1973ء کابچا کچھا آئین!

آئین یا دستور کسی حکومت کے لئے قوانین اور اْصولوں کا ایسا مجموعہ ہوتا ہے جو ایک سیاسی وجود کے اختیارات اور کارکردگی کو محدود اور متعین کرتاہے۔ بھارتی دستور کسی ملک کا لکھا ہوا سب سے بڑا آئین ہے، جس کے انگریزی ترجمے میں ایک لاکھ سترہ ہزارتین سو چھیانوے الفاظ ہیں جبکہ امریکی دستور دنیا کے کسی ملک کا سب سے چھوٹا دستور ہے، جس میںچار ہزار پانچ سو تینتالیس الفاظ ہیں۔ برطانیہ کا آئین لکھا ہوا ہی نہیں ہے، وہ صرف روایتوں پر چلتا ہے اسے ''اَن رِٹن کانسٹی ٹیوشن‘‘ کہا جاتا ہے۔

آئین پاکستان کواسلامی جمہوریہ پاکستان کا آئین مجریہ 1973ء کہاجاتا ہے۔ مارشل لاء ہٹائے جانے کے بعد نئی حکومت کے لئے سب سے زیادہ اہم کام نئے آئین کا مسودہ تیار کرنا تھا۔ اس دور میں قائم کمیٹی کے اندر ایک اختلاف یہ تھا کہ ملک میں پارلیمانی نظام ہونا چاہیے یا صدارتی؟ صوبائی خود مختاری کے معاملے پر بھی مختلف خیالات تھے۔ آئینی کمیٹی کو رپورٹ تیار کرنے میں آٹھ ماہ لگ گئے اور بالآخر 10 اپریل 1973ء کو اس نے آئین کے متعلق اپنی رپورٹ پیش کی۔ وفاقی اسمبلی میں اکثریت یعنی 135 مثبت ووٹوں کے ساتھ اسے منظور کر لیا گیا اور 14 اگست 1973ء کو یہ آئین پاکستان میں نافذ کر دیا گیا۔ابھی آئین پاکستان کو نافذ ہوئے ایک سال بھی نہ گزرا تھا کہ 4 مئی 1974ء کو پہلی ترمیم کی گئی جس میں پاکستان کی سرحدوں کا ازسر نو تعین کیا گیا۔ دوسری ترمیم 7ستمبر 1974ء، تیسری 18 فروری 1975ء،چوتھی21 نومبر1975ء، پانچویں 5ستمبر1976،چھٹی 22 دسمبر 1976ء اور ساتویں ترمیم 1977ء میں کی گئی۔ پھرمشہور زمانہ آٹھویں ترمیم 1985ء میں نافذ العمل ہوئی جس کی رُو سے حکومتِ پاکستان پارلیمانی طرزِ حکومت سے جزوی صدارتی طرزِ حکومت میں تبدیل ہو گئی اور صدر پاکستان کو بھرپور آئینی قوت اورکئی اضافی اختیارات میسر آگئے۔ یہ اختیارات ذیلی حصہ 2 (ب) کے آرٹیکل 58 میں شامل ہوئے جس کے تحت صدر پاکستان کو یہ اختیار بھی مل گیا کہ وہ پاکستان کی قومی اسمبلی کو تحلیل‘ وزیر اعظم اور کابینہ کو فارغ کر سکتے تھے۔ آٹھویں ترمیم دراصل غیر جماعتی بنیادوں پر منتخَب پارلیمان اور اس وقت کے صدر جنرل ضیاء الحق(مرحوم) کے مابین ایک ''ڈیل‘‘ تھی۔

نویں ‘دسویں ‘گیارہویں اور بارہویں ترمیم کے بعد جب سیاستدانوں کا ''وار‘‘ چلا تو تیرھویں ترمیم لائی گئی۔ 1997ء میں اس وقت کے وزیر اعظم نواز شریف کی حکومت نے آرٹیکل اٹھاون 2 ب (58-2 B) میں یہ ترمیم منظور کی اور صدر پاکستان کے اختیارات برائے تحلیلِ قومی اسمبلی ختم کر دیئے گئے۔ اس ترمیم کے چند ہی ماہ بعد چودہویں ترمیم منظور کی گئی جس کی رُو سے ارکان قومی اسمبلی کو سختی سے اس بات کا پابند بنا دیا گیا کہ وہ اپنی متعلقہ سیاسی جماعت کے کسی بھی فیصلے سے انکار نہیں کر سکتے اور اگر وہ ایسا کرتے پائے گئے تو انھیں تادیبی کارروائی، جس میں رکنیت کی معطلی شامل تھی کا سامنا کرنا پڑ سکتا تھا۔ اس ترمیم نے وزیر اعظم کے عہدے پر موجود تمام احتسابی نکات کا خاتمہ کر دیا۔ اس ترمیم کو عرف عام میں ''امیر المومنین ترمیم‘‘ بھی کہا جاتا ہے۔ اسی ترمیم کے بعد نواز حکومت عوام میں انتہائی غیر مقبول ہونا شروع ہو گئی حالانکہ ان کی جماعت پاکستان مسلم لیگ (نواز) نے دو تہائی اکثریت سے انتخابات جیتے تھے۔ یہ خیال کیا جانے لگا کہ ملک میں'' سول آمریت کا راج‘‘ ہے۔پندرھویں اور سولھویں ترمیم کے بعد ایک بار پھر سترھویں ترمیم نے معاملات کو ''بیلنس‘‘ کیا۔ سترھویں ترمیم دسمبر 2003ء میں کی گئی جو تقریباً ایک سال تک اس وقت کے صدر جنرل پرویز مشرف کے حامیوں اور مخالفین کے درمیان بحث مباحثے اور کئی مواقع پر تلخیوں کے بعد منظور کی گئی تھی۔ تیرھویں ترمیم میں کی گئی تقریباً تمام ترامیم واپس لے لی گئیں۔

اب تک کی سب سے زیادہ متنازعہ ترمیم اٹھارھویں ترمیم کہلائی جا رہی ہے۔ 8 اپریل 2010ء کو قومی اسمبلی نے اسے منظور کیا۔ اٹھارھویں ترمیم نے صدر کے پاس موجود تمام ایگزیکٹو اختیارات پارلیمان کو دے دیئے۔ قائد ایوان ہونے کی وجہ سے زیادہ اختیارات وزیراعظم کے حصے میں آگئے جبکہ وفاق سے زیادہ تر اختیارات لے کر صوبوں کو دے دیئے گئے۔

آئین پاکستان میں اتنی ترامیم کے بعد بھی اسے1973ء کا آئین کہا جاتا ہے؛ حالانکہ اٹھارھویں ترمیم کے بعد اب یہ آئین آہستہ آہستہ مارشل لاء کی بھونڈی شکل اختیار کرتا جا رہا ہے جس پر حبیب جالب کی یاد آنا فطری ہے: ؎

دِیپ جِس کا محلّات میں ہی جلے

چند لوگوں کی خْوشیوں کو لے کر چلے

ایسے دستور کو، صبحِ بے نْور کو

مَیں نہیں مانتا مَیں نہیں جانتا

چند روز قبل ''یوم دستور‘‘منایا گیا۔ قائم مقام صدر اورچیئرمین سینیٹ رضا ربانی نے کراچی میںمنعقدہ تقریب سے دھواں دار خطاب کیا جس میں انہوں نے آرٹیکل 6 کو آئین سے نکالنے کا مطالبہ بھی کیا۔ ان کا کہنا تھاکہ '' آئین کا آرٹیکل 6 آئین اور جمہوریت کے دفاع میں ناکام رہا، اس کو آئین سے حذف کر دینا چاہئے‘‘۔ لیکن انہوں نے یہ نہیں بتایا کہ آرٹیکل 62 اور 63 پر کون سا عمل ہو رہا ہے اورکون سی جمہوریت بچائی جارہی ہے؟ پارلیمنٹ میں بیٹھے کتنے ارکان ان آرٹیکلز پر پورے اترتے ہیں۔ پارلیمنٹ لاجز سے تو شراب کی بوتلیں بھی برآمد ہوتی ہیں، عوام کا پیسہ لوٹ کر باہر بھیجا جاتا ہے، من پسند ٹھیکیداروں کو ٹینڈر دے کر کِک بیکس لئے جاتے ہیں، غریب پاکستانیوں کا لوٹا ہوا پیسہ سوئس بینکوں میں سڑتا رہتا ہے، سفارشی کلچر پروان چڑھتا ہے، احتساب کا نظام ''فیل‘‘نظر آتا ہے، مفت تعلیم کے نام پر اساتذہ مفت کی تنخواہیں ہڑپ کرتے ہیں، سرکاری اسپتالوں میں مریض ایڑیاں رگڑتے ہیں، ٹرینیں چھت تک بھری ہوتی ہیں، ہوائی جہازوں میں سفرکے لئے ٹکٹ تک نہیں ملتا، لیکن قومی خزانہ ہے کہ بھرنے کا نام ہی نہیں لیتا۔

آئی ایم ایف اور ورلڈ بینک ہمیں اپنا بہترین کلائنٹ قرار دیتے ہیں کیونکہ ہم نے اپنے تما م اثاثے ان کے پاس گروی جو رکھے ہوئے ہیں۔ ہم اپنے عوام کے منہ کا نوالہ چھین کراُن کو سود اور قسطیں اداکررہے ہیں۔ ہمارے موجودہ بچے تو دُور، پیدا ہونے والے بھی مقروض ہیں۔ ہمارا آئین تو اب تک پینے کا صاف پانی اور غریبوں کو سستا انصاف نہیں دے سکا، لیکن ہم چاہتے ہیں کہ آرٹیکل 6کو نکالا جائے۔

پاکستان میں حالیہ ''پانامہ بحران‘‘کی بھی تمام تر ذمہ داری اٹھارھویں ترمیم پر عائد ہوتی ہے۔ اٹھارھویں ترمیم وہ ناگ ہے جو اس ملک کی اخلاقی اقدار کو نگل رہا ہے۔ پاکستان کا موجودہ آئین عوام کو تحفظ دینے کی بجائے حکمرانوں اور ارکان پارلیمنٹ کو تحفظ دے رہا ہے۔ کوئی بھی حکمران چاہے ''آن ڈیوٹی‘‘ ہو یا ''آف ڈیوٹی‘‘، موجودہ ارکان اسمبلی ہوں یا سابقہ، پاکستان کے احتساب کے ادارے نہ انہیں گرفتار کرسکتے ہیں نہ ہی تفتیش کرسکتے ہیں۔ یہ کام اٹھارھویں ترمیم کے ذریعے پارلیمانی کمیٹی کے سپرد کردیا گیا ہے اور چونکہ پارلیمانی کمیٹی حکمران جماعت اور اپوزیشن جماعتوں کے نصف ‘ نصف ارکان پر مشتمل ہوگی، یہ نہ کسی کو سزا دے گی اور نہ ہی کسی کو مجرم ٹھہرائے گی۔ ایک ''پیٹی بھائی‘‘ دوسرے''پیٹی بھائی ‘‘ کی حفاظت کرتا ہے، تحفظ دیتا ہے اور اس طرح قوم کو یہ پیغام دیا جاتا ہے کہ حکمرانوں کا کوئی کچھ نہیں بگاڑ سکتا۔ سب کچھ اسی طرح چلتا رہا ہے اور چلتا رہے گا۔ موجودہ حکمران بھی اپنے پانچ سال پورے کریں گے۔ نیب‘ ایف آئی اے‘ عدالتیں اوراینٹی کرپشن کے محکمے ہاتھ باندھے اپنی بے بسی کا تماشہ دیکھتے رہتے ہیں۔ جب اسٹیبلشمنٹ نے احتساب کا ڈنڈا گھمایا تو سیاستدانوں کی اکثریت غراہٹ کی آوازیں نکالنے لگی۔ آئین کی بعض شقوں کے وہ حوالے دیئے گئے کہ احتسابی اداروں کے بڑھتے قدم رک گئے۔ یہ اٹھارھویں ترمیم کا ''جادو‘‘ ہے۔

مسلمانوں کے خلیفہ دوئم سے مسجد نبوی ﷺ میں پوچھا گیا کہ ''آپ کا کرتا کس کپڑے سے بنایا گیا ہے، آپ کے پاس تو اتنا کپڑا نہیں تھا‘‘۔ جواب ملا ''میرے بیٹے نے اپنے حصے کا کپڑا مجھے دیا تھا اور یہ کرتا دونوں کپڑوں کو ملاکر بنایا گیا ہے، مال غنیمت میں کوئی خیانت نہیں ہوئی‘‘۔کیا پاکستان کے حکمرانوں سے کوئی پوچھ سکتا ہے کہ آپ کے دور حکومت میں جو بدعنوانیاں ہوئیں ان کا ذمہ دار کون ہے ؟ 1973ء کے آئین کا یہ کمال ہے کہ وہ عوام کے ہاتھ باندھتا ہے، منہ بند کرتا ہے اور حکمرانوں کو کھلی چھٹی دیتا ہے کہ ''لوٹو اور پھوٹو‘‘ تمہیں کوئی نہیں پکڑے گا۔

پاکستان کے اندر سیاسی فساد اس وقت تک ختم نہیں ہوگا جب تک آئین کا ''میجر آپریشن‘‘ نہ ہو۔ ضیاء الحق نے ایران کے ایک میگزین کو انٹرویو دیتے ہوئے کہا تھا کہ ''آئین کیا ہے، چار صفحات کی کتاب جسے میں جب چاہوں پھاڑ کر پھینک سکتا ہوں‘‘۔ ضیاء الحق نے تو آئین کے ساتھ کچھ نہیں کیا لیکن جمہوریت کے نام پر آنے والے''نان اسٹیک ایکٹرز‘‘ نے نہ صرف آئین کو پھاڑکر رکھ دیا بلکہ اسے ذاتی مفادات کی لونڈی بنا کر آئین پر سے عوام کا اعتماد ختم کردیا۔

عام آدمی یہ سمجھتا ہے کہ موجودہ آئین پاکستان کے اندر ایماندار اور نیک نیت حکومت کی تشکیل کے لئے کوئی بھی ''گارنٹی‘‘ نہیں دیتا۔ یہ آئین کبھی مقدس کتاب تھا جو اب صرف کتاب بن کر رہ گیا ہے۔ یوم دستور منانے سے آئین کا تقدس نہیں بڑھتا بلکہ عوام کے حقوق کا تحفظ کرنے سے آئین کے تقدیسی چشمے پھوٹتے ہیں۔ اسی لئے تو پاکستان کے تجزیہ کار‘ کالم نویس اور سیاستدان سب سے کم جس کتاب کا مطالعہ کرتے ہیں وہ آئین ہے اور بہت سوں نے تو اس کتاب کا ٹائٹل تک نہیں دیکھا۔

روزنامہ دنیا ایپ انسٹال کریں