مسجد میں گھس کر نمازیوں کوشہید کرنیوالے مسلمان نہیں :سراج الحق
شہدا کاخون رائیگاں نہیں جائیگا،بھارت پاکستا ن کو عدم استحکام کا شکارکر رہاہے :گفتگو
لاہور (سٹاف رپورٹر،دنیانیوز)امیر جماعت اسلامی سینیٹر سراج الحق نے پشاورحملہ کی مذمت کرتے ہوئے کہاہے کہ مسجد میں گھس کر نمازیوں کوشہید کرنیوالے مسلمان نہیں ہوسکتے ،شہدا کاخون رائیگاں نہیں جائیگا۔میڈیاسے گفتگو کرتے ہوئے انہوں نے کہا پاکستان بارڈر چاروں طرف سے گھرا ہواہے ۔ بھارت نے غیر علانیہ جنگ شروع کر رکھی ہے اوروہ پاکستان کوعدم استحکام کا شکارکر رہاہے ۔ اب یہ اداروں کا کام ہے کہ وہ قوم کے سامنے تمام حقائق کو واضح کریں ۔ انہوں نے کہا حکومت اور عوام کو اب سونا نہیں چاہیے بلکہ ملکی سرحدوں کی حفاظت کے لیے ہر وقت آنکھیں کھلی رکھنی چاہئیں۔ضرورت اس امر کی ہے کہ را اور اس سے تربیت حاصل کرنیوالے اور ان تربیت یافتہ دہشتگردوں کی سرپرستی کرنیوالوں کو کٹہرے میں لایا جائے ۔انہوں نے پشاور حملے میں شہید ہونیوالے فوجی افسروں ، جوانوں اور نمازیوں کے لیے دعائے مغفرت اور زخمیوں کی جلد صحت یابی کی دعا کی اور متاثرہ خاندانوں سے گہری ہمدردی اور تعزیت کااظہار کیا ۔قبل ازیں انہوں نے مرکز اسلامی پشاور میں ضلع ، تحصیل و یونین کونسل کے ناظمین سے خطاب کرتے ہوئے کہا عوام نے ان کے کندھوں پر بہت بڑی ذمہ داری ڈال دی ہے اب ان کا فرض ہے کہ وہ دل و جان سے عوام کی خدمت کریں۔دنیا نیوزکے مطابق سراج الحق نے پشاورحملہ کے زخمیوں کی عیادت بھی کی ۔دریں اثنا سراج الحق نے پاکستان میں متعین چین کے سفیر مسٹرسن ویڈونگ سے اسلام آباد میں ملاقات کی اور باہمی دلچسپی کے امور پر تبادلہ خیال کیا ۔ملاقات میں جماعت اسلامی کے ڈائریکٹر امور خارجہ عبدالغفار عزیز بھی موجود تھے ۔ سراج الحق
