چنیوٹ :نیو ایئر نائٹ پر سخت سکیورٹی، 500اہلکار تعینات
چنیوٹ (ڈسٹرکٹ رپورٹر)نیو ایئر نائٹ کے موقع پر امن و امان برقرار رکھنے کیلئے پولیس نے سکیورٹی انتظامات مکمل کر لئے ہیں۔ ڈسٹرکٹ پولیس آفیسر ڈاکٹر نوید عاطف نے کہا ہے کہ اس موقع پر 500 سے زائد افسر اور جوان سکیورٹی کے فرائض سرانجام دیں گے ،ہوائی فائرنگ اور آتش بازی کی روک تھام کیلئے خصوصی ٹیمیں تشکیل دیدی گئی ہیں۔
نیو ایئر نائٹ کے دوران ہلڑ بازی کو روکنے اور عوامی مقامات پر خواتین اور فیملیز کے تحفظ کو یقینی بنانے کے لیے خصوصی پلان تیار کر لیا گیا ہے ۔ ایلیٹ فورس، پولیس ٹیمیں اور محافظ سکواڈ مختلف علاقوں میں گشت کریں گے جبکہ ون ویلنگ کی روک تھام کیلئے اہم مقامات پر ناکہ بندی پوائنٹس قائم کر دیئے گئے ہیں۔انہوں نے کہا کہ پولیس نے تفریحی مقامات، پارکوں اور دریائے چناب کے اطراف بھی خصوصی سکیورٹی انتظامات کو یقینی بنایا ہے ۔ عوام مہذب شہری ہونے کا ثبوت دیتے ہوئے نئے سال کی خوشیاں منائیں اور کسی بھی غیر قانونی سرگرمی کا حصہ نہ بنیں، تمام وسائل بروئے کار لاتے ہوئے امن و امان برقرار رکھا جائے گا۔
