جب تک زندہ ہوں تحریک انصاف کے ساتھ رہوں گا:گنڈاپور
پشاور(مانیٹرنگ ڈیسک) سابق وزیراعلیٰ خیبرپختونخوا علی امین گنڈاپور نے گورنر پنجاب سے ملاقات پر افواہوں کو پروپیگنڈا قرار دیتے ہوئے کہا ہے کہ جب تک زندہ ہوں تحریک انصاف کے ساتھ رہوں گا، میں کسی سے نہیں ڈرتا، اگر کہیں جاؤں گا تو خود بتاؤں گا۔
ڈیرہ میں میڈیا سے بات کرتے ہوئے علی امین نے کہا کہ تحریک انصاف کے خلاف فسطائیتآج کی نہیں ہے بلکہ ایک عرصے سے جاری ہے اور عمران خان ناحق قید اور جھوٹے و جعلی مقدمات کا سامنا ہے ۔انہوں نے کہا کہ عمران خان کو انصاف نہیں مل رہا، آئین اور قانون کا مذاق بنایا جا رہا ہے ، ان تمام غیر جمہوری اقدامات کی سخت الفاظ میں مذمت کرتا ہوں، اگر فیملی ملاقات طے ہے تو عمران خان سے ملاقات کرائی جائے ۔ان کا کہنا تھا کہ سہیل آفریدی میرا بھائی ہے اور اب وہ وزیراعلیٰ ہے ، میرے دور کے تمام منصوبے آج بھی جاری ہیں۔ان کا کہنا تھا کہ میلے میں یوسف رضا گیلانی اور گورنر پنجاب سے ملاقات پر بلاجواز پروپیگنڈا کیا گیا، ڈرامے چھوڑ کر عوام کی خدمت پر توجہ دی جائے ۔گنڈاپور نے کہا کہ میں عمران خان کے ساتھ کھڑا ہوں اور کھڑا رہوں گا۔
