٭٭٭٭طاہر خدا کی راہ میں دشواریاں سہیعشق بتاں میں کون سی آسانیاں رہیں٭٭٭٭٭٭اٹھی تھی پہلی بار جدھر چشم آرزووہ لوگ پھر ملے نہ وہ بستی نظر پڑی٭٭٭٭٭٭عرصہ ظلمت حیات کٹےہم نفس مسکرا کہ رات کٹے٭٭٭٭٭٭اے زلف خم بہ خم تجھے اپنا ہی واسطہہموار ہونے پائے نہ عمر رواں کی راہ٭٭٭٭٭٭ناز ہر بت کے اٹھا پائے نہ جعفر طاہرچوم کر چھوڑ دیے ہم نے یہ بھاری پتھر٭٭٭٭٭٭

اسلحہ ڈپو میں دھماکہ25 مئی 1865ء کو امریکی ریاست الاباما میں ایک اسلحہ گودام کے خوفناک دھماکے کے نتیجے میں تقریباً 300 افراد ہلاک ہو گئے۔ یہ حادثہ امریکی خانہ جنگی کے اختتامی دنوں میں پیش آیا اور اسے اُس دور کے بدترین سانحات میں شمار کیا جاتا ہے۔ دھماکے کی شدت اتنی زیادہ تھی کہ آس پاس کی عمارتیں تباہ ہو گئیں اور دور دور تک آگ پھیل گئی۔ متعدد افراد زخمی بھی ہوئے جبکہ شہری شدید خوف و ہراس کا شکار ہو گئے۔ کارلو کی لڑائی25مئی 1798ء کو آئر لینڈ کے شہر کارلو میں لڑائی اس وقت شروع ہوئی جب کارلو باغی 1798 ء کی بغاوت کی حمایت میں اٹھ کھڑے ہوئے۔ یہ بغاوت کائونٹی کلڈیرے میں ایک دن پہلے شروع ہوئی تھی۔ کارلو میں یونائیٹڈ آئرش مین آرگنائزیشن کی قیادت ایک نوجوان کر رہا تھا جس کا نام مک ہیڈن تھا۔ اس نوجوان کو پچھلے رہنما پیٹر آئورز کی گرفتاری کے بعد قیادت دی گئی تھی۔ سابق رہنما کو مارچ میں اولیور بانڈ کے گھر سے متحدہ آئرلینڈ کے کئی دیگر سرکردہ افراد کے ساتھ گرفتار کیا گیا تھا۔انقلاب مئی''انقلاب مئی‘‘ ریو ڈی لا پلاٹا کے وائسرائیلٹی کے دارالحکومت بیونس آئرس میں 18 سے 25مئی 1810ء تک ہونے والے واقعات کا ایک طویل سلسلہ تھا۔ اس ہسپانوی کالونی میں تقریباً موجودہ ارجنٹائن، بولیویا، پیراگوئے، یوراگوئے اور برازیل کے کچھ حصے شامل تھے۔ نتیجتاً 25 مئی کو وائسرائے بالتاسر ہائیڈالگو ڈی سیسنیروس کی برطرفی ہوئی اورنئی حکومت کا قیام عمل میں آیا۔اسے وہاں سے نکال دیا گیا اور اس کی حکومت کو صرف ان علاقوں تک محدود کر دیا گیاجو ارجنٹائن سے تعلق رکھتے تھے۔ایکسپلورر32کی لانچنگ''ایکسپلورر32‘‘کو 25مئی 1966ء کو ڈیلٹا سی1وہیکل کیپ کینورل کے ذریعے لانچ کیا گیا تھا۔ یہ لانچ کئے جانے والے پانچ ایکسپلوررز میں سے ایک تھااور اس کا نمبر دوسرا تھا۔ اس سے پہلے '' ایکسپلورر17‘‘ کو لانچ کیا گیا تھا۔ اگرچہ اسے خرابی کی وجہ سے توقع سے زیادہ مدار کے قریب رکھا گیا تھا۔ اپنی لانچ وہیکل پر دوسرے مرحلے میں، ایکسپلورر 32 نے ناکام ہونے سے پہلے دس ماہ تک ڈیٹا بھیجا۔''دی اوپرا ونفرے شو‘‘ کا اختتام25مئی2011ء کو معروف امریکی میزبان اور میڈیا شخصیت اوپرا ونفری نے اپنے مشہور پروگرام ''دی اوپرا ونفری شو‘‘کی آخری قسط نشر کی، جس کے ساتھ ہی 25 سالہ کامیاب سفر اختتام پذیر ہوا۔ یہ پروگرام دنیا کے مقبول ترین ٹاک شوز میں شمار کیا جاتا تھا اور اس نے لاکھوں ناظرین کے دل جیتے۔ اوپرا ونفری نے اپنے منفرد انداز، سماجی موضوعات اور متاثر کن انٹرویوز کے ذریعے عالمی شہرت حاصل کی۔ آخری پروگرام کے موقع پر جذباتی ماحول دیکھنے میں آیا اور مداحوں نے ان کی خدمات کو خراجِ تحسین پیش کیا۔چائنہ فضائی حادثہ2002ء میں آج کے روز چائنہ ایئر لائنز کی پرواز 611 فضا میں ہی ٹکڑوں میں بکھر گئی اور آبنائے تائیوان میں جا گری، جس کے نتیجے میں جہاز میں سوار تمام 225 افراد ہلاک ہو گئے۔ یہ حادثہ ایشیا کی بدترین فضائی تباہیوں میں شمار کیا جاتا ہے۔ ابتدائی تحقیقات کے مطابق طیارے کے ڈھانچے میں پرانی خرابی اور ناقص مرمت اس سانحے کی بڑی وجہ بنی۔ اس المناک واقعے نے عالمی فضائی صنعت کو حفاظتی معیارات مزید سخت کرنے اور جہازوں کی بروقت جانچ کی اہمیت کا احساس دلایا۔

زیرو گریویٹی میں عظیم کارنامہعمر اگرچہ انسان کے جسم پر اپنے اثرات مرتب کرتی ہے، لیکن حوصلہ، جذبہ اور عزم وہ طاقتیں ہیں جو بڑھاپے کو بھی شکست دے دیتی ہیں۔ یہی حقیقت ایک 97 سالہ سابق فوجی نے ثابت کر دکھائی، جب انہوں نے زیرو گریویٹی میں پرواز کر کے دنیا کو حیران کر دیا۔ دوسری جنگ عظیم کے اس بزرگ ہیرو نے نہ صرف اپنی زندگی کے ایک انوکھے خواب کو پورا کیا بلکہ یہ پیغام بھی دیا کہ انسان اگر ارادہ مضبوط رکھے تو عمر کبھی رکاوٹ نہیں بنتی۔ ان کا یہ غیر معمولی کارنامہ آج دنیا بھر میں عزم، ہمت اور امید کی علامت کے طور پر دیکھا جا رہا ہے۔جب امریکی باشندے رابرٹ گورڈن اپالاچیا کے دامن میں پروان چڑھ رہے تھے تو وہ اکثر آسمان پر چمکتے ستاروں کو حیرت سے دیکھا کرتے تھے۔ اب 90 برس سے زائد عرصہ گزرنے کے بعد آخرکار انہوں نے اپنے اس خواب کو حقیقت میں بدل دیا۔ فروری میں 97 سالہ رابرٹ گورڈن میکافی زیرو گریویٹی میں پرواز کرنے والے معمر ترین شخص بن گئے، جب انہوں نے زیرو جی کی قمری خلائی پرواز کے ذریعے زمین کی فضا کی بلند ترین سطح تک سفر کیا۔اس مختصر مگر یادگار سفر کے دوران ریٹائرڈ ماہر نفسیات بے حد خوش تھے کہ وہ اپنی پیاری پوتی کیٹ کے ساتھ بے وزنی کی حالت میں فضا میں تیر رہے تھے۔ کیٹ ہی وہ شخصیت تھیں جنہوں نے برسوں تک زمین پر رہنے والے اپنے دادا کا اُڑان کا خواب آخرکار پورا کر دکھایا۔رابرٹ گورڈن نے گنیز ورلڈ ریکارڈ کو بتایا کہ بچپن میں مشرقی ٹینیسی میں رہتے ہوئے وہ اپنے گھر کے قریب جنگلات اور ندی نالوں میں گھومتے، ٹیڈ پولز سے کھیلتے اور فطرت کی خوبصورتی دریافت کیا کرتے تھے۔ دوسری جنگ عظیم میں خدمات انجام دینے کے بعد انہوں نے میڈیکل اسکول میں تعلیم حاصل کی اور ریاست کنساس میں طب کے مختلف شعبوں میں کام کیا۔ بعدازاں 85 برس کی عمر میں ماہر نفسیات کے طور پر ریٹائر ہوئے۔رابرٹ ایک خاندان دوست شخصیت ہیں اور اپنی پوتی کیٹ کے بہت قریب ہیں۔ برسوں تک خلائی پرواز کے بارے میں ان کی گفتگو سننے کے بعد کیٹ نے انہیں قائل کیا کہ وہ 22 فروری 2025ء کو ''زیرو جی‘‘ کی پرواز میں ان کے ساتھ شامل ہوں، جو سان جوز میں منعقد ہوئی۔ہوابازی اور خلائی سفر کے دیرینہ شوقین رابرٹ، جو یونائیٹڈ فلائنگ اوکٹوجنیرینز کے رکن بھی ہیں، اپنی اس یادگار پرواز کے ذریعے امریکی فوج کیلئے اپنی خدمات اور اپنے بھائی جے جی میکافی کو خراجِ تحسین پیش کرنا چاہتے تھے، جنہوں نے انہیں پرواز کرنا سکھایا تھا۔ رابرٹ نے مزاحیہ انداز میں کہا کہ ایک شخصیت مسلسل مجھے زیرو گریویٹی کے سفر کیلئے آمادہ کر رہی تھی اور پھر اس نے مجھے ایسی پیشکش کی جسے میں ٹھکرا نہیں سکا۔پرواز کی تیاری کیلئے رابرٹ نے خود کو متحرک رکھا۔ وہ روزانہ چہل قدمی جاری رکھتے اور اپنی جسمانی صحت کا خاص خیال رکھتے تھے۔ جب ایک ڈاکٹر نے انہیں پرواز کیلئے فٹ قرار دینے کا سرٹیفکیٹ دینے سے انکار کر دیاتو بھی یہ 97 سالہ بزرگ مایوس نہ ہوئے۔ رابرٹ نے مسکراتے ہوئے کہاکہ میرا خیال ہے کہ شاید یہ اس ڈاکٹر کی اپنی حد تھی۔اس کے بعد انہوں نے خود ہی اپنے لیے منظوری کا نوٹ لکھ دیا، کیونکہ آخرکار وہ خود بھی ایک ڈاکٹر تھے۔پرواز کے دن یہ پرجوش دادا اور ان کی خیال رکھنے والی پوتی بہادر مہم جوؤں کے ایک گروپ کے ساتھ زیرو جی کی سہولیات میں جمع ہوئے اور خصوصی خلائی سوٹ زیب تن کیے۔ اسی موقع پر رابرٹ کو جیک پریسمین سے ملاقات کا شرف بھی حاصل ہوا، جو اس وقت گنیز ورلڈ ریکارڈ کے تحت کم عمر ترین (مرد) شخص کے طور پر زیرو گریویٹی میں پرواز کرنے کا عالمی ریکارڈ رکھتے ہیں، جب وہ صرف آٹھ سال کے تھے۔اگرچہ یہ سفر بظاہر نہایت اعصاب شکن تھا، تاہم رابرٹ اس بات سے زیادہ پریشان نہیں تھے کہ وہ زمین کی فضائی حد تک جا رہے ہیں۔ ان کے مطابق، ‘‘لوگ اسے خطرناک بنا کر پیش کرتے ہیں لیکن مجھے نہیں لگتا کہ یہ واقعی خطرناک ہے۔جیسے جیسے گروپ بلندی کی طرف سفر کرتا گیا، ان کے چہرے پر مسکراہٹ مزید نمایاں ہوتی گئی۔ وہ اس حقیقت کو محسوس کر رہے تھے کہ وہ آخرکار اپنے بچپن کے ایک دیرینہ خواب کو حقیقت میں بدل رہے ہیں۔ جب طیارہ اپنی مطلوبہ بلندی تک پہنچا تو گروپ کو آخرکار اپنی سیٹ بیلٹس کھولنے اور زیرو گریویٹی میں آزادانہ طور پر تیرنے کی اجازت مل گئی۔ اس لمحے میں رابرٹ اور ان کی پوتی کیٹ نے قیمتی لمحات ایک ساتھ گزارتے ہوئے یوں گھومنا شروع کیا جیسے دو سپر ہیروز فضا میں اڑ رہے ہوں۔رابرٹ خوشی سے قلابازیاں کھاتے اور مڑتے ہوئے بالکل ایک نوجوان کی طرح حرکت کر رہے تھے۔ ان کے چہرے پر ایک وسیع مسکراہٹ تھی جبکہ وہ بے وزنی کی حالت میں جہاز کے اندر آہستہ آہستہ تیر رہے تھے اور دوسرے خوش و خرم شرکاء کے درمیان نہایت نرمی سے حرکت کر رہے تھے۔لینڈنگ کے بعدرابرٹ زمین پر واپس آئے تو وہ باقاعدہ طور پر گنیز ورلڈ ریکارڈ کے ایک ریکارڈ ہولڈر بن چکے تھے۔ انہوں نے یہ اعزاز 90 سالہ سابق خلانورد امیدوار ایڈ ڈوائٹ کے مئی 2024ء کے قائم کردہ ریکارڈ کو توڑ کر حاصل کیا۔اگرچہ انہیں یہ تجربہ بے حد پسند آیا، تاہم رابرٹ نے کہا کہ یہ پرواز اتنی دیر تک جاری نہیں رہی جتنی وہ چاہتے تھے۔ ان کے مطابق وہ اپنی پوتی کے ساتھ بے وزنی میں گھنٹوں تک تیرتے رہنے کیلئے بالکل تیار تھے۔رابرٹ کے اس عمر کے آخر میں قائم کیے گئے شاندار ریکارڈ سے متاثر ہونے والوں کے لیے، اس فخر سے بھرے ریکارڈ ہولڈر نے مشورہ دیا کہ ہر شخص کو ذہنی اور جسمانی طور پر متحرک رہنا چاہیے۔ ان کے مطابق اگر وہ اتنی اچھی جسمانی حالت میں نہ ہوتے تو اس عمر میں اپنے خواب کو حقیقت بنانا تقریباً ناممکن ہوتا۔

پاکستان کے قومی جانور کے تحفظ کی اہمیتدنیا بھر میں ہر سال 24 مئی کو مارخور کا عالمی دن منایا جاتا ہے تاکہ اس نایاب اور خوبصورت جنگلی جانور کے تحفظ کے بارے میں آگاہی پیدا کی جا سکے۔ اقوامِ متحدہ نے 2024ء میں پہلی مرتبہ اس دن کو عالمی سطح پر منانے کا اعلان کیا، جس کے بعد یہ دن ماحولیات اور جنگلی حیات کے تحفظ کی ایک اہم علامت بن چکا ہے۔ پاکستان کے لیے یہ دن اس وجہ سے بھی خاص اہمیت رکھتا ہے کیونکہ مارخور پاکستان کا قومی جانور ہے اور اس کی بڑی تعداد ملک کے شمالی پہاڑی علاقوں میں پائی جاتی ہے۔ مارخور اپنے خوبصورت بل کھاتے ہوئے سینگوں، مضبوط جسم اور پہاڑوں پر چڑھنے کی غیر معمولی صلاحیت کی وجہ سے دنیا بھر میں منفرد مقام رکھتا ہے۔ یہ جانور زیادہ تر دشوار گزار پہاڑی علاقوں میں رہتا ہے اور فطرت کے حسن کی ایک جیتی جاگتی مثال سمجھا جاتا ہے۔مارخور بنیادی طور پر جنگلی بکری کی ایک نایاب نسل ہے۔ اس کے سینگ پیچ دار ہوتے ہیں جو اسے دوسرے جانوروں سے ممتاز بناتے ہیں۔ نر مارخور کے سینگ چار سے پانچ فٹ تک لمبے ہو سکتے ہیں جبکہ مادہ کے سینگ نسبتاً چھوٹے ہوتے ہیں۔یہ جانور زیادہ تر پاکستان کے شمالی علاقوں، گلگت بلتستان، چترال، کوہستان، بلوچستان اور خیبر پختونخوا کے پہاڑی سلسلوں میں پایا جاتا ہے۔ اس کے علاوہ افغانستان، تاجکستان اور بھارت کے بعض علاقوں میں بھی اس کی موجودگی دیکھی گئی ہے۔ مارخور نہایت پھرتیلا جانور ہے اور خطرناک چٹانوں پر آسانی سے چڑھ سکتا ہے۔ یہ زیادہ تر گھاس، جھاڑیوں اور پہاڑی پودوں پر گزارا کرتا ہے۔ سردیوں میں یہ نسبتاً نچلے علاقوں کی طرف آ جاتا ہے جبکہ گرمیوں میں بلند پہاڑوں کا رخ کرتا ہے۔ مارخور کے تحفظ کی کامیاب کوششیںایک وقت ایسا بھی تھا جب غیر قانونی شکار، جنگلات کی کٹائی اور قدرتی ماحول کی تباہی کے باعث مارخور کی تعداد تیزی سے کم ہو رہی تھی۔ ماہرینِ ماحولیات کے مطابق اگر بروقت اقدامات نہ کیے جاتے تو یہ خوبصورت جانور معدوم ہونے کے خطرے سے دوچار ہو سکتا تھا۔پاکستان نے مارخور کے تحفظ کے لیے کئی اہم اقدامات کیے۔ مختلف قومی پارکس، جنگلی حیات کے محفوظ علاقے اور کمیونٹی بیسڈ کنزرویشن پروگرام شروع کیے گئے۔ مقامی آبادی کو بھی اس مہم میں شامل کیا گیا تاکہ لوگ جنگلی حیات کے تحفظ کی اہمیت کو سمجھ سکیں۔ ان کوششوں کا نتیجہ یہ نکلا کہ پاکستان میں مارخور کی تعداد میں نمایاں اضافہ ہوا۔ عالمی ادارہ برائے تحفظِ فطرت (IUCN) نے بھی پاکستان کی کامیاب حکمتِ عملی کو سراہا ہے۔ ایک اندازے کے مطابق اب پاکستان میں مارخور کی تعداد کئی ہزار تک پہنچ چکی ہے جو ایک مثبت پیش رفت ہے۔پاکستان میں ٹرافی ہنٹنگ پروگرام بھی متعارف کرایا گیا جس کے تحت محدود اور قانونی شکار کی اجازت دے کر حاصل ہونے والی آمدنی مقامی کمیونٹیز کی فلاح اور جنگلی حیات کے تحفظ پر خرچ کی جاتی ہے۔ اس پروگرام نے مقامی لوگوں کو مارخور کے تحفظ کی طرف راغب کرنے میں اہم کردار ادا کیا۔ماحولیاتی توازن میں مارخور کا کردارمارخور صرف ایک خوبصورت جانور ہی نہیں بلکہ پہاڑی ماحولیاتی نظام کا اہم حصہ بھی ہے۔ یہ مختلف پودوں اور جھاڑیوں کو کھا کر قدرتی توازن برقرار رکھنے میں مدد دیتا ہے۔ اس کے علاوہ یہ برفانی چیتے جیسے شکاری جانوروں کی خوراک کا بھی اہم ذریعہ ہے۔ اگر مارخور کی نسل ختم ہو جائے تو پورا پہاڑی ماحولیاتی نظام متاثر ہو سکتا ہے۔ یہی وجہ ہے کہ ماہرینِ جنگلی حیات اس کے تحفظ کو نہایت ضروری قرار دیتے ہیں۔ مارخور سیاحت کے فروغ میں بھی اہم کردار ادا کرتا ہے۔ دنیا بھر سے سیاح شمالی پاکستان کے خوبصورت پہاڑوں میں اس نایاب جانور کو دیکھنے آتے ہیں، جس سے مقامی معیشت کو فائدہ پہنچتا ہے۔عالمی دن منانے کا مقصدمارخور کا عالمی دن منانے کا بنیادی مقصد لوگوں میں جنگلی حیات کے تحفظ کا شعور پیدا کرنا ہے۔ اس دن مختلف ممالک میں سیمینارز، آگاہی واکس، تعلیمی پروگرام اور میڈیا مہمات کا انعقاد کیا جاتا ہے۔پاکستان میں بھی سرکاری اور غیر سرکاری ادارے اس دن کی مناسبت سے تقریبات منعقد کرتے ہیں۔ سکولوں اور جامعات میں طلبہ کو ماحولیات اور جنگلی جانوروں کی اہمیت کے بارے میں آگاہ کیا جاتا ہے تاکہ نئی نسل قدرتی وسائل کے تحفظ کی ذمہ داری محسوس کرے۔ماہرین کے مطابق اگر انسان قدرتی ماحول اور جنگلی حیات کے تحفظ پر توجہ نہ دے تو مستقبل میں کئی نایاب جانور ہمیشہ کے لیے ختم ہو سکتے ہیں۔ مارخور کا عالمی دن ہمیں یہ یاد دلاتا ہے کہ فطرت کا حسن برقرار رکھنے کے لیے اجتماعی کوششیں ناگزیر ہیں۔ مارخور پاکستان کی قدرتی خوبصورتی، قومی شناخت اور جنگلی حیات کی علامت ہے۔ اس کے تحفظ میں پاکستان کی کامیاب کوششیں پوری دنیا کے لیے ایک مثال بن چکی ہیں۔ 24 مئی کا عالمی دن ہمیں یہ پیغام دیتا ہے کہ جنگلی جانور صرف قدرت کا حصہ نہیں بلکہ انسانی زندگی اور ماحول کے توازن کے لیے بھی ضروری ہیں۔ ضرورت اس امر کی ہے کہ حکومت، مقامی آبادی، تعلیمی ادارے اور عوام مل کر جنگلی حیات کے تحفظ کے لیے کام کریں تاکہ آنے والی نسلیں بھی مارخور جیسے خوبصورت اور نایاب جانور کو قدرتی ماحول میں دیکھ سکیں۔

دنیا کا پہلا یونیورسٹی میوزیم1683ء میں ''ایشمولین میوزیم‘‘ (Ashmolean Museum) کا افتتاح انگلینڈ کے شہرآکسفورڈ میں کیا گیا۔ یہ دنیا کا پہلا یونیورسٹی میوزیم تھا، جسے علم، تاریخ اور ثقافت کے فروغ کیلئے قائم کیا گیا۔ اس میوزیم کی بنیاد مشہور ماہر آثارقدیمہ اور کلیکٹر الیاس ایشمول کے عطیہ کردہ نوادرات پر رکھی گئی۔ یہاں قدیم مخطوطات، تاریخی اشیا، فن مصوری اور سائنسی نمونے محفوظ کیے گئے، جن سے طلبہ اور محققین نے بھرپور استفادہ کیا۔ ایشمولین میوزیم علم و تحقیق کے میدان میں اہم مقام رکھتا ہے۔بروکلین برج کا افتتاحبروکلین برج نیویارک شہر میں ایک ہائبرڈ کیبل پل ہے جو مین ہٹن اور بروکلین کے درمیان مشرقی دریا پر پھیلا ہوا ہے۔اس پل کو عام عوام کیلئے 24 مئی 1883ء کو کھولا گیا، بروکلین برج مشرقی دریا کو عبور کرنے والا پہلا پل تھا۔ جس وقت اس کا افتتاح کیا گیا یہ اس وقت دنیا کا سب سے لمبا کیبل برج تھا ۔ اس پل کو اصل میں نیویارک اور بروکلین برج یا ایسٹ ریور برج کہا جاتا تھا لیکن 1915ء میں باضابطہ طور پر اس کا نام بدل کر بروکلین برج رکھ دیا گیا۔ بحیرہ ایجیئن میں شدید زلزلہ 24 مئی 2014ء کو یونان اور ترکی کے درمیان شمالی بحیرہ ایجیئن میں شدید زلزلہ آیا۔ جس کی شدت 6.9 ریکارڈ کی گئی۔ ترکی کے جزیرے امبروس اور ایڈیرنے اور چاناکلے کے شہروں کے ساتھ ساتھ یونانی جزیرے لیمنوس میں بھی شدید تباہی ہوئی۔ زلزلے کے جھٹکے بلغاریہ اور جنوبی رومانیہ میں بھی محسوس کیے گئے۔ کئی آفٹر شاکس بھی آئے جن کی شدت 5.3 ریکارڈ کی گئی۔ اس زلزلے میں450ملین ڈالر کا نقصان ہوا۔ روس اور امریکہ معاہدہامریکہ اور روس کے درمیان ایک معاہدہ ہوا جسے ماسکو معاہدہ بھی کہا جاتا ہے۔ یہ دونوں ممالک کے درمیان ہتھیاروں میں کمی کا ایک اسٹریٹجک معاہدہ تھا جو جون 2003ء سے فروری 2011ء تک نافذ رہا بعد ازاں اسے نیو اسٹارٹ ٹریٹی کے ذریعے ختم کر دیا گیا ۔ اس معاہدے پر ماسکو میں 24 مئی 2002ء کو دستخط کئے گئے۔معاہدے میں یہ بھی لکھا گیا کہ کوئی بھی فریق دوسرے کو تین ماہ کا تحریری نوٹس دینے پر معاہدے سے دستبردار ہو سکتا ہے۔ڈنمارک آبنائے کی جنگ1941ء میں ''بیٹل آف دی اٹلانٹک‘‘ کے دوران آبنائے ڈنمارک کی مشہور بحری جنگ پیش آئی۔ اس معرکے میں جرمن جنگی بحری جہاز نے برطانوی رائل نیوی کے فخر سمجھے جانے والے جنگی جہاز ''ایچ ایم ایس ہڈ‘‘کو تباہ کر دیا۔ اس المناک حادثے میں جہاز پر سوار تقریباً تمام اہلکار ہلاک ہوگئے جبکہ صرف تین ملاح زندہ بچ سکے۔ اس واقعے نے دوسری جنگ عظیم میں برطانیہ کو شدید نقصان پہنچایا اور بحری جنگوں کی تاریخ میں ایک اہم باب رقم کیا۔

کیا ''جراسک پارک‘‘ حقیقت بننے جا رہا ہے؟ سائنس اور ٹیکنالوجی کی تیز رفتار ترقی نے انسانی عقل کو حیرت میں ڈال دیا ہے۔ وہ باتیں جو کبھی صرف فلموں اور افسانوں کا حصہ سمجھی جاتی تھیں، آج حقیقت کا روپ دھارتی دکھائی دے رہی ہیں۔ حال ہی میں سائنس دانوں نے مکمل مصنوعی انڈے سے زندہ چوزوں کی پیدائش ممکن بنا کر حیاتیاتی تحقیق میں ایک نئی تاریخ رقم کی ہے۔ اس حیرت انگیز کامیابی کو بعض ماہرین ''حقیقی جراسک پارک‘‘ قرار دے رہے ہیں، کیونکہ اس سے معدوم یا ناپید ہوتی انواع کو دوبارہ زندہ کرنے یعنی ''ڈی ایکسٹنکشن‘‘ (De-Extinction) کے امکانات روشن ہوئے ہیں۔ اگرچہ یہ پیش رفت طب، حیاتیات اور زرعی شعبوں میں انقلابی تبدیلیاں لا سکتی ہے، تاہم اس کے ساتھ اخلاقی، ماحولیاتی اور انسانی تحفظ سے متعلق کئی اہم سوالات بھی جنم لے رہے ہیں۔کمپنی ''کولوسل بائیوسائنسز (Colossal Biosciences)، جو برفانی دور کے عظیم الجثہ ''وُولی میمتھ‘‘ (woolly mammoth)کو دوبارہ دنیا میں لانے کا منصوبہ رکھتی ہے، کے ماہرین نے پہلی بار ایسا نظام تیار کیا ہے جس میں بغیر خول کے مصنوعی انڈے کو قدرتی انڈے کے ممکنہ حد تک مشابہ بنایا گیا۔ تحقیقی ٹیم نے ابتدائی مرحلے کے پرندوں کے جنین لے کر انہیں مصنوعی خول میں منتقل کیا اور 18 دن تک ان کی افزائش اور نشوؤنما جاری رکھی۔ جب چوزے مکمل طور پر تیار ہو گئے تو وہ اپنے مصنوعی اور محفوظ گھر سے باہر نکل آئے اور اب صحت مند زندگی گزار رہے ہیں۔کمپنی کا کہنا ہے کہ یہ کامیابی جنوبی جزیرے کے دیو ہیکل ''موآ‘‘ (moa) پرندے کو دوبارہ زندہ کرنے کے منصوبے میں ایک اہم سنگ میل ثابت ہوگی۔ یہ ناپید پرندہ تقریباً 11.8 فٹ (3.6 میٹر) بلند اور 507 پاؤنڈ (230 کلوگرام) وزنی تھا۔یہ تحقیق مستقبل میں مصنوعی رحم (Artificial Womb)کی تیاری کیلئے بھی ایک اہم بنیاد فراہم کرتی ہے۔ کولوسل بائیو سائنسز کے مطابق: یہ آلہ ہر چیز بدل دیتا ہے۔ ہم دنیا کو دکھا رہے ہیں کہ ہم انڈے کے خول کے بغیر بھی مکمل پرندے کی افزائش ایک انکیوبیٹر میں کر سکتے ہیں۔ یہ واقعی ایک انقلابی کامیابی ہے۔ زندگی اپنا راستہ خود تلاش کر لیتی ہے۔مصنوعی انڈے کا یہ آلہ تھری ڈی پرنٹنگ کے ذریعے تیار کیے گئے ایک مضبوط بیرونی خول پر مشتمل ہے، جسے جالی نما ساخت دی گئی ہے تاکہ یہ حفاظت اور مضبوطی فراہم کر سکے۔ اس تہہ کے اندر سلیکون کی ایک جھلی موجود ہے جو آکسیجن کو نظام کے اندر منتقل ہونے کی اجازت دیتی ہے۔گزشتہ چالیس برسوں کے دوران مصنوعی انڈے تیار کرنے کی کئی کوششیں کی گئیں، لیکن ان میں خالص آکسیجن کی بڑی مقدار شامل کرنا پڑتی تھی، جس سے ڈی این اے کو نقصان پہنچتا اور جانوروں کی طویل مدتی صحت متاثر ہوتی تھی۔ اس نئے ڈیزائن میں استعمال ہونے والی نفوذ پذیر جھلی فضا سے آکسیجن کو قدرتی انداز میں انڈے کے اندر منتقل ہونے دیتی ہے۔ یہ عمل حقیقی انڈوں میں موجود باریک سوراخوں کے ذریعے آکسیجن کے داخل ہونے کے قدرتی نظام سے مشابہ ہے۔کمپنی کا کہنا ہے کہ ہم قدرت کے نظام کی نقل کیسے کریں اور اسے مزید بہتر کیسے بنائیں؟ مصنوعی انڈوں کے بنیادی انجینئرنگ مسئلے کو پہلی بار حل کیا گیا ہے۔مصنوعی انڈے میں اوپر کی جانب ایک ''کھڑکی‘‘ بھی دی گئی ہے، جس کے ذریعے جنین کی افزائش کے ہر مرحلے کو دیکھا جا سکتا ہے۔ کمپنی کے مطابق یہ آلہ عام تجارتی انکیوبیٹرز کے ساتھ مطابقت رکھتا ہے، بڑے پیمانے پر تیار کیا جا سکتا ہے، اور ہر سائز کے انڈوں کیلئے ڈھالا جا سکتا ہے۔اس عمل کے آغاز میں ماہرین نے مرغیوں کے اصلی انڈے فوراً اس وقت جمع کیے جب وہ دیے گئے تھے۔ ایمبریالوجی کی ٹیم نے ہر انڈے کا تفصیلی معائنہ کیا اور ان جنینزکا انتخاب کیا جن کے کامیابی سے نکلنے کے امکانات زیادہ تھے۔ اس کے بعد انڈے کو نہایت احتیاط سے توڑا گیا اور اس کے اندر موجود مواد کو مصنوعی انڈے میں منتقل کر دیا گیا، جسے بعد ازاں ایک انکیوبیٹر میں رکھا گیا۔ سائنس دانوں نے ایک خاص غذائی مادہ بھی شامل کیا جس نے جنین کی افزائش جاری رکھنے میں مدد دی۔ تقریباً 18 دن بعد چوزے نے انڈے پر چونچ مارنا شروع کی، جو اس بات کا اشارہ تھا کہ وہ باہر آنے کیلئے تیار ہے۔ باہر نکلنے کے بعد تمام چوزوں کو گروپوں میں رکھا گیا، پھر انہیں ایک ''گریجویشن پین‘‘ یعنی کھلے تربیتی حصے میں منتقل کیا گیا اور آخرکار ایک بڑے فارم میں بھیج دیا گیا۔کمپنی کولوسل بائیو سائنسز کے مطابق اس ڈیزائن سے ناپید ہونے کے خطرے سے دوچار جانوروں کو بھی فائدہ پہنچ سکتا ہے، خصوصاً ایسے وقت میں جب دنیا میں پرندوں کی نصف سے زیادہ اقسام کم ہوتی جا رہی ہیں۔ کمپنی کا کہنا ہے کہ ایک ایسے مستقبل کا تصور کریں جہاں لیبارٹریوں میں سینکڑوں یا ہزاروں انڈوں کے ذریعے نایاب اور شدید خطرے سے دوچار انواع کی افزائش کی جا رہی ہو۔ یہی وہ بنیادیں ہیں جن پر مستقبل کا مصنوعی رحم تعمیر کیا جائے گا۔کمپنی کا کہنا ہے کہ دیو ہیکل پرندے ''موآ‘‘ کو دوبارہ زندہ کرنے کا منصوبہ انکیوبیشن کے ایسے چیلنج سے دوچار ہے جو ان کے دیگر منصوبوں سے بالکل مختلف ہے۔ اندازوں کے مطابق موآ کا انڈہ ایک مرغی کے انڈے سے تقریباً 80 گنا بڑا اور ایمو کے انڈے سے تقریباً آٹھ گنا زیادہ حجم رکھتا تھا، جس کی وجہ سے موجودہ دور کے کسی بھی پرندے کو اس کے متبادل میزبان کے طور پر استعمال نہیں کیا جا سکتا۔ دنیا میں موجود کوئی زندہ پرندہ اتنا بڑا نہیں کہ وہ اس جنین کی پرورش کر سکے، اسی لیے اس معدوم نسل کو دوبارہ زندہ کرنے کیلئے بڑے سائز کے مصنوعی انڈے کی تیاری انتہائی اہم قرار دی جا رہی ہے۔ کولوسل بائیوسائنسز ''موآ‘‘ کی ہڈیوں سے حاصل کیے گئے جینز استعمال کرتے ہوئے جدید پرندوں میں جینیاتی تبدیلیاں کرے گی تاکہ وہ معدوم ''موآ‘‘ سے انتہائی مشابہ ہو جائیں۔ یہ پرندہ تقریباً 500 سے 600 سال قبل نیوزی لینڈ سے ناپید ہو گیا تھا۔یہی تکنیک اس سے پہلے سرمئی بھیڑیوں کو قدیم ''ڈائر وولف‘‘ سے مشابہ جانوروں میں تبدیل کرنے کیلئے استعمال کی گئی تھی۔ ترمیم شدہ جنینز کو بعدازاں مصنوعی انڈوں میں منتقل کیا جائے گا جہاں وہ نشوؤنما پا کر بالآخر انڈے سے باہر آئیں گے۔معدوم ڈوڈو کو دوبارہ زندہ کرنے کا حیران کن منصوبہاپنی نوعیت کے مشہور ترین معدوم جانوروں میں شمار ہونے والا ڈوڈو پرندہ انسانوں کے بے رحمانہ شکار کے باعث صرف چند دہائیوں میں ہمیشہ کیلئے دنیا سے ختم ہوگیا تھا۔اب سائنس دان اسٹیم سیل ٹیکنالوجی کی مدد سے اس معدوم پرندے کو دوبارہ زندہ کرنے کے منصوبے پر تیزی سے کام کر رہے ہیں، اور وہ اس مشہور پرندے کو اس کے اصل وطن ماریشس واپس لانے کے قریب پہنچ چکے ہیں۔ امریکی کمپنی کولوسل بائیوسائنسز اسٹیم سیل ٹیکنالوجی اور جینوم ایڈیٹنگ کی مدد سے ڈوڈو پرندے کی جدید شکل دوبارہ تخلیق کرنے پر کام کر رہی ہے۔ 225 ملین ڈالر سے زائد لاگت والے اس منصوبے کے تحت کمپنی ماریشس سے تقریباً 350 سال قبل یورپی مہم جوؤں کے ہاتھوں معدوم ہونے والے ڈوڈو کو دوبارہ زندہ کرنے کی کوشش کر رہی ہے۔سائنس دان پہلے ہی ہڈیوں کے نمونوں اور دیگر باقیات کی مدد سے اس معدوم پرندے کے مکمل جینوم کی ترتیب معلوم کرنے کا بڑا کارنامہ انجام دے چکے ہیں۔اگلا مرحلہ اس کے قریبی زندہ رشتہ دار پرندے''Nicobar pigeon‘‘کے جلدی خلیے میں جینیاتی تبدیلیاں کرنا ہے تاکہ اس کا جینوم معدوم ڈوڈو کے جینوم سے مطابقت اختیار کر سکے۔

برش کب کرنا بہتر، ماہرین نے معمہ سلجھا دیا روزمرہ زندگی کی چھوٹی عادات بھی ہماری صحت پر گہرے اثرات مرتب کرتی ہیں، اور دانت صاف کرنے کا درست وقت بھی انہی میں سے ایک اہم سوال ہے۔ اکثر لوگ اس الجھن کا شکار رہتے ہیں کہ دانت ناشتے سے پہلے برش کیے جائیں یا بعد میں۔ ماہرین دندان سازی کے مطابق اس معمولی دکھائی دینے والے فیصلے کے پیچھے سائنسی وجوہات موجود ہیں، جو نہ صرف دانتوں کی حفاظت بلکہ مجموعی صحت پر بھی اثر انداز ہوتی ہیں۔ حالیہ تحقیق اور ماہرین کی رائے نے اس دیرینہ بحث کو ایک نئی جہت دی ہے، جس سے یہ جاننا مزید ضروری ہو گیا ہے کہ درست طریقہ کیا ہے اور ہم کہاں غلطی کر رہے ہیں۔کیا آپ کو دانت ناشتے سے پہلے برش کرنے چاہئیں یا بعد میں؟ ایک دندان ساز نے اس بحث کو بالآخر ختم کر دیا ہے اور خبردار کیا ہے کہ غلط طریقہ اختیار کرنے سے دانتوں کے اینامل کو مستقل نقصان پہنچ سکتا ہے۔ اگرچہ بہت سے لوگ ناشتہ کرنے کے بعد دانت صاف کرنا پسند کرتے ہیں، ڈاکٹر دیپا چوپڑا وضاحت کرتی ہیں کہ دراصل صبح سب سے پہلے دانت صاف کرنا زیادہ بہتر ہے۔ ناشتے سے پہلے برش کرنے سے وہ پلاک اور بیکٹیریا ختم ہو جاتے ہیں جو رات بھر دانتوں پر جمع ہو جاتے ہیں۔ اس سے دانتوں پر فلورائیڈ کی ایک حفاظتی تہہ بھی بن جاتی ہے، جو کھانا کھانے سے پہلے دانتوں کو محفوظ رکھتی ہے۔ یہ خبر سوشل میڈیا صارفین کیلئے حیران کن ہو سکتی ہے، کیونکہ بہت سے لوگ اب بھی سمجھتے ہیں کہ ناشتہ کرنے کے بعد دانت صاف کرنا ہی درست طریقہ ہے۔ ٹک ٹاک پر ایک صارف نے لکھا کہ میں پہلے ناشتہ کرتا ہوں اور پھر دانت صاف کرتا ہوں، یہ زیادہ سمجھ میں آنے والا طریقہ لگتا ہے۔ ایک اور صارف نے مزاحیہ انداز میں کہا کہ ناشتے سے پہلے برش کرنے کا فائدہ ہی کیا ہے، آپ کی سانس سارا دن سیریل اور دودھ جیسی ہی رہے گی۔ڈاکٹر چوپڑا، جو وائٹ ڈینٹل میں کام کرتی ہیں، وضاحت کرتی ہیں کہ ناشتے کے فوراً بعد دانت صاف کرنا نقصان دہ ہو سکتا ہے، خاص طور پر اگر آپ نے کھٹے (acidic) کھانے جیسے پھل یا پھلوں کا رس لیا ہو۔ یہ چیزیں عارضی طور پر دانتوں کے اینامل کو نرم کر دیتی ہیں، اور اس وقت برش کرنے سے اینامل آسانی سے گھس سکتا ہے۔ ناشتے سے پہلے دانت صاف کرنا دراصل تیزاب اور چینی کے اثرات کو کم کرنے میں مدد دیتا ہے جو ناشتے کے دوران استعمال ہوتے ہیں۔ڈاکٹر کے مطابق جب آپ پہلے برش کرتے ہیں تو آپ اپنے دانتوں پر ایک اضافی حفاظتی تہہ بنا دیتے ہیں، جو کھٹے یا میٹھے کھانوں سے ہونے والے نقصان کو کم کرنے میں مدد کرتی ہے۔ اگر آپ ناشتہ کرنے کے بعد دانت صاف کرنے پر اصرار کرتے ہیں تو ڈاکٹر چوپڑا مشورہ دیتی ہیں کہ کم از کم 30 منٹ کا وقفہ ضرور دیں۔ انہوں نے خبردار کیا کہ آپ کے اینامل کو تیزاب کے اثر کے بعد بحالی کیلئے وقت درکار ہوتا ہے۔ اگر آپ فوراً برش کرتے ہیں تو آپ دراصل نرم شدہ اینامل کو صاف کر رہے ہوتے ہیں، جو وقت کے ساتھ حساسیت اور کٹاؤ کا باعث بن سکتا ہے۔ اگر آپ ناشتہ کرنے کے بعد دانت صاف کرنا چاہتے ہیں تو کم از کم 30 منٹ انتظار کرنا ضروری ہے۔ اس سے آپ کے لعاب (saliva) کو وقت ملتا ہے کہ وہ تیزابیت کو کم کر دے اور اینامل کو دوبارہ سخت ہونے کا موقع ملتا ہے۔

''جاوا‘‘ پروگرامنگ کی لانچنگ23مئی 1995ء میں ''جاوا‘‘ پروگرامنگ منظر عام پر آئی۔ ''جاوا‘‘ ایک اعلیٰ سطحی پروگرامنگ لینگوئج ہے۔ اس کا مقصد پروگرامرز کو یہ سہولت فراہم کرنا ہے کہ پروگرام کو کہیں بھی لکھا اور چلایا جاسکے یعنی مرتب کردہ جاوا کوڈ ان تمام پلیٹ فارمز پر چل سکتا ہے جو جاوا کو دوبارہ کمپائل کرنے کی ضرورت کے بغیر سپورٹ کرتے ہیں۔ ''جاوا‘‘ ایپلی کیشنز کو عام طور پر بائی کوڈ پر مرتب کیا جاتا ہے جو کمپیوٹر کے بنیادی اصولوں سے قطع نظر کسی بھی جاوا ورچوئل مشین (JVM) پر چل سکتا ہے۔چین تبت معاہدہسترہ نکاتی معاہدہ، سرکاری طور پر مرکزی عوامی حکومت اور تبت کی مقامی حکومت کے درمیان ایک امن معاہد ہ تھا۔یہ معاہدہ عوامی جمہوریہ چین کے اندر تبت کی حیثیت سے متعلق ایک اہم دستاویز تھی۔ اس پر 23 مئی 1951ء کو مرکزی عوامی حکومت اور تبت کی حکومت نے بیجنگ میں دستخط کیے تھے۔ 24 اکتوبر 1951 ء کو ٹیلی گراف کی شکل میں معاہدے کی توثیق کی گئی۔ تقریباً آٹھ سال بعد 18 اپریل 1959ء کو اس معاہدے کو مسترد کر دیا گیا اور ایک بیان جاری کرتے ہوئے اعلان کیا گیا کہ یہ معاہدہ دباؤ کے تحت کیا گیا تھا۔کچھوؤں کا عالمی دن23مئی کو کچھوئوں کے عالمی دن کے طور پر منایا جاتا ہے۔اس دن کو منانے کا مقصد کچھوے کی اہمیت اوراس کے تحفظ کے حوالے سے شعور اجاگر کرنا ہے۔کچھوا زمین پر پائے جانے والے سب سے قدیم ترین رینگنے والے جانداروں میں سے ایک ہے۔ کچھوے دیگر جانوروں سے اس لحاظ سے بھی منفرد ہیں کہ ان میں پانی اور خشکی دونوں میں زندہ رہنے کی صلاحیت ہوتی ہے۔ کچھوے قدیم وقتوں سے آج تک مختلف ماحول میں اور حادثوں کے باوجود اپنی نسل کو زندہ رکھنے میں کامیاب رہے ہیں۔ ساتھ ساتھ کچھوؤں نے ماحول کی تبدیلی کے ساتھ اپنی عادات بھی بدلی ہیں۔ایک کچھوے کی اوسط عمر بھی بہت طویل ہوتی ہے۔ عام طور پر ایک کچھوے کی عمر 30 سے 50 سال تک ہوسکتی ہے۔نیویارک پبلک لائبریری کا قیام23 مئی 1895 ء کو آسٹر اور لینوکس لائبریریوں اور ٹلڈن ٹرسٹ کے وسائل کو یکجاں کر کے ایک نیاادارہ قائم کیا گیا جسے دی نیویارک پبلک لائبریری (The New York Public Library) کے نام سے جانا جاتا ہے۔ اس لائبریری کا شمار دنیا کی قدیم لائبریریز میں کیا جاتا ہے ۔یہ امریکہ کی دوسری اور دنیا کی چوتھی سب سے بڑی لائبریری ہے۔اس میں موجود کتابوں کی تعداد تقریباً52ملین ہے ۔ امریکہ کی ریاست بننے کا اعزاز1788ء میں جنوبی کیرولائنا نے ریاستہائے متحدہ امریکہ کے آئین کی توثیق کرنے والی آٹھویں ریاست بننے کا اعزاز حاصل کیا۔ یہ تاریخی اقدام امریکی وفاقی نظام کی مضبوطی کی جانب ایک اہم پیش رفت تھا۔ امریکی آئین 1787ء میں تیار کیا گیا تھا تاکہ نوآزاد ریاستوں کو ایک مضبوط مرکزی حکومت کے تحت متحد کیا جا سکے۔ جنوبی کیرولائنا کی منظوری نے آئین کی قبولیت کو مزید تقویت دی اور دیگر ریاستوں کو بھی اس کی توثیق کی ترغیب ملی۔ اس وقت امریکہ ایک نئے سیاسی نظام کی بنیاد رکھ رہا تھا، اور اس آئین نے ملک میں قانون، حکومت اور شہری حقوق کے اصول متعین کرنے میں بنیادی کردار ادا کیا۔

دنیا اس وقت موسمیاتی تبدیلی کے ایک ایسے دور سے گزر رہی ہے جہاں قدرتی نظام تیزی سے بدل رہے ہیں۔ کہیں شدید گرمی کی لہریں لوگوں کی زندگیوں کو متاثر کر رہی ہیں، کہیں بے وقت بارشیں اور سیلاب تباہی مچا رہے ہیںجبکہ قطبی علاقوں میں برف پگھلنے کی رفتار مسلسل بڑھ رہی ہے۔ حال ہی میں شائع ہونے والی ایک سائنسی تحقیق نے انٹارکٹکا کے سمندری برفانی علاقے کے بارے میں ایک نہایت تشویشناک انکشاف کیا ہے۔ ماہرین کے مطابق انٹارکٹکا کی سمندری برف میں اچانک اور غیر معمولی کمی دیکھنے میں آ رہی ہے جس نے سائنسدانوں کو حیران کر دیا ہے۔ماضی میں یہ سمجھا جاتا تھا کہ شمالی قطب یعنی آرکٹک کے مقابلے میں انٹارکٹکا کی برف نسبتاً مستحکم ہے۔ اگرچہ دنیا بھر میں درجہ حرارت بڑھ رہا تھا لیکن جنوبی قطب کے گرد موجود سمندری برف کئی دہائیوں تک زیادہ متاثر نہیں ہوئی۔ تاہم 2015ء کے بعد صورتحال یکسر تبدیل ہونا شروع ہوگئی۔ چند ہی برسوں میں برف کا رقبہ تیزی سے کم ہونے لگا اور 2023ء میں یہ کمی ریکارڈ سطح تک پہنچ گئی۔سائنسدانوں کے مطابق اس اچانک تبدیلی کی بڑی وجہ سمندر کی گہرائی میں موجود گرم پانی ہے۔ عام حالات میں انٹارکٹکا کے اردگرد سطح پر ٹھنڈا اور نسبتاً کم نمکین پانی موجود رہتا ہے جو نیچے موجود گرم پانی کو اوپر آنے سے روکے رکھتا ہے لیکن اب صورتحال بدل رہی ہے۔ مسلسل بدلتے موسمی نظام، تیز ہواؤں اور سمندری طوفانوں نے اس قدرتی رکاوٹ کو کمزور کر دیا ہے جس کے باعث گہرائی میں موجود گرم پانی سطح تک پہنچنے لگا ہے۔جب یہ گرم پانی سطح کے قریب آیا تو اس نے سمندری برف کو نیچے سے پگھلانا شروع کر دیا۔ نتیجتاً برف کی موٹائی اور پھیلاؤ کم ہونے لگے۔ ماہرین کا کہنا ہے کہ اب ایک خطرناکFeedback Loop شروع ہو چکا ہے، اس کا مطلب یہ ہے کہ جتنی زیادہ برف پگھلے گی اتنا ہی سمندر سورج کی حرارت جذب کرے گا اور جتنی زیادہ حرارت جذب ہوگی، اتنی ہی مزید برف پگھلے گی۔ یوں یہ عمل خود کو مسلسل تیز کرتا چلا جائے گا۔یہ صورتحال صرف انٹارکٹکا تک محدود نہیں بلکہ پوری دنیا کے لیے خطرے کی گھنٹی ہے۔قطبی برف زمین کے درجہ حرارت کو متوازن رکھنے میں اہم کردار ادا کرتی ہے۔ سفید برف سورج کی روشنی کو واپس خلا میں منعکس کرتی ہے جس سے زمین نسبتاً ٹھنڈی رہتی ہے۔ لیکن جب برف کم ہو جاتی ہے تو نیچے موجود گہرا سمندر زیادہ حرارت جذب کرنے لگتا ہے جس سے عالمی حدت میں مزید اضافہ ہوتا ہے۔انٹارکٹکا کی سمندری برف سمندری حیات کے لیے بھی نہایت اہم ہے۔ یہاں موجود برفانی ماحول لاکھوں جانداروں کی زندگی کا حصہ ہے۔ خاص طور پر کرِل نامی چھوٹے سمندری جاندار اس نظام کی بنیاد سمجھے جاتے ہیں۔ مچھلیاں، سیل، وہیل اور پینگوئن انہی پر انحصار کرتے ہیں۔ اگر برف کم ہوتی رہی تو یہ پورا ایکو سسٹم متاثر ہو سکتا ہے۔تحقیق میں پینگوئنز کی مثال بھی دی گئی ہے جن کی افزائش نسل سمندری برف پر ہوتی ہے۔ حالیہ برسوں میں کئی مقامات پر برف وقت سے پہلے ٹوٹ گئی جس کے نتیجے میں ہزاروں پینگوئن بچے سمندر میں گر کر ہلاک ہو گئے۔ ماہرین خبردار کر رہے ہیں کہ اگر یہی صورتحال جاری رہی تو مستقبل میں بعض اقسام کے پینگوئن شدید خطرے سے دوچار ہو سکتے ہیں۔اس تحقیق کا سب سے پریشان کن پہلو یہ ہے کہ سائنسدانوں کے بہت سے موسمیاتی ماڈلز بھی اس تیز رفتار تبدیلی کی پیش گوئی نہیں کر سکے تھے۔ اس کا مطلب یہ ہے کہ زمین کا موسمی نظام شاید ہماری توقعات سے کہیں زیادہ حساس اور غیر مستحکم ہو چکا ہے۔ اگر انٹارکٹکا میں برف پگھلنے کا عمل اسی رفتار سے جاری رہا تو عالمی موسمیاتی تبدیلی کے اثرات مزید شدت اختیار کر سکتے ہیں۔سمندری برف میں کمی کا ایک بڑا نتیجہ سمندری سطح میں اضافے کی صورت میں بھی سامنے آ سکتا ہے۔ اگرچہ سمندری برف خود پانی میں تیر رہی ہوتی ہے اور اس کے پگھلنے سے فوری طور پر سمندر کی سطح زیادہ نہیں بڑھتی لیکن یہ برف زمینی گلیشیئرز کے لیے حفاظتی دیوار کا کردار ادا کرتی ہے۔ جب سمندری برف کمزور پڑتی ہے تو انٹارکٹکا کے بڑے برفانی تودے زیادہ تیزی سے سمندر کی طرف بڑھ سکتے ہیں جس سے دنیا بھر کے ساحلی علاقے خطرے میں پڑ سکتے ہیں۔پاکستان جیسے ممالک بھی اس عالمی تبدیلی سے محفوظ نہیں۔ اگرچہ انٹارکٹکا ہم سے ہزاروں کلومیٹر دور ہے لیکن موسمیاتی نظام ایک دوسرے سے جڑے ہوئے ہیں۔ عالمی درجہ حرارت میں اضافہ پاکستان میں شدید گرمی، غیر متوقع بارشوں، گلیشیئرز کے تیزی سے پگھلنے اور زرعی مسائل کو مزید بڑھا سکتا ہے۔ ماہرین پہلے ہی خبردار کر چکے ہیں کہ جنوبی ایشیا موسمیاتی تبدیلی کے اثرات سے سب سے زیادہ متاثر ہونے والے خطوں میں شامل ہے۔اس تمام صورتحال سے یہ بات واضح ہوتی ہے کہ موسمیاتی تبدیلی اب مستقبل کا نہیں بلکہ حال کا مسئلہ ہے۔ دنیا بھر کی حکومتوں کو کاربن کے اخراج میں کمی، قابلِ تجدید توانائی کے استعمال، جنگلات کے تحفظ اور ماحول دوست پالیسیوں پر سنجیدگی سے عمل کرنا ہوگا۔ اگر بروقت اقدامات نہ کیے گئے تو آنے والی نسلوں کو زیادہ گرم،غیر مستحکم اور خطرناک دنیا کا سامنا کرنا پڑ سکتا ہے۔انٹارکٹکا کی برف میں اچانک کمی پوری انسانیت کے لیے ایک انتباہ ہے کہ قدرتی توازن بگڑ رہا ہے۔

ہر سال 20 مئی کو دنیا بھر میں شہید کی مکھیوں کا عالمی دن منایا جاتا ہے۔ اس دن کا مقصد شہد کی مکھیوں اور دیگر پولینیٹرز یعنی پولن افشانی کرنے والے کیڑوں کی اہمیت کو اجاگر کرنا ہے۔یہ دن اینٹون جانشا کے یوم پیدائش کی مناسبت سے منتخب کیا گیا تھا‘ جو جدید مگس بانی کے اولین علمبردار وں میں شمار ہوتے ہیں۔ جانشا 1734ء میں سلووینیا میں پیدا ہوئے جہاں شہد کی مکھیوں کو پالنا ایک اہم زرعی سرگرمی ہے جس کی ایک طویل روایت ہے۔اقوامِ متحدہ کے ادارہ برائے خوراک (ایف اے او) کے مطابق شہد کی مکھیاں دنیا کے غذائی نظام، زرعی پیداوار اور حیاتیاتی تنوع کے لیے نہایت ضروری ہیں۔ ماہرین کے مطابق اگر شہد کی مکھیوں کی تعداد میں کمی جاری رہی تو اس کے اثرات پوری دنیا کی خوراک، معیشت اور ماحول پر پڑ سکتے ہیں۔سائنسی تحقیق کے مطابق شہد کی مکھیاں پھولوں سے رس جمع کرتے وقت ایک پودے سے دوسرے پودے تک پولن منتقل کرتی ہیں۔ یہی عمل پھلوں، سبزیوں، بیجوں اور کئی فصلوں کی افزائش کے لیے ضروری ہے۔ایف اے او کے مطابق دنیا کی تقریباً 75 فیصد غذائی فصلیں کسی نہ کسی حد تک پولینیٹرز پر انحصار کرتی ہیں۔ ان میں سیب، آم، بادام، سورج مکھی، ٹماٹر، کھیرا، تربوز اور کافی جیسی فصلیں شامل ہیں۔ اگر شہد کی مکھیاں ختم ہو جائیں تو ان فصلوں کی پیداوار میں نمایاں کمی واقع ہو سکتی ہے۔پاکستان ایک زرعی ملک ہے جہاں معیشت کا بڑا حصہ زراعت سے وابستہ ہے۔ پنجاب اور خیبرپختونخوا میں پھلوں اور تیل دار فصلوں کی بہتر پیداوار میں شہد کی مکھیوں کا اہم کردار ہے۔ خاص طور پر آم، کینو، سورج مکھی اور سرسوں کی فصلیں پولینیشن سے زیادہ فائدہ اٹھاتی ہیں۔شہد کی صنعت اور پاکستانپاکستان میں شہد کی پیداوار گزشتہ چند برسوں میں تیزی سے بڑھی ہے۔ پوٹھوہار، چکوال، سوات، گلگت بلتستان اور کشمیر کے علاقے قدرتی شہد کے لیے مشہور ہیں۔ ماہرین کے مطابق پاکستان میں موجود مختلف اقسام کے جنگلی پودے شہد کی اعلیٰ کوالٹی پیدا کرنے میں مدد دیتے ہیں۔شہد کی مکھی پالنے کوApiculture کہا جاتا ہے۔ یہ ایک ایسی صنعت ہے جس میں کم سرمایہ کاری کے ساتھ اچھا منافع حاصل کیا جا سکتا ہے۔ دیہی علاقوں میں نوجوان اس شعبے میں دلچسپی لے رہے ہیں کیونکہ اس سے روزگار کے نئے مواقع پیدا ہوتے ہیں۔سائنسی ماہرین کے مطابق شہد کی مکھیوں کی موجودگی صرف شہد تک محدود نہیں بلکہ یہ زرعی پیداوار میں 20 سے 40 فیصد تک اضافہ کر سکتی ہیں۔ اسی لیے ترقی یافتہ ممالک میں کسان فصلوں کے قریب شہد کی مکھیاں رکھنے کو ترجیح دیتے ہیں۔شہد کی مکھیوں کو درپیش خطراتدنیا بھر میں شہد کی مکھیوں کی تعداد کم ہونے پر سائنسدان تشویش کا اظہار کر رہے ہیں۔ اس کی کئی بڑی وجوہات ہیں مثال کے طور پرزرعی ادویات،موسمیاتی تبدیلی،جنگلات کی کمی اورآلودگی۔فصلوں پر استعمال ہونے والے کیمیکل اور جراثیم کش ادویات شہد کی مکھیوں کے اعصابی نظام کو متاثر کرتی ہیں۔ بعض زہریلے سپرے ان کی موت کا سبب بھی بنتے ہیں۔درجہ حرارت میں اضافہ، بے وقت بارشیں اور خشک سالی پھولوں کے موسم کو متاثر کرتی ہیں۔ جس سے شہد کی مکھیوں کو خوراک کم ملتی ہے۔شہروں اور دیہات میں درختوں اور پھولدار پودوں کی کمی نے ان کے قدرتی ماحول کو محدود کر دیا ہے۔فضائی آلودگی بعض اوقات پھولوں کی خوشبو کو متاثر کرتی ہے جس سے شہد کی مکھیاں خوراک تلاش کرنے میں دشواری محسوس کرتی ہیں۔ ماہرین کے مطابق پاکستان میں شہد کی مکھیوں کے تحفظ کے لیے زرعی سپرے کے محفوظ استعمال کی تربیت،پھولدار درختوں اور پودوں کی شجرکاری،شہد کی مکھی پالنے والوں کو جدید تربیت ،قدرتی جنگلات اور سبز علاقوں کا تحفظ اورسکولوں اور کالجوں میں ماحولیاتی آگاہی پروگرام کی ضرورت ہے۔اس کے علاوہ زرعی تحقیقاتی اداروں کو نئی اقسام کی شہد کی مکھیوں اور بہتر پولینیشن ٹیکنالوجی پر کام کر نا چاہیے تاکہ فصلوں کی پیداوار میں اضافہ ہو سکے۔شہد کی مکھی ایک چھوٹا سا جاندار ضرور ہے لیکن اس کا کردار پوری دنیا کے غذائی نظام سے جڑا ہوا ہے۔ پاکستان جیسے زرعی ملک کے لیے ان کا تحفظ نہایت اہم ہے۔ اگر شہد کی مکھیاں محفوظ رہیں گی تو زرعی پیداوار، ماحول اور معیشت بھی مضبوط ہوں گے۔عالمی یومِ شہد کی مکھی ہمیں یہ پیغام دیتا ہے کہ قدرتی ماحول کی حفاظت صرف ماحولیاتی مسئلہ نہیں بلکہ انسانی بقا کا سوال بھی ہے۔

کیوبا کی آزادی20 مئی 1902ء کو کیوبا نے باضابطہ طور پر آزادی حاصل کی۔ اس سے پہلے کیوبا پر سپین کی حکومت تھی، لیکن امریکی ہسپانوی جنگ کے بعد امریکہ نے وہاں کنٹرول سنبھال لیا تھا۔ کئی برسوں کی سیاسی کشمکش اور جدوجہد کے بعد آخرکار کیوبا ایک آزاد ریاست کے طور پر دنیا کے نقشے پر ابھرا۔کیوبا کی آزادی لاطینی امریکہ کی تاریخ میں اہم سنگِ میل تھی۔ اگرچہ آزادی کے بعد بھی امریکہ کا اثر و رسوخ کافی عرصے تک برقرار رہا لیکن اس واقعے نے کیوبا کے عوام میں قومی شناخت اور خودمختاری کا جذبہ مستحکم کیا۔ بعد میں یہی سیاسی حالات 1959ء کے کیوبن انقلاب کی بنیاد بنے، جس کی قیادت فیڈل کاسترو نے کی۔کیوبا کی آزادی کے بعد وہاں جمہوری حکومت قائم کی گئی مگر بیرونی مداخلت کی وجہ سے سیاسی عدم استحکام کے مسائل موجود رہے۔ 20 مئی کو کیوبا کی تاریخ میں آزادی اور قومی خودمختاری کی علامت سمجھا جاتا ہے۔ واسکو ڈے گاما کی ہندوستان آمد 20 مئی 1498ء کو پرتگالی مہم جو واسکو ڈے گاما سمندری راستے سے ہندوستان کے شہر کالی کٹ پہنچا۔ یہ واقعہ دنیا کی تاریخ میں بہت اہم سمجھا جاتا ہے کیونکہ پہلی مرتبہ یورپ سے ہندوستان تک براہ راست سمندری راستہ دریافت ہوا۔ اس سے پہلے یورپی تاجر ایشیا تک زمینی راستوں یا عرب تاجروں کے ذریعے پہنچتے تھے جس میں بہت وقت اور خرچ آتا تھا۔ واسکو ڈے گاما کے اس سفر نے عالمی تجارت، سیاست اور نوآبادیاتی نظام کو مکمل طور پر بدل دیا۔واسکو ڈے گاما جولائی 1497ء میں پرتگال سے روانہ ہوا تھا۔ اُس نے افریقہ کے جنوبی کنارے راس امید (Cape of Good Hope) کو عبور کیا اور بحرِ ہند کے ذریعے ہندوستان پہنچا۔ اس کامیابی کے بعد پرتگال کو مصالحہ جات کی تجارت میں بے پناہ فائدہ حاصل ہوا۔ یورپی طاقتیں براہِ راست ہندوستان اور ایشیا سے تجارت کرنے لگیں۔ بعد میں پرتگالیوں نے گوا سمیت کئی علاقوں میں اپنی حکومت بھی قائم کی۔اس واقعے کے بعد یورپی اقوام مثلاً برطانیہ، فرانس اور ہالینڈ بھی ایشیا کی طرف متوجہ ہوئیں۔ اس طرح نوآبادیاتی دور کا آغاز ہوا جس نے آنے والی کئی صدیوں تک ایشیا اور افریقہ کی سیاست پر اثر ڈالا۔ مورخین کے مطابق 20 مئی 1498ء عالمی تاریخ میں تجارت، بحری سفر اور بین الاقوامی تعلقات کے نئے دور کی شروعات تھی۔ نیلی جینز کا پیٹنٹ 20 مئی 1873ء کو Levi Strauss اور Jacob Davisنے نیلی جینز کے ڈیزائن کا باقاعدہ پیٹنٹ حاصل کیا۔ یہ بظاہر ایک سادہ تجارتی واقعہ تھا لیکن بعد میں یہ دنیا کی سب سے مشہور لباس صنعتوں میں شمار ہونے لگا۔ ابتدا میں یہ پتلون مزدوروں، کان کنوں اور کسانوں کے لیے تیار کی گئی تھی کیونکہ انہیں مضبوط اور دیرپا لباس کی ضرورت تھی۔جیکب ڈیوس نے خیال پیش کیا کہ پتلون کے کمزور حصوں، خاص طور پر جیبوں کے کناروں، پر تانبے کے Rivets لگائے جائیں تاکہ کپڑا جلد نہ پھٹے۔ لیوائی سٹراس نے اس خیال کو مالی مدد فراہم کی اور دونوں نے مل کر پیٹنٹ حاصل کیا۔ یہی ڈیزائن بعد میں بلو جینزکے نام سے پوری دنیا میں مقبول ہوگیا۔اب جینز صرف مزدوروں کا لباس نہیں رہی بلکہ نوجوانوں اور عوام کا پسندیدہ لباس بن گئی، جس نے ایک کلچر کو جنم دیا۔ ہالی وڈ فلموں اور امریکی ثقافت نے بھی اس لباس کو عالمی شہرت دی۔ آج دنیا بھر میں مختلف رنگوں اور انداز کی جینز پہنی جاتی ہے لیکن اس کی اصل بنیاد 20 مئی 1873ء کے اسی پیٹنٹ میںہے۔ یہ واقعہ صنعتی ترقی، فیشن اور عالمی ثقافت کی تاریخ میں اہم مقام رکھتا ہے۔ ایک عام کام کے لباس نے بعد میں فیشن کی دنیا میں انقلاب برپا کردیا۔ آشوٹز کیمپ میں قیدیوں کی آمد20 مئی 1940ء کو دوسری جنگِ عظیم کے دوران نازی جرمنی کے حراستی کیمپ آشوٹز میں پہلے قیدی لائے گئے۔ یہ کیمپ پولینڈ میں قائم کیا گیا تھا جہاںلاکھوں افراد خصوصاً یہودیوں کو قید کیا گیا اور قتل کیا گیا۔آشوٹز کیمپ ابتدا میں سیاسی قیدیوں کے لیے بنایا گیا تھا لیکن جلد ہی یہ نازی نسل پرستانہ پالیسیوں کا مرکز بن گیا۔ یہاں گیس چیمبرز بھی بنائے گئے جہاں قیدیوں کو اجتماعی طور پر قتل کیا جاتا تھا۔ اندازوں کے مطابق تقریباً گیارہ لاکھ افراد اس کیمپ میں مارے گئے جن میں زیادہ تر یہودی تھے۔ اس کے علاوہ پولش شہری، خانہ بدوش، معذور افراد اور جنگی قیدی بھی اس حراستی مرکز میں قید رہے۔20 مئی 1940ء کی تاریخ اس لیے اہم ہے کیونکہ اسی دن سے آشوٹز کے ظلم و بربریت کا باقاعدہ آغاز سمجھا جاتا ہے۔ بعد میں اتحادی افواج نے 1945ء میں اس کیمپ کو آزاد کروایا، اور دنیا کے سامنے نازی مظالم کی ہولناک حقیقت آئی۔یہ واقعہ انسانیت کے لیے ایک بڑا سبق ہے۔ چارلس لنڈبرگ کی تاریخی پرواز20 مئی 1927ء کو امریکی ہوا باز چارلس لنڈ برگ نے دنیا کی پہلی اکیلی اور بغیر رکے بحرِ اوقیانوس عبور کرنے والی پرواز شروع کی۔ وہ نیویارک سے ایک چھوٹے جہاز میں روانہ ہوا اور تقریباً 33 گھنٹے بعد پیرس پہنچا۔ یہ ہوا بازی کی تاریخ کا ایک عظیم کارنامہ تھا۔اس زمانے میں ہوائی سفر ابھی ابتدائی مرحلے میں تھا اور طویل فاصلے کی پروازیں انتہائی خطرناک سمجھی جاتی تھیں۔ لنڈبرگ نے اکیلے سفر کرکے یہ ثابت کیا کہ طویل فضائی سفر ممکن ہے۔ اس کامیابی کے بعد پوری دنیا میں ہوائی سفر کے شعبے میں زبردست ترقی ہوئی۔ لوگوں کا اعتماد بڑھا اور نئی ایئر لائنز قائم ہونے لگیں۔لنڈبرگ کی کامیابی نے امریکہ کو بھی عالمی سطح پر سائنسی اور تکنیکی طاقت کے طور پر نمایاں کیا۔ اسے عالمی شہرت ملی اور وہ قومی ہیرو بن گیا۔ اس کے جہاز کو آج بھی امریکہ کے عجائب گھر میں محفوظ رکھا گیا ہے۔20 مئی 1927ء کی یہ پرواز جدید فضائی سفر کی بنیادوں میں شمار ہوتی ہے۔ اگرچہ آج ہوائی سفر عام بات ہے، لیکن اس کامیابی نے اس میدان میں نئی راہیں کھولیں اور دنیا کو ایک دوسرے کے قریب لانے میں اہم کردار ادا کیا۔

سائنسدانوں کو نئی دنیا کا سراغ مل گیاسائنس کی دنیا میں بعض اوقات ایسی دریافتیں سامنے آتی ہیں جو نہ صرف موجودہ نظریات کو چیلنج کرتی ہیں بلکہ انسان کے علم کی نئی راہیں بھی کھول دیتی ہیں۔ حال ہی میں سائنسدانوں نے ایک ایسے پراسرار مادے کا مطالعہ کیا جسے پہلےQuantum Spin Liquid سمجھا جا رہا تھا مگر مزید تحقیق کے بعد معلوم ہوا کہ یہ مادہ حقیقت میں کچھ اور ہی ہے۔ اس حیران کن انکشاف نے طبیعیات کے ماہرین کو نئی سوچ پر مجبور کر دیا ہے کیونکہ یہ دریافت مستقبل میں کوانٹم کمپیوٹنگ اور مادے کی بنیادی ساخت کو سمجھنے میں اہم کردار ادا کر سکتی ہے۔کوانٹم سپن لیکوئیڈ کیاہے؟عام طور پر جب کسی مادے کو بہت زیادہ ٹھنڈا کیا جاتا ہے تو اس کے ذرات ایک منظم ترتیب اختیار کر لیتے ہیں۔ مثال کے طور پر مقناطیسی مادوں میں ایٹموں کے چھوٹے مقناطیسی حصے، جنہیں ''سپن ‘‘کہا جاتا ہے، ایک خاص سمت میں ترتیب پا لیتے ہیں۔ لیکن کوانٹم سپن لیکوئیڈ ایک ایسی عجیب حالت ہے جس میں یہ سپن کبھی مکمل طور پر منظم نہیں ہوتے چاہے درجہ حرارت مطلق صفر کے قریب ہی کیوں نہ پہنچ جائے۔اس حالت میں ذرات مسلسل حرکت اور تبدیلی میں رہتے ہیں۔ یہی وجہ ہے کہ سائنسدان اس مادے کو غیر معمولی اہمیت دیتے ہیں کیونکہ اس میں موجود کوانٹم خصوصیات مستقبل کے طاقتور کوانٹم کمپیوٹروں کی بنیاد بن سکتی ہیں۔ کئی برسوں سے دنیا بھر کے سائنسدان ایسے مادوں کی تلاش میں ہیں جو حقیقی کوانٹم سپن لیکوئیڈ ثابت ہو سکیں۔سائنسدانوں کی ابتدائی غلط فہمیحالیہ تحقیق میں جس مادے کا مطالعہ کیا گیا اس میں ابتدا میں وہ تمام نشانیاں موجود تھیں جو ایک کوانٹم سپن لیکوئیڈ میں پائی جاتی ہیں۔ اس مادے میں مقناطیسی ترتیب موجود نہیں تھی، اس کے سپن مسلسل تبدیل ہو رہے تھے اور اس کی توانائی کے نمونے بھی غیر معمولی تھے۔ انہی خصوصیات کی بنیاد پر سائنسدانوں نے اسے ایک نایاب کوانٹم مادہ قرار دیا۔لیکن جب اس مادے کا مزید باریک بینی سے جائزہ لیا گیا، خاص طور پر جدید نیوٹران تجربات کے ذریعے، تو نتائج نے سب کو حیران کر دیا۔ تحقیق سے معلوم ہوا کہ اس مادے کی پراسرار خصوصیات دراصل خالص کوانٹم اثرات کی وجہ سے نہیں تھیں بلکہ یہ مادہ کئی مختلف مقناطیسی حالتوں کے درمیان ایک پیچیدہ الجھن میں پھنسا ہوا تھا۔یوں سائنسدانوں کو احساس ہوا کہ وہ جسے کوانٹم سپن لیکوئیڈ سمجھ رہے تھے وہ دراصل مادے کی ایک بالکل نئی قسم ہو سکتی ہے، جس کے بارے میں پہلے کوئی واضح تصور موجود نہیں تھا۔نئی دریافت کیوں اہم ہے؟یہ دریافت اس لیے غیر معمولی اہمیت رکھتی ہے کیونکہ اس سے طبیعیات کے کئی پرانے نظریات متاثر ہو سکتے ہیں۔ اگر کچھ مادے صرف بظاہر کوانٹم سپن لیکوئیڈ جیسے نظر آتے ہیں لیکن حقیقت میں ان کی نوعیت مختلف ہے تو اس کا مطلب یہ ہے کہ سائنسدانوں کو اپنی تحقیق کے طریقوں پر دوبارہ غور کرنا ہوگا۔اس نئی حالتِ مادہ کی دریافت سے یہ امکان بھی پیدا ہوا ہے کہ کائنات میں ایسے کئی اور مادے موجود ہو سکتے ہیں جنہیں ابھی تک صحیح طور پر سمجھا نہیں جا سکا۔ یہ تحقیق مستقبل میں نئی ٹیکنالوجیز کی راہ ہموار کر سکتی ہے خاص طور پر کوانٹم کمپیوٹنگ کے میدان میں۔کوانٹم کمپیوٹر عام کمپیوٹروں کے مقابلے میں کہیں زیادہ طاقتور سمجھے جاتے ہیں۔ اگر سائنسدان ایسے مادوں کو بہتر انداز میں سمجھنے میں کامیاب ہو جاتے ہیں جو غیر معمولی کوانٹم خصوصیات رکھتے ہیں تو اس سے ایسے کمپیوٹر بنانا ممکن ہو سکتا ہے جو پیچیدہ مسائل کو چند سیکنڈ میں حل کر سکیں۔مستقبل کی سائنس کیلئے نیا دروازہسائنس میں اکثر ایسا ہوتا ہے کہ ایک دریافت کئی نئے سوالات کو جنم دیتی ہے۔ یہی معاملہ اس پراسرار مادے کے ساتھ بھی پیش آیا ہے۔ اب سائنسدان یہ جاننے کی کوشش کر رہے ہیں کہ آیا یہ واقعی مادے کی ایک نئی حالت ہے یا پھر پہلے سے موجود نظریات کی کوئی غیر متوقع شکل۔اس تحقیق نے ایک اور اہم حقیقت بھی واضح کی ہے کہ قدرت کے راز ہماری توقعات سے کہیں زیادہ پیچیدہ ہیں۔ بعض اوقات جو چیز ہمیں ایک خاص شکل میں نظر آتی ہے وہ حقیقت میں اس سے بالکل مختلف ہوتی ہے۔ یہی حیرت اور تجسس سائنس کو آگے بڑھاتے ہیں۔ماہرین کا خیال ہے کہ آنے والے برسوں میں مزید تجربات اور جدید آلات کی مدد سے اس نئی دریافت کے بارے میں زیادہ معلومات حاصل کی جا سکیں گی۔ اگر یہ تحقیق کامیاب رہی تو ممکن ہے کہ انسان مادے اور توانائی کی دنیا کو ایک بالکل نئے زاویے سے دیکھنے لگے۔پراسرار کوانٹم مادّے کے بارے میں حالیہ تحقیق نے سائنس دانوں کو حیرت میں ڈال دیا ہے۔ جس مادّے کو پہلے ایک نایاب کوانٹم اسپن لیکوئیڈ سمجھا جا رہا تھا، وہ اب ایک نئی اور پیچیدہ حقیقت کے طور پر سامنے آ رہا ہے۔ یہ دریافت نہ صرف طبیعیات کے میدان میں ایک بڑی پیش رفت ہے بلکہ مستقبل کی ٹیکنالوجی، خصوصاً کوانٹم کمپیوٹنگ، کے لیے بھی امید کی نئی کرن بن سکتی ہے۔سائنس کی خوبصورتی یہی ہے کہ ہر نئی تحقیق انسان کے علم میں اضافہ کرتی ہے اور ہمیں یہ احساس دلاتی ہے کہ کائنات ابھی تک بے شمار راز اپنے اندر چھپائے ہوئے ہے۔