پاکستانی بیٹرز کاسٹرائیک ریٹ پریشان کن :شاہدآفریدی
کراچی (سپورٹس ڈیسک ) ٹی ٹونٹی ورلڈکپ 2024 کے ایمبیسیڈر اور پاکستان ٹیم کے سابق کپتان شاہد آفریدی نے کہا ہے کہ پاکستان کا بولنگ اٹیک بہترین اور بیٹنگ میں بھی سٹرنتھ ہے لیکن تنگ کرنے والی چیز سٹرائیک ریٹ ہے ۔
میرے خیال سے پاکستان کو ورلڈکپ کا فائنل کھیلنا چاہیے ۔ ویسٹ انڈیز اور امریکا کی کنڈیشنز پاکستان کے حق میں ہیں۔ پاکستان کے سپنرز آؤٹ آف فارم ہیں لیکن میں پُرامید ہوں کہ فارم میں واپس آجائیں گے ۔ 7 سے 14 اوورز تک سٹرائیک ریٹ بہتر ہونا چاہیے ، ان اوورز میں پر اوور رن ریٹ 8 سے 10 تک ہونا چاہیے ۔سابق کپتان کا کہنا تھا کہ عماد وسیم اور محمد عامر بہت تجربہ کار کھلاڑی ہیں۔ عماد اور عامر ویسٹ انڈیز کی لیگ کھیل چکے ہیں، ان کے اس تجربے سے فائدہ ہوگا۔ صائم ایوب کو کافی موقع ملا ہے اور مل بھی رہا ہے ، صائم اگر انگلینڈ سیریز میں پرفارم نہیں کرتے تو فخر کو اوپر موقع دینا چاہیے ۔ فخر کو ویسٹ انڈیز کی پچز اور کنڈیشنز سوٹ کریں گی۔ دعاگو ہوں کہ صائم ایوب اچھا پرفارم کرے اور رضوان یا بابر کے ساتھ اوپن کرے ۔ ٹیم کی بولنگ پر بات کرتے ہوئے شاہد آفریدی نے کہا کہ دیکھا جائے تو دنیا میں انتی مضبوط بولنگ لائن کسی کی نہیں ہے ، پاکستان کے پاس جتنے بڑے بولرز ہیں ان پر ذمہ داری بھی انتی ہی ہوگی۔
