بھارتی طیاروں کی تباہی،پاکستان نے جدید فضائی جنگ میں سب سے طویل فاصلے پر کا میاب حملہ کیا
اسلام آباد(دنیانیوز،مانیٹرنگ ڈیسک )پاکستان اور بھارت کے درمیان فضائی جھڑپ میں بھارتی رافیل لڑاکا طیارے کی تباہی پربرطانوی خبر رساں ادارے رائٹرز نے تفصیلی چشم کشا رپورٹ جاری کردی جس کے مطابق6 اور 7 مئی کی درمیانی رات پاکستانی فضائیہ کے آپریشن روم کی سکرین سرخ ہو گئی۔
جس میں سرحد پار دشمن کے درجنوں لڑکا طیاروں کی انڈیا میں موجود پوزیشنیں واضح تھیں ۔رپورٹ کے مطابق جے 10 سی نے 200 کلو میٹر دور سے رافیل طیاروں کو نشانہ بنایا، پاکستان نے بہترین حکمت عملی اپنائی اور بھارتی ریڈار بھی جام کئے جس سے رافیل کے پائلٹ صورتحال سے لاعلم رہے ، بھارت نے سخوئی طیاروں کے جام ہونے کی تصدیق کی۔خبر ایجنسی کا کہنا ہے کہ پاکستان نے جدید فضائی جنگ میں بھارتی طیاروں کی تباہی کیلئے سب سے طویل فاصلے پر کامیاب حملہ کیا، 7 مئی کی رات کو پاکستان ایئرفورس کے ریڈار پر بھارتی طیارے نمودار ہوئے ، ریڈارسگنل ملتے ہی ایئر چیف مارشل ظہیر سدھو نے جے 10 سی اڑانے کا حکم دیا، ظہیر سدھو نے رافیل کو نشانہ بنانے کے خصوصی احکامات جاری کئے ، وہ کئی روز سے کنٹرول روم میں سوتے تھے ۔غیرملکی خبر رساں ادارے نے بتایا کہ اندھیرے میں ایک گھنٹے تک جاری رہنے والی اس لڑائی میں تقریباً 110 طیارے شامل تھے ، جسے ماہرین نے حالیہ دہائیوں کی سب سے بڑی فضائی جنگ قرار دیا تھا جبکہ بھارتی رافیل گرنے میں غلطی بھارتی انٹیلی جنس کی تھی رافیل کی نہیں، بھارتی پائلٹ سمجھ رہے تھے وہ پاکستان کے پی ایل 15 میزائلوں کی رینج سے دور ہیں اوریہ رینج صرف 150کلومیٹرکے قریب ہے ۔
ناقص انٹیلی جنس نے رافیل پائلٹوں کو اعتماد کا ایک غلط احساس دلایا کہ وہ پاکستانی فائرنگ رینج سے باہر ہیں،بھارتی پائلٹوں کو توقع نہیں تھی کہ اتنی دور سے بھی وہ نشانہ بن سکتے ہیں، پی ایل 15 میزائلوں نے 200 کلومیٹر دور سے بھارتی طیاروں کو مار گرایا۔خبر ایجنسی کی رپورٹ میں بتایا گیا ہے کہ پاکستانی ایئر فورس نے ملٹی ڈومین آپریشن کے ذریعے کِل چین ترتیب دی، پاکستان نے ایئر، لینڈ اور سپیس سنسرز کو ایک دوسرے سے منسلک کیا۔ جے 10 سی طیارے ریڈار طیاروں سے براہ راست معلومات لے رہے تھے ، پاکستانی طیارے اپنے ریڈار آف کرکے بھارتی سرحد کے قریب پرواز کر رہے تھے ، ریڈار آف ہونے کے باعث پاکستانی طیارے بھارتی ریڈار پر نظر نہیں آرہے تھے ۔بھارت بھی اب پاکستان جیسا فضائی سسٹم بنانا چاہتا ہے ، بھارت کے طیارے مختلف ممالک کے ہونے کے باعث مشکلات ہیں، اس جنگ میں فتح اس کی ہوئی جس کے پاس سب سے بہتر معلومات تھیں۔خبر رساں ادارے کی رپورٹ میں بتایا گیا کہ بھارت نے پاکستان پر حملے کیلئے 70 طیارے روانہ کئے ، پاکستان کے پاس نشانہ بنانے کیلئے بھارتی طیاروں کی کمی نہیں تھی ۔پاکستان نے اس جھڑپ میں ایک کامیاب الیکٹرانک وارفیئر حملے کا دعویٰ بھی کیا کہ جس نے بھارتی طیاروں کے مواصلاتی نظام اور ریڈار پر اثر ڈالا۔ اس کامیابی کے بعد کئی ممالک نے چینی لڑاکا طیاروں اور ٹیکنالوجی میں دلچسپی لینا شروع کر دی ہے جبکہ رافیل کی مارکیٹ گرگئی ۔
