چیمپئنز ٹرافی:آئی سی سی وفد کا جلد دورہ پاکستان متوقع
لاہور(سپورٹس ڈیسک )پاکستان میں شیڈول چیمپئینز ٹرافی کی تیاریوں کا جائزہ لینے کیلئے انٹرنیشنل کرکٹ کونسل (آئی سی سی) کا وفد جلد پاکستان کا دورہ کرے گا۔
ذرائع کے مطابق آئی سی سی کے وفد کا دورہ اگلے ہفتے ہونے کا امکان ہے تاہم حتمی تاریخوں کا اعلان نہیں کیا گیا ہے جبکہ پاکستان کرکٹ بورڈ اور انٹرنیشنل کرکٹ کونسل کے درمیان اس حوالے سے کوئی باضابطہ رابطہ نہیں ہوا ہے ۔چیمپئینز ٹرافی 2025 پاکستان میں 1996 کے بعد ملک میں ہونیوالا آئی سی سی کا پہلا بڑا ایونٹ ہے ۔دوسری طرف پی سی بی نے چیف آپریٹنگ آفیسر سمیر احمد سید کو پاکستان میں شیڈول آئی سی سی چیمپئینز ٹرافی 2025 کیلئے ٹورنامنٹ ڈائریکٹر مقرر کردیا۔بورڈ کی جانب سے جاری کردہ اعلامیے میں کہا گیا ہے کہ سمیر احمد ایک غیر معمولی منظم پروفیشنل ہیں جن میں انتظامی مہارت کے ساتھ ساتھ کرکٹ کیلئے غیر متزلزل جذبہ موجود ہے اور ہمیں یقین ہے کہ وہ کھلاڑیوں، آفیشلز اور شائقین کے لیے ناقابل فراموش آئی سی سی چیمپئنز ٹرافی کا انعقاد ممکن بنائیں گے ۔اس موقع پر ٹورنامنٹ ڈائریکٹر سمیر احمد سیدنے کہاکہ میں اس ٹورنامنٹ کیلئے اہم ذمہ داری سنبھالنے کو اعزاز سمجھتا ہوں جو پاکستان کرکٹ بورڈ نے مجھے دی ہے ، سٹیڈیم کی اَپ گریڈیشن تکمیل کے قریب ہے اور آئی سی سی کے ساتھ اہم بات چیت جاری ہے ۔ ہماری تجربہ کار ٹیم نے کامیابی کے ساتھ پاکستان سپر لیگ (پی ایس ایل) کی منصوبہ بندی سمیت کئی اہم ایونٹس پر عمل درآمد کیا۔
