ہم کو ٹھہرنا کب ہے

بارہ برس ہوتے ہیں ، لاہور کے دانا سے عارف نے یہ کہا تھا:آپ کو شاعری کرنی تھی ، افسری نہیں ۔ اس آدمی کا نام شعیب بن عزیز ہے اور اس کا ایک شعر یہ ہے ؎

خوب ہو گی یہ سرا دہر کی لیکن اس کا

ہم سے کیا پوچھتے ہو‘ ہم کو ٹھہرنا کب ہے

اب میں کمبل کو چھوڑتا ہوں مگر کمبل مجھے چھوڑتا نہیں۔ آزادی کی میں التجا کرتا ہوں مگر آزادی اب کہاں ؟

اس نے اپنا بنا کے چھوڑ دیا

کیا اسیری ہے، کیا رہائی ہے

اس صحرائی شہر رحیم یار خان میں یہ 1969ء کا موسمِ خزاں تھا، جب میاں محمد حفیظ نے مجھے یاد کیا۔ہزاروں دلوں میں وہ آج بھی زندہ ہیں ۔ اللہ انہیں برکت دے،ان کے سگے بھائی میاں محمد ماجد سمیت ۔اس عمر میں بھی جو پانچ بار پیدل مسجد جاتے ہیں ۔ہم سب جانتے ہیں ، یہ جملہ انہیں خوش نہ آئے گا۔ممکن ہے ، ایک نوجوان کی طرح ہنستے ہوئے وہ یہ کہیں :او ہرون ، تجھے میں بڈھا لگتا ہوں ؟

احترام سے پیدا ہونے والا اندیشہ رگ رگ سے پھوٹتا ہے۔ عالمگیر ہوٹل کے کشادہ عقبی کمرے میں میاں صاحب تشریف فرما تھے۔حلیم الطبع ،طویل قامت،گندم گوں، عہدِ قدیم کی نجابت کا ایک نادر نمونہ۔ لائبریری ، ان کی دوسری لائبریری۔ بڑی والی گھر میں تھی ۔

اس میٹھے لہجے میں ، مدّتوں بعد جو فقط عارف میں دیکھا ، انہوں نے کہا : لاہور جانے کی تیاری کرو، ڈاکٹر صاحب سے میں نے بات کر لی ہے ۔ ڈاکٹر صاحب سے اُن کی مراد میرے ماموں ڈاکٹر محمد نذیر مسلم تھے ۔ اختلاف ہو تو فیصلہ وہ صادر کرتے ۔ ابّا جی مرحوم کم از کم پچیس سال ان سے بڑے تھے ۔ ایسے یکسو کہ طے کر لیں تو پہاڑ بھی راہ روک نہ سکتا۔ حیرت ہوتی کہ ڈاکٹر صاحب کی فرمائش تک مسترد نہ کرتے۔ ایک برس ہوتاہے کہ چلے گئے مگر کہاں چلے گئے ۔

ابھی ابھی انہی کنجوں میں اس کے سائے تھے

ابھی ابھی تو وہ تھا ان برآمدوں میں یہاں

دل بھر آیا۔ باپ کی خواہش تھی کہ بیٹا بڑا آدمی بنے۔ اپنے خالہ زاد میاں محمد خالد حسین کی طرح لندن سے سی اے کی ڈگری پائے ۔ کم از کم ایم بی بی ایس ڈاکٹر ہی ۔ فرزند ایسا کہ چٹّا جواب دے دیا: اردو پڑھوں گا، استاد بنوں گا یا پھر اخبار نویس۔ وہ میرا منہ دیکھتے رہے ۔ رحیم یار خاں کے سائیکل سوار نامہ نگار انہوں نے دیکھے تھے ۔ اخبار پڑھنے میں انہیں دقّت ہوتی ۔ ساری زندگی ایک کتاب کے ساتھ بسر کر دی ۔ اللہ کی آخری کتاب !

دل بھر آیا: میاں صاحب آپ جانتے ہیں ، روپے پیسے کا ہرگز کوئی شوق نہیں ، بس پڑھنے لکھنے کا۔ حیرت سے انہوں نے میری طرف دیکھا اور بولے: روپیہ پیسہ کیوں نہیں ؟ جائو ، اللہ تمہیں عزت دے گا اور روپیہ بھی بہت۔ میز پر پڑی چائے کی پیالی ٹھنڈی ہو گئی تھی۔

بڑے بھائی ناراض تھے بلکہ مشتعل ۔ ڈاکٹر محمد نذیر مسلم کے سامنے مگر دم مارنے کی مجال کسے تھی ۔بلدیہ کا دھانسو چیئرمین بیچ سڑک پٹا اور اپنے حواریوں سے کہا :خبردار اِن کی شان میں کوئی گستاخی نہ ہو ۔ میاں محمد حفیظ سے اختلاف کی جسارت کون کرتا۔وہاں تو پتھر پگھل جایا کرتے۔ ایسا آدمی پھر نہ دیکھا۔

ہمیں خبر ہے بڑے علم و آبرو والے

پہ یہ مقام کسی اور کو نصیب کہاں

پچاس روپے کا ایک نوٹ پیر جی نے مجھے عطا کیا، بڑے بھائی نے ۔ پندرہ روپے میں تھرڈ کلاس کا ٹکٹ خرید لیا جائے گا کہ انٹر ویو میں ناکام رہا تو واپسی کا کرایہ باقی ہو۔قربان انجم بولے : پاگل ہوئے ہو ،تم تھرڈ کلاس میں سفر کرو گے ؟ بائیس روپے پچاس پیسے ۔ دوپہر کا کھانا ریل گاڑی کی ڈائننگ کوچ میں کھایا اور کشتی جلا دی ۔

لاہور کے ریلوے سٹیشن سے اخبار کے دفتر کا کرایہ ایک روپے تھا۔ ایک روپیہ فی سواری مگر اس ناقابلِ علاج تنہائی پسند کو یہ گوارا نہ تھا۔ پانچ روپے اٹھ گئے ۔ کشتی کا ملبہ بھی جلادیا۔

سرخ و سفید ، جواں سال مدیر نے میری طرف الجھن سے دیکھا اور پاکستان ٹائمز میری طرف بڑھا دیا، ترجمے کے لیے۔ آنکھوں تلے اندھیرا چھا گیا۔ ایف اے کا نتیجہ ابھی نہ آیا تھا اور دو برس میں زیادہ سے زیادہ بیس ہفتے کالج میں گزارے ہوں گے ۔ کانپتے ہاتھوں سے کیا گیا ترجمہ انہوں نے پڑھا اور یہ کہا :تنخواہ 150روپے ، رہائشی کمرے کا کرایہ 25روپے ماہوار ۔کل صبح گیارہ بجے دفتر آجانا۔

اللہ کو منظور ہوا اور باقی تین کتابیں لکھی جا سکیں تو اس 45برس کی روداد بھی انشاء اللہ رقم کرنے کی کوشش کریں گے ؎

ہم کو شاعر نہ کہو میرؔ کہ صاحب ہم نے

درد و غم کتنے کیے جمع تو دیوان کیا

یہ 1995ء کا موسمِ بہار تھا ، جب عارف سے ملاقات ہوئی۔ دو برس ہوتے ہیں ، ایک ممتاز سیاستدان جو وزیراعظم بنتے بنتے رہ گئے ، ان کی خدمت میں حاضر ہوئے ۔ ناچیز کو طلب کر رکھا تھا۔ فرمایا: ان کی بات سن لیجیے۔ عرض کیا: گھوڑا گھاس سے محبت کرے گا تو کھائے گا کیا ؟ آپ اس دروازے پر آپہنچے ہیں ، جہاں سے کوئی خالی ہاتھ واپس نہیں جاتا ؛لہٰذا مروّت برتنے کی کوشش کریں گے ۔ سبب یہ ہے کہ ماں باپ سے بڑھ کر ان کے احسانات ہیں ۔

برسوں سے آرزو تھی کہ وہ اپنے گھر سے نکلیں اور یہ ناچیز اپنے غریب خانے سے ۔ بیچ میںکوئی ٹھکانہ ہو ۔ دامن میں کوہ کے اک چھوٹا سا جھونپڑا ہو ۔ تمام نہیں تو کچھ شامیں وہاں بسر ہوں ۔ اب بالآخر امید بندھی ہے ۔ کل شام ان سے بات ہوئی ۔ گل پیڑااس دیار کا نام ہے ،مٹھی بھر پھول۔ عرض کیا : کیا اس میں کوئی معنویت ہے؟ خوش دلی سے ہنسے :جی ہاں ! گجر خان ، گل پیڑا ،گیلان ۔ ایک ''گ‘‘ اس کے سوا بھی ہے ۔ عرض کیا : کیا آپ ان محترمہ کا پورا نام بتانا پسند کریں گے ۔ آواز ٹوٹنے لگی۔ سوچا: روبرو ہی سہی۔ گزارش کی۔ جواب ملا : اسلام آباد جاتا ہوں ۔ آٹھ بجے فون کیا۔ حمید الدین نے، جو صرف اس لیے صوبائی اسمبلی کا الیکشن لڑنا چاہتے ہیں کہ دوسری شادی فرما سکیں ، ہمیشہ کی کراری آواز میں کہا ''سرجی ابھی تک وہیں ہیں‘‘۔

اتنے میں فون کی سکرین روشن ہوئی۔ ''آپ کہاں ہیں ہارون صاحب‘‘ فریاد کرتی ہوئی ایک آواز نے کہا ''آپ کو آج میرے ساتھ پروگرام میں شریک ہونا تھا‘‘۔ ''آج؟ آپ نے تو کسی اور دن کو کہا تھا‘‘۔ ''جی نہیں ، آج Wednesdayکو‘‘۔ اب میری بلا جانے ، Wednesdayکس چڑیا کانام ہے ۔ بدھ کہا ہوتا۔ میں چک نمبر42جنوبی سرگودہا کا رہنے ولا ہوں۔ Wednesday, my foot!

ابھی ابھی صمد مرسلین کو فون کیا تو عطا ء اللہ عیسیٰ خیلوی کی آواز سنائی دی ۔

ککڑا دھمّی دیا کیں ویلے دتّی ہئی بانگ

ماہیا ٹور بیٹھی میکوں پچھوں لگّا ارمان

مرغِ سحر ،بے وقت تو نے اذان دی ۔ شب اسے رخصت کیا۔ اب حسرت میں درماندہ ہوں ۔

دل ایک بار پھر بھر آیا ہے ۔ عطاء اللہ عیسی خیلوی سے وعدہ تھا کہ کسی دن ان کی خدمت میں حاضر ہوں گا۔ ایک شام ان کے ساتھ بتائوں گا۔

زندگی بیت گئی اور حسرتیں باقی رہ گئیں ۔ بارہ برس ہوتے ہیں ، لاہور کے دانا سے عارف نے یہ کہا تھا:آپ کو شاعری کرنی تھی ، افسری نہیں ۔ اس آدمی کا نام شعیب بن عزیز ہے اور اس کا ایک شعر یہ ہے ۔

خوب ہو گی یہ سرا دہر کی لیکن اس کا

ہم سے کیا پوچھتے ہو‘ ہم کو ٹھہرنا کب ہے