قومی ٹی 20سکواڈ کی بہتری کیلئے سٹرائیک فورس بنانے کافیصلہ
لاہور(سپورٹس ڈیسک )آئی سی سی ٹی ٹونٹی ورلڈ کپ 2026 کو سامنے رکھتے ہوئے چیئرمین پی سی بی محسن نقوی نے ایک اور بڑے اقدام کافیصلہ کرلیااور اور اس سلسلے میں پاکستانی ٹی 20 سائیڈ بہتر بنانے کے لیے سٹرائیک فورس کی تشکیل دی جا رہی ہے ۔
ذرائع پی سی بی کا کہنا ہے کہ سٹرائیک فورس 100 نوجوان ہارڈ ہٹنگ بیٹرز پر مشتمل ہوگی، بیٹرز کی سلیکشن سابق آل راؤنڈر عبدالرزاق کی سربراہی میں ہوگی۔ ذرائع نے مزیدکہاکہ ملک بھر سے باصلاحیت کھلاڑیوں کو تلاش کیا جائے گا، ایک سال کے دوران 100 باصلاحیت نوجوانوں کی سلیکشن کی جائے گی۔ یہ پروگرام چھ چھ ماہ پر مشتمل ہو گا یعنی ہر چھ ماہ میں پچاس بیٹرز کی تلاش ہو گی اور اس نوجوان ٹیلنٹ کو لمبے چھکے اور چوکے مارنے کی ٹریننگ دی جائے گی۔اسٹرائیک فورس کا مقصد ٹی 20 سکواڈ کو نیا خون فراہم کرنا ہے ، ایک سال میں نیا ٹیلنٹ تیار کر کے ٹی 20 سکواڈ کا حصہ بنا دیا جائے گا۔ سٹرائیک فورس کا مقصد ٹی ٹونٹی ورلڈ کپ 2026 کا ایک مضبوط سکواڈ تشکیل دینا بھی ہے ۔واضح رہے کہ رواں برس پاکستان ٹیم ورلڈ کپ کے پہلے روانڈ سے باہر ہو گئی تھی ۔
