بیتے ہوئے دن یا د آتے ہیں…(2)

شوکت جاوید

(سابق انسپکٹر جنرل پولیس)

اُس وقت کے وزیراعظم ذوالفقار علی بھٹو کی سکیورٹی پہ مامور ٹیم کو ایک تربیتی کورس کے حوالے سے چراٹ بھیج دیا گیا اور یوں تین ماہ کے لیے شوکت جاوید کو ذوالفقار علی بھٹو کی رفاقت و قربت میسر آئی ۔ میری پوسٹنگ اُن کے ساتھ کر دی گئی اور اِس عرصہ میں انتہائی قریب سے اس عہد آفریں شخص کو رموز ِ مملکت طے کرتے ہوئے دیکھنے کا موقع ملا۔ لیکن ''بدلتا ہے رنگ آسماں کیسے کیسے‘‘ابھی اِس ڈیوٹی سے واپس آئے چند ہی ماہ گزرے تھے کہ ملک میں ایک تحریک نے جنم لیا اور بھٹو اقتدار سے الگ ہو کر جیل جا پہنچے ۔نواب محمد احمد خان قتل کیس میں اب اُن کی سکیورٹی پر مامور شوکت جاوید انہیں جیل سے لاہور ہائی کورٹ لاتا‘ اُن کے ساتھ بیٹھتا اور پھر واپس عدالت سے جیل لے جاتا۔ اقتدار اور اسیر ی‘ دونوں حکایتیںانتہائی سبق آموز اور تاریخ کا انمٹ حصہ ہیں۔

بعدازاں میں بحیثیت اے ایس پی ڈی جی خان ، پاکپتن اور سرگودھا اپنی ذمہ داریوں سے عہدہ برآ ہوتا رہا۔ تاہم ایک بات بہت بڑا سچ ہے کہ ہر جگہ ایک خوبصورت کہانی اور یادوں کی بارات چھوڑ آیا ۔ پلٹ کر دیکھوں تو فخر محسوس کر تاہوں کہ میں نے شہر شہر ، نگر ی نگری اور کوچہ کوچہ انسانوں کے تحفظ، جرائم کی بیخ کنی اور قانون کی عمل داری کو نشانِ منزل بنایا ۔ 1981ء میں ایس پی کی حیثیت سے وفاقی دارالحکومت اسلام آباد جا پہنچا‘ جہاں اسلام آباد پولیس کی خشتِ اول رکھی گئی ۔ اِس سپہ کی تیاری اور تربیت کا کام دو سال تک انجام دیا۔ اسے مبالغہ نہ جانیے بلکہ یہ ایک کھرا سچ ہے کہ اس وقت کے صدرِ مملکت اسلام آباد پولیس کو ملک بھر میں مثال کے طور پر پیش کیا کرتے تھے۔ مجھے اپنے اِس پیشہ ورانہ کردار پر ہمیشہ بے پایاں فخر رہا ہے ۔ دو سال کے بعد مزید ترقی پائی اور ایس ایس پی اسلام آباد بنا دیا گیااور اس عہدہ پرچار سال فائز رہا۔ اسلام آباد پولیس کی ابتدا سے لے کر تا حال کوئی ایس ایس پی اسلام آباد میں اتنی طویل مدت تک فائز نہ رہا ۔ اسلام آباد پولیس سے وابستگی کے دوران اُس وقت کے فوجی حکمران جنرل ضیاء الحق اور منتخب وزیر اعظم محمد خان جونیجو کو قریب سے دیکھنے اور کام کرنے کا موقع ملا ۔

1987ء میں پنجاب واپسی ہوئی ۔ اُن دنوں پنجا ب کے وزیرِ اعلیٰ پاکستان کے موجودہ وزیر اعظم میاں محمد نواز شریف تھے جنہوں نے مجھے پہلے جہلم اور چند ماہ بعد گوجرانوالہ پولیس کا ضلعی سربراہ مقرر کیا۔ یہ اُن دنوں کا قصہ ہے جب ملک میں مذہبی انتہا پسندی سر اُٹھا رہی تھی‘ لیکن یہ اللہ رب العزت کا خصوصی کرم تھا کہ اُس نے طارق پرویز ، طارق کھوسہ، ملک اقبال ، اشرف مارتھ شہید اور مجھ جیسے پولیس افسران کے دلوں میں ایمان کا وہ جذبہ موجزن کر دیا جس کے نتیجے میں ممولے شہبازوں سے ٹکرا جاتے ہیں۔ اُسی زمانے میں سی آئی ڈی کا شعبہ معرضِ وجودمیں آیا اور سچ تو یہ ہے کہ مذہبی دہشت گردی اور منافرت کی آنکھوں میں آنکھیں ڈال کر زندہ رہنے کا جذبہ بھی ہمیں یہیں عطا ہوا۔ دہشتگردی کے بڑے بڑے واقعات اور مجرموں کے ٹھکانو ں تک پہنچنے کے لیے ہم نے ایمان سے تازگی حاصل کی اور اس طرح دہشتگردوں کو نکیل ڈالنے کی دیانتدارانہ کو ششیں اور کاوشیں کیں۔

میں لاہور اور ملتان کے ڈی آئی جی اور ریجنل پولیس افسر کے علاوہ مختلف عہدوں پر فرائض ادا کرتا رہا۔ اس عرصہ میں مجھے 5سال تک آئی بی جیسے حساس ادارے میں پنجاب کے سربراہ کے طور پر کام کرنے کا موقع ملا۔ یہ ذمہ داریاں انتہائی دلچسپ ہونے کے ساتھ ساتھ انتہائی نازک بھی تھیں۔بہت سے قد آور لوگوں کے شب و روز اور اُن سے منسلک حکایات دیکھنے کا موقع ملتا رہا۔ اسی عرصہ میں دہشتگردی کے خلاف سفر بھی جاری و ساری رہا۔ میں5سال تک اِ ن ذمہ داریوں سے عہدہ برآ ہوتا رہا۔ اور بعد ازاں آئی جی بننے سے قبل کچھ ماہ کے لیے آئی بی کے ڈائریکٹر جنرل کی حیثیت سے بھی کام کرتا رہا۔

2008ء میں میاں شہباز شریف نے پنجاب کے وزیرِ اعلیٰ کی ذمہ داریاں سنبھالیںاور مجھے پنجاب کا انسپکٹر جنرل پولیس بنا دیا گیا اور اپنی ریٹائرمنٹ تک یہ ذمہ داریاں ادا کرتا رہا۔ آئی جی پنجاب بننا اور 22واں گریڈ حاصل کرنا ہر پولیس افسر کا خواب ہوتا ہے اوراللہ رب العزت نے مجھے اِ س خواب کی تعبیر عطا کی ۔

معزز مہمانان ِ گرامی!

اس موقع پر میں آپ سے میاں شہبازشریف اور میاں نواز شریف کے ساتھ آئی جی مامور ہونے کے بعد ہونے والی ایک نشست کا حوالہ ضرور دینا چاہوں گا ۔ جس میں‘ میں نے ان دونوں بھائیوں سے مخاطب ہو کر کہا کہ میرا آئی جی پنجاب کے عہدہ پر فائز ہونا صرف اور صرف اللہ تعالیٰ کا خصوصی کر م اور آپ دونوں بھائیوں کا حُسنِ نظر ہے ۔ تو میاں نواز شریف یکدم بول اُٹھے ''شوکت صاحب یہیں رُک جائیے یہ صرف اور صرف اللہ ہی کا کرم ہے ۔ جبکہ ہمارا حصہ رائی برابر بھی نہیں۔‘‘ میں یہ سن کر بے حد متاثر ہوا اور مجھے اک نیا حوصلہ ، عزم ، ولولہ اور جذبہ میسر آیا ۔ راہِ مستقیم مجھے نشانِ منزل نظر آنے لگی اور سچ تو یہ ہے کہ تین ماہ بعد جب وزیرِ اعلیٰ اور اُن کی کابینہ نے میری کارکردگی کا جائزہ لیا‘ تو تمام یک زبان تھے کہ ہم صحیح راستے کی جانب چل نکلے ہیں۔ (جاری)