8فروری کی کال عمران کی نہیں اپوزیشن اتحاد کی ہے : علیمہ
راولپنڈی(مانیٹرنگ ڈیسک )تحریک انصاف (پی ٹی آئی) کے بانی اور سابق وزیراعظم عمران خان کی بہن علیمہ خان نے کہا ہے کہ 8 فروری کی احتجاج کی کال بانی پی ٹی آئی کی نہیں بلکہ اپوزیشن اتحاد کی ہے ۔
علیمہ نے اپنے وکیل فیصل ملک کے ہمراہ میڈیا سے گفتگو کرتے ہوئے کہا کہ عدالت سے کہا بانی نے عدلیہ کی آزادی کے لیے پرامن احتجاج کا کہا تھا، آپ کی آزادی کے لیے آواز اٹھانے پر ہمیں ہی جیلوں میں ڈالنے کی کوشش کی جا رہی ہے ۔انہوں نے کہا کہ بانی ملک میں قانون کی بالادستی چاہتے ہیں، انہوں نے کبھی نہیں کہا میرے لیے باہر نکلو، اگر عدالتوں سے انصاف مل رہا ہوتا تو ہماری حالت یہ نہ ہوتی، اڈیالہ جیل کے باہر قرآن خوانی کو بھی جرم بنایا جا رہا ہے ۔بانی کو غیر قانونی طریقے سے قید تنہائی میں رکھا گیا ہے ، گزشتہ رات ہم جب گھر واپس روانہ ہوئے تو روات تھانے کے ایس ایچ او نے ہمارے لوگوں کو گرفتار کیا، پولیس نے گزشتہ رات ہمارے لوگوں کی گاڑیاں بھی قبضے میں لے لیں۔علیمہ نے کہا کہ ہماری تین خواتین کارکنوں کو پولیس نے گرفتار کیا، 8 سے زائد گاڑیاں پولیس اٹھا کر لے گئی، 5 لاکھ روپے ہر کارکن سے تاوان مانگا جا رہا ہے ، تھانہ روات کے ایس ایچ او کے خلاف کون اب درخواست دے گا۔انہوں نے کہا کہ ہمارے لوگوں نے گاڑیاں چھڑوانے کے لیے پولیس کو پیسے دیئے ہیں۔بانی کی بہن نے بتایا کہ ہم نے ان کے لیے کچھ کتابیں عدالت کو دی ہیں، عدالت کا شکریہ وہ ہماری کتابیں جیل میں پہنچاتی ہے ۔
