چیمپئنزکپ:کوالیفائرمیں لائنزکوشکست ،مارخورز فائنل میں
راولپنڈی(سپورٹس رپورٹر)یو ایم ٹی مارخورز نے بحریہ ٹاؤن چیمپئنز ٹی ٹونٹی کپ کے کوالیفائر میں نورپور لائنز کو 29 رنز سے شکست دے دی۔
اب 25 دسمبر کو فائنل میں مارخورز کا مقابلہ الائیڈ بینک سٹالینز سے ہوگا۔پنڈی کرکٹ سٹیڈیم میں کھیلے گئے کوالیفائر میں لائنز نے ٹاس جیت کر مارخورز کو پہلے بیٹنگ دی جس نے 20 اوورز میں 6 وکٹوں پر 180 رنز بنائے ۔نورپور لائنز جواب میں 9 وکٹوں پر151 رنز بنانے میں کامیاب ہوسکی۔ مارخورز کی اننگز میں فخر زمان نے 64 گیندوں پر 89 رنز بنائے جس میں 9 چوکے اور5 چھکے شامل تھے ۔ یہ ان کی ٹی ٹونٹی مقابلوں میں مجموعی طور پر 47 ویں نصف سنچری تھی۔آفاق آفریدی نے عمدہ بولنگ کرتے ہوئے ابتدائی تین بیٹرز خواجہ نافع ( صفر ) محمد فیضان ( صفر ) اورعمران رندھاوا ( ایک ) کی وکٹیں حاصل کیں ،مارخورز کی مشکلات اسوقت بڑھ گئیں جب شہاب خان نے کپتان افتخار احمد اور محمد نواز کی وکٹیں حاصل کرڈالیں اسوقت مجموعی سکور5 وکٹوں پر 88 رنز تھا۔فخرزمان اور عبدالصمد نے چھٹی وکٹ کی شراکت میں 82 رنز کا اضافہ کیا۔ عبدالصمد نے 41 رنز بنائے اور آؤٹ نہیں ہوئے ۔ نورپورلائنز نے 181 رنز کے ہدف کے تعاقب میں صرف9 رنز پر امام الحق اور عمیر بن یوسف کی وکٹیں گنوادیں جس کے بعد حسن نواز اور محمد طحہ نے تیسری وکٹ کی شراکت میں 62 رنز کا اضافہ کیا لیکن حسن نواز 27 اور محمد طحہ 4 چھکوں اور ایک چوکے کی مدد سے 44 رنز بناکر آؤٹ ہوئے تو میچ پر مارخورز کی گرفت مضبوط ہوتی چلی گئی۔آنے والے بیٹرز میں روحیل نذیر 12 ، شہاب خان4 ،عامر یامین صفر، شاہد عزیز4 اور خوشدل شاہ 8 رنز پر آؤٹ ہوگئے ۔عاکف جاوید نے 22 رنز دے کر 3 وکٹیں حاصل کیں۔ نثار احمد نے دو کھلاڑی آؤٹ کیے ۔فخر زمان پلیئر آف دی میچ قرار پائے ۔
