حکومتی اقدامات کے مثبت ثمرات ملناشروع:آئی ایم ایف
شہبازشریف جب کسی کام کی ٹھان لیں تومکمل کرکے چھوڑتے :کرسٹالینا جارجیوا عوام کی زندگی میں مثبت تبدیلی کیلئے وسائل خرچ،پہلی مرتبہ بجٹ ڈسلپن دیکھا
ڈیووس (اے پی پی) آئی ایم ایف کی منیجنگ ڈائریکٹر کرسٹالینا جارجیوا نے پاکستان میں معاشی اصلاحات کو سراہتے ہوئے کہا ہے کہ پاکستانی حکومت سنجیدگی سے جو اقدامات اور اصلاحات کررہی ہے اسکے مثبت ثمرات سامنے آرہے ہیں ، پہلی مرتبہ بجٹ ڈسپلن دیکھنے میں آیا اور عوام کی زندگی میں مثبت تبدیلی کیلئے وسائل خرچ کئے جارہے ہیں۔ ڈیووس میں عالمی اقتصادی فورم کے موقع پر میڈیا سے گفتگو کرتے ہوئے انہوں نے وزیرِ اعظم شہباز شریف کی زیر قیادت حکومت کی معاشی اصلاحات کو سراہا اور کہا کہ وہ وزیرِ اعظم شہباز شریف کی تہہ دل سے عزت کرتی ہیں ، وہ پاکستان میں مثبت تبدیلی و ترقی کیلئے سنجیدہ ہیں وہ (شہباز شریف )جب کسی کام کو کرنے کی ٹھان لیں تو پھر اسے مکمل کرکے ہی چھوڑتے ہیں۔ کرسٹالینا جارجیوا نے کہا کہ انکی وزیر اعظم شہباز شریف سے متعدد بار ملاقاتیں ہوئی ہیں جن میں پہلے سے متعین اہداف کے حصول اور ترقی کے مزید اہداف پر گفتگو ہوتی ہے ۔ انہوں نے کہا کہ وہ وزیرِ اعظم شہباز شریف اور انکی کابینہ کی پاکستان کی ترقی کیلئے سنجیدگی اور پاکستان کی بہتری کیلئے مشکل اصلاحات کے ایجنڈے کے نفاذ کو انتہائی قدر کی نگاہ سے دیکھتی ہیں، کرسٹالینا جارجیوا نے کہا کہ آئی ایم ایف پاکستان کے ساتھ ایک عرصے سے مثبت انداز میں کام کر رہا ہے ۔
