سوئی گیس بلز نے کمر توڑ کر رکھ دی
کراچی (آئی این پی)متحدہ قومی موومنٹ پاکستان کے رکن قومی اسمبلی فاروق ستارنے سوئی سدرن گیس کمپنی کی جانب سے زائد بل اور ٹیرف میں اضافے کو مسترد کرتے ہوئے تشویش کا اظہار کیا۔
جاری بیان میں حق پرست اراکینِ صوبائی اسمبلی کا کہنا ہے کہ موسمِ سرما کی آمد سے قبل ہی دن کے اوقات میں بھی بالخصوص مضافاتی علاقوں میں گیس لوڈشیڈنگ شروع کر دی گئی ہے جو کہ گھریلو اور صنعتی صارفین کو مفلوج کر دینے کے مترادف ہے اُس پر خود ساختہ بنائے ٹیرف کی مد میں جبری وصولیوں نے غریب عوام کی کمر توڑ کر رکھ دی ہے ۔اراکینِ صوبائی اسمبلی کا مزید کہنا تھا کہ محصولات کی مد میں کھربوں روپے قومی خزانے میں جمع کروانے والے شہر کے ساتھ سلوک ناروا رکھے جانا سمجھ سے بالاتر ہے معاشی دارالخلافہ میں بنیادی ضروریات زندگی کو غریب کی دسترس سے دور کرنا کسی مشترکہ اتفاق رائے کا شاخسانہ معلوم ہوتا ہے ۔
