آئی ایم ایف کا تیسرا سہ ماہی جائزہ

آئی ایم ایف کے ایگزیکٹو بورڈ نے پاکستان کی معیشت کی کارکردگی کے بارے میں تیسرا سہ ماہی جائزہ 27جون کو مکمل کر لیا۔ حکومت آئی ایم ایف کے مقرر کردہ کارکردگی معیار کے حصول میں ناکام رہی؛ تاہم آئی ایم ایف نے (Waiver)استثنا دے کر 556.9ارب ڈالر کی اگلی قسط جاری کر دی ہے۔ آئی ایم ایف جب کسی ملک کو بیرونی ادائیگی کے خسارے پر قابو پانے کے لیے قرض دیتا ہے تو اس کا اہم کام یہ ہوتا ہے کہ ایسے ملک کو صائب پالیسی مشورے دے اور عارضی مالی امداد مہیا کر کے سٹرکچرل توازن بحال کرنے اور مشکل پالیسی فیصلوں کی تکلیف کم کرنے میں مدد دے۔اس قسم کے پروگرام کے ساتھ سخت شرائط منسلک ہوتی ہیں۔2008ء میں آئی ایم ایف نے پاکستان کو سٹینڈ بائی پروگرام کے تحت 11ارب ڈالر کا قرض دیا تھا‘جس کا بڑا حصہ پیشگی ادا کر دیا گیا تھا۔جب سابق حکومت سٹرکچرل ریفارمز پر عملدرآمد کرنے میں ناکام رہی تو آئی ایم ایف نے سٹینڈ بائی پروگرام ختم کردیا تھا۔اس وقت تک پاکستان قرض کا بڑا حصہ حاصل کر چکا تھا اور نادہندگی سے بچنے کے لیے زرمبادلہ کے کافی ذخائر جمع ہو چکے تھے۔

2013ء کے الیکشن کے بعد ن لیگ کی حکومت اقتدار میں آئی تو آئی ایم ایف نے نئی حکومت کے ساتھ بھی نرم شرائط پر ای ایف ایف کے تحت قرض دینے کا معاہدہ کر لیا تاکہ حکومت زرمبادلہ کے ذخائر جمع کر کے نادہندگی سے بچ سکے اور آئی ایم ایف کے قرض کی واپسی یقینی ہو سکے ۔یہ حکومت کے مفاد میں بھی تھا کہ وہ مشکل پالیسی فیصلے کیے بغیر نادہندگی سے بچ گئی۔ آئی ایم ایف نے پاکستان کے ساتھ ای ایف ایف پروگرام کے تحت سڑکچرل معاشی ریفارمز کے بغیر قرض کا معاہدہ کیا‘ جو پاکستان کوبیرونی ادائیگیوں کے بحران سے نکالنے کے لیے ضروری تھیں۔ آئی ایم ایف کے سٹاف نے جھوٹے اعداد و شمار کا سہارا لے کر ایگزیکٹو بورڈ کو ہر قسم کے استثنا کی سفارش کی جبکہ حکومت پروگرام کی کم سے کم شرائط پر عملدرآمد کرنے میں بھی ناکام رہی تھی۔ جب آئی ایم ایف سہ ماہی اہداف اور بنچ مارک کی تعمیل میں ناکامی پر بار بار استثنادیتا ہے تو اس بات کا خدشہ ہوتا ہے کہ جب آئی ایم ایف اپنے قرض کی واپسی یقینی بنانے کے بعد معاہدہ ختم کر دے گاتو معیشت کے انہدام کا حقیقی خطرہ پیدا ہو جائے گا۔ آئی ایم ایف کے پالیسی بیان میں کہا گیا ہے کہ سٹیٹ بینک کے خالص ملکی اثاثوں کا ہدف حاصل ہو سکا ہے اور نہ ہی زرمبادلہ کا ہدف جبکہ مالیاتی خسارہ بھی ہدف سے بڑھ گیا ہے۔کارکردگی کے ان تینوں معیارات کی تعمیل نہ ہونے کے باوجود آئی ایم ایف نے استثنادے دیا ہے۔ ان کے علاوہ سٹیٹ بینک کا خود مختاری دینے کے لیے قانون سازی کرنے کا سٹرکچرل بنچ مارک دیا گیا تھا۔اس کا مقصد قیمتوں میں استحکام پیدا کرنے کے لیے سٹیٹ بینک کے اندرونی کنٹرول فریم ورک کو مضبوط اور اچھی حکمرانی کو یقینی بنانا تھا۔اس سلسلے میں بھی کوئی پیشرفت نہیں ہو سکی۔ آئی ایم ایف کے بورڈ کی میٹنگ کے بعد جو بیان جاری کیا گیا ہے اس میں کئی اعتراضات بھی پیش کئے گئے ہیں۔

معیشت میں پائے جانیوالے رجحانا ت کے بارے میں کہا گیا ہے کہ کلیاتی معاشی مظاہر میں بہتری کے آثار ہیںلیکن معیشت کو ابھی خطرات درپیش ہیں۔معیشت میں جو کمزور سی بحالی نظر آ رہی ہے‘ اس کی حفاظت کے لیے کوششیں جاری رکھنے کی ضرورت ہے۔مالیاتی پوزیشن کسی حد تک تسلی بخش ہے‘ لیکن ٹیکس کا دائرہ کار وسیع کرنے اور ٹیکس جی ڈی پی تناسب میں اضافے کے لیے کی جانیوالی کوششوں کو جو دوچند کرنے کی ضرورت ہے ۔زرمبادلہ کے ذخائر میں اضافہ کرنے کے لیے کی جانیوالی کوششیں رنگ لا رہی ہیں۔ وہ جاری رہنی چاہئیں۔ ایکسچینج ریٹ کو مزید لچکدار بنانا ہو گا۔زری پالیسی کے ذریعے افراط زر پر قابو پانے کے لیے پالیسی ریٹ میں اضافہ کرنا ہو گا۔ ملک کا بینکنگ سیکٹر بڑی حد تک مستحکم اور نفع بخش ہے‘ لیکن چند بینکوں نے ابھی تک کم سے کم کیپٹل (Capital Adequacy)کی شرط پوری نہیں کی۔انہیں ایسا کرنے کا پابند بنایا جائے۔انرجی پالیسی ریفارمز پسندیدہ اقدام ہے تاہم پاور سیکٹر کے ریگولیٹری فریم ورک میں انتظامی رکاوٹوں پر قابو پانے کی ضرورت ہے اور انرجی سیکٹر کی کمپنیوں کی کارکردگی میں بہتری لانے کی ضرورت ہے۔ حکومتی کنٹرول میں چلنے والے اداروں کو ری سٹر کچر کر کے ان کی کارکردگی میں بہتر لائی جائے ۔ تجارتی پالیسی اور کاروباری ماحول کو سازگار بنانے کے لیے جو کوششیں کی جا رہی ہیں انہیں جاری رکھا جائے۔ معاشی ترقی کی رفتار تیز کرنے کے لیے ٹھوس اور نتیجہ خیز کارروائی کی ضرورت ہے۔

آئی ایم ایف کے پالیسی بیان میں جو زبان استعمال کی گئی ہے۔اس سے ایک عام آدمی بھی یہ نتیجہ اخذ کر سکتا ہے کہ یہ ایک قسم کی وارننگ ہے کہ ای ایف ایف پروگرام جاری رکھنے کے لیے آئی ایم ایف کی شرائط پر عملدرآمد یقینی بنایا جائے‘ ورنہ یہ پروگرام منسوخ کیا جا سکتا ہے۔اس پروگرام کا جاری رہنا حکومت کے مفاد میں ہے کیونکہ پاکستان آئی ایم ایف سے زرمبادلہ کی خطیر رقم مارکیٹ ریٹ سے کم نرخوں پر حاصل کر سکے گا۔اس سے پاکستان کے زرمبادلہ کے ذخائر میں خاطر خواہ اضافہ ہو گا۔روپے کی قدر مستحکم رہے گی۔سرمایہ کاروں اور کریڈٹ ریٹنگ ایجنسیوں کے لیے پاکستان کی معیشت کے مثبت پہلو اجاگر ہو سکیں گے‘ اگر کارکردگی کے معیار کے حصول میں ناکامی پر Waiversنہ دیا جاتا تو قرض کی قسط جاری نہ ہوتی یا آئی ایم ایف سے پاکستان کو فنڈز کی آمد ممکن نہ ہو تی۔ جو لوگ آئی ایم ایف بورڈ کے کام کرنے کے طریقے سے واقف ہیں وہ جانتے ہیں کہ معیشت کی کمزوریوں کو نظر انداز کر کے استثناترقی یافتہ ممالک کے ہمدردانہ رویے کی وجہ سے ہی دیے جاتے ہیں۔بہرحال یہ بات روز روشن کی طرح عیاں ہے کہ حکومت کو ای ایف ایف پروگرام جاری رکھنے اور آئی ایم ایف سے فنڈز کی آمد کو یقینی بنانے کے لیے سخت محنت کرنا اور مشکل فیصلے لینا ہوں گے۔

حکومت کو چاہیے کہ وہ اس بات کو یقینی بنائے کہ آئندہ استثنا کی رعایت کی ضرورت نہ پڑے۔ اس کا مطلب یہ ہے کہ اگر ترقی یافتہ ممالک بالخصوص یو ایس اے کی حمایت حاصل نہ ہوئی تو ایسی رعایت دستیاب نہیں ہو گی۔مطلوبہ اقدامات کی فہرست کافی لمبی ہے اور ان پر عملدرآمد بھی مشکل ہو گا۔مثال کے طور پر پالیسی بیان میں کہا گیا ہے کہ پالیسی ریٹ کا تعین اس طرح کیا جائے کہ اس سے افراط زر کم کرنے میں مدد ملے اور ایکسچینج ریٹ کو مزید لچکدار بنا کر زرمبادلہ کے ذخائر میں اضافہ کیا جائے۔اس کا صاف مطلب یہ ہے کہ پالیسی ریٹ میں اضافہ کرنا ہو گا اور منڈی کی قوتوں کو کرنسی کی قدر کا تعین کرنے دیں‘ یعنی کرنسی کی قدر کم ہونے دیں۔ان اقدامات کے بارے میں حکومتی ہچکچاہٹ بالکل واضح ہے ۔مالیاتی محاذ پر آئی ایم ایف چاہتا ہے کہ ٹیکس کا دائرہ کار وسیع کیا جائے اور ٹیکس جی ڈی پی تناسب میں اضافہ کیا جائے۔ ایس آر او کلچر ختم کر کے ٹیکس چھوٹیں اور رعایتیں ختم کی جائیں۔

بدقسمتی کی بات یہ ہے کہ حکومت ان اہم معاملات میں تذبذب کا شکار ہے۔دہشت گردی کے خلاف لڑی جانے والی جنگ اور آئی ڈی پیز کی بحالی کے لیے مزید وسائل کی ضرورت ہو گی۔اس کے علاوہ حکومت سیاسی مقاصد کے لیے پروقار میگا پروجیکٹس اور دکھائی دینے والے منصوبے شروع کر رہی ہے‘ جبکہ سماجی سیکٹرز میں وسائل کی شدید ضرورت ہے۔بڑھتی ہوئی سیاسی مزاحمت کی وجہ سے مالیاتی محاذ پر مشکل فیصلے لینا حکومت کے لیے اور بھی دشوار ہو گیا ہے۔ان حالات میں ای ایف ایف پروگرام کا جاری رہنا خطرے میں ہے‘ اگر حکومت مالیاتی محاذ پر کوئی بڑا اقدام نہیں کرتی اور اپوزیشن معاشی اصلاحات کے لیے حکومت سے تعاون نہیں کرتی توہر کسی کو اس بات کا احساس ہے کہ یہ بہت ہی مشکل مرحلہ ہوگا۔ملک کی معاشی صورتحال میں بہتری لانے کے لیے مشکل معاشی اصلاحات کی ضرورت ہے۔ سیاسی مصلحتوں کو بالائے طاق رکھ کر سخت اقدامات پر عملدرآمد کرنا ہو گا۔