ایئرپورٹ پر منشیات اسمگلنگ کی بڑی کوشش ناکام، میاں بیوی گرفتار، 580 گرام چرس برآمد
دونوں ملزمان دبئی روانہ ہونے والے تھے ،لکڑی کے دو زیورات کے ڈبوں میں منشیات چھپانے کے لیے خصوصی طور پر خفیہ خانے بنائے گئے تھے ،انسدادِ منشیات ایکٹ کے تحت مقدمہ درج
کراچی (اسٹاف رپورٹر،این این آئی)پاکستان کسٹمز کے حکام نے جناح انٹرنیشنل ایئرپورٹ، کراچی پر تقریباً 580 گرام چرس بیرونِ ملک اسمگل کرنے کی بڑی کوشش ناکام بناتے ہوئے دبئی جانے والے دو مسافروں میاں بیوی کو گرفتار کر لیا۔ 17 ستمبر 2026ء کو تقریباً رات 10 بجے انٹرنیشنل ڈیپارچرز کے مقام پر تعینات کسٹمز مشین آپریٹر نے معمول کی اسکریننگ کے دوران دبئی، متحدہ عرب امارات جانے والے دو مسافروں، میاں بیوی کے سامان کو مشکوک قرار دیا۔ دونوں مسافر فلائی دبئی کی پرواز FZ-330 کے ذریعے دبئی روانہ ہونے والے تھے ۔اسکریننگ کے دوران مشکوک قرار دیے جانے والے سامان کو تفصیلی جانچ کے لیے منتقل کیا گیا۔ دورانِ تلاشی کسٹمز حکام نے لکڑی کے دو زیورات کے ڈبے برآمد کیے ، جن میں منشیات چھپانے کے لیے خصوصی طور پر خفیہ خانے بنائے گئے تھے۔
مزید جانچ کے نتیجے میں ہر ڈبے سے تقریباً 290 گرام (مجموعی وزن) چرس برآمد ہوئی، جس سے برآمد شدہ چرس کی کل مقدار تقریباً 580 گرام (مجموعی وزن) بنتی ہے ۔برآمد شدہ منشیات کی مالیت تقریباً 20 لاکھ روپے بتائی گئی ہے ۔برآمد شدہ منشیات کو قانون کی متعلقہ دفعات کے تحت قبضے میں لے لیا گیا ہے ، جبکہ ملزمان کے خلاف انسدادِ منشیات ایکٹ کی قابلِ اطلاق دفعات کے تحت ایف آئی آر درج کر لی گئی ہے ۔ واقعے کی مزید تفتیش جاری ہے تاکہ اسمگلنگ کی کوشش کے مکمل حالات کا تعین کیا جا سکے اور ملوث دیگر افراد کا سراغ لگایا جا سکے ۔
Comments / رائے دیں
Share your thoughts. Comments are reviewed before they appear publicly.
Approved Comments