ہر گلی کوچے کا امن کسی شہید کی آخری سانس کا نتیجہ : مریم نواز
لاہور(دنیا نیوز)وزیراعلیٰ پنجاب مریم نواز شریف نے کہا ہے کہ پنجاب کے ہر گلی کوچے کا امن کسی شہید کی آخری سانس کا نتیجہ ہے، سلام ہے ان ماؤں کو جنہوں نے بیٹے شہید کرادئیے اور ان بیٹوں کو جنہوں نے باطل کے سامنے سر جھکانے سے انکار کیا۔
وزیر اعلیٰ نے یوم شہدا پولیس پر اپنے پیغام میں کہا کہ پنجاب پولیس کے ان جانبازوں کو سلام جنہوں نے اپنا خون دے کر وطن کو امن کا گہوارہ بنایا۔کسی ماں نے بیٹا،کسی بیوی نے سہاگ اور کسی بچے نے باپ کھو دیا تاکہ ہم سب محفوظ رہیں۔پولیس شہدا کا خون ہماری ریاست کی سب سے مضبوط اینٹ ہے ، پولیس شہدا کا لہو ہماری ریاست کی بنیاد ہے ہم اسے کبھی فراموش نہیں کریں گے ۔ مریم نواز نے کہا کہ ریاست کی اصل طاقت وہ سپاہی ہیں جنہوں نے گولی کے سامنے سینہ کیا اور پیچھے قدم نہ ہٹایا،شہدا کا مشن جاری رہے گا ان کے خواب ہم پورے کریں گے ۔پنجاب حکومت پولیس شہدا کے ورثا کے ساتھ صرف الفاظ نہیں عملی اقدامات، فلاحی پیکیجز اور ہر ممکن تعاون کے ساتھ کھڑی ہے۔
