مردم بے شماری

مجھے کیوں نکالا؟... یہ سوال صرف سابق وزیر اعظم نواز شریف ہی نہیں کراچی کے ڈیڑھ کروڑ شہری بھی پوچھ رہے ہیں‘ جنہیں مردم شماری کے مکھن میں سے بال کی طرح نکال دیا گیا ہے۔ کراچی کے ساتھ ظلم و زیادتی کا سلسلہ رکنے کا نام ہی نہیں لے رہا۔ ابھی بلدیاتی اداروں کی آہیں‘ مہنگی بجلی کی صدائیں‘ ٹوٹی پھوٹی سڑکوں کی سسکیاں اور ٹریفک جام کی ہچکیاں بھی نہیں رکی تھیں کہ مردم شماری کے حیرت انگیز اور ناقابل یقین نتائج نے کراچی کو ''نفسیاتی مریض‘‘ بنا دیا ہے۔

مردم شماری کے غیر حتمی نتائج میں کراچی کی آبادی ایک کروڑ 70 لاکھ ظاہر کی گئی‘ لیکن محکمہ شماریات کے ابتدائی نتائج میں کراچی کی آبادی مزید کم کرکے ایک کروڑ 49 لاکھ کر دی گئی ہے۔ ان نتائج کے مطابق لاہور کی آبادی ایک کروڑ گیارہ لاکھ بتائی گئی ہے۔ فیصل آباد بھی راتوں رات پاکستان کا تیسرا بڑا شہر بن گیا‘ اور اس کی آبادی 32 لاکھ سے تجاوز کر گئی ہے... جبکہ حیدر آباد جیسا شہر بھی گرتے پڑتے آٹھویں نمبر پر پہنچ گیا ہے۔ 17 ارب روپے خرچ کرنے کے بعد بھی مردم شماری نے نہ گنتی پوری کی اور نہ ہی مسئلہ حل کیا‘ بلکہ لگتا ہے کہ مردم شماری خود آنے والے دنوں میں پاکستان کا سب سے بڑا مسئلہ بننے والی ہے۔

پاکستان میں مردم شماری کے متنازعہ نتائج کا اندازہ اس بات سے بھی لگایا جا سکتا ہے کہ مردوں کی تعداد خواتین سے زیادہ ہے اور اسلام آباد میں صرف 133 خواجہ سرا رہائش پذیر ہیں۔ مردم شماری کی حتمی رپورٹ تو اپریل 2018ء میں جاری کی

جائے گی لیکن ابھی عبوری نتائج پر ہی ہنگامہ ہو رہا ہے تو اپریل تک یہ معاملہ سنگین رخ اختیار کر سکتا ہے۔ ایک قابل توجہ بات یہ بھی ہے کہ پورے لاہور کو شہری (اربن) علاقہ ڈکلیئر کیا گیا لیکن کراچی کے دو اضلاع کو تاحال دیہات قرار دیتے ہوئے کھیتی باڑی کے لئے چھوڑ دیا گیا ہے۔ ضلع ملیر کو بھی کراچی میں شامل نہیں کیا گیا۔ ملیر اور گڈاپ کی ایک بڑی آبادی کو بیٹھے بٹھائے شہر سے دیہات میں منتقل کر دیا گیا ہے۔ دلچسپ بات یہ بھی ہے کہ کراچی کی آبادی میں سب سے زیادہ اضافہ ملیر میں ہوا‘ جس کی شرح 105 فیصد سے بھی زیادہ ہے۔ 1998ء میں کراچی کی آبادی 90 لاکھ 33 ہزار تھی یعنی شہرِ قائد کی آبادی میں گزشتہ مردم شماری سے اب تک 60 فیصد اضافہ ہوا ہے... جبکہ لاہور کی آبادی 51 لاکھ 43 ہزار افراد پر مشتمل تھی‘ جس میں 116 فیصد اضافہ ہو چکا ہے۔ لاہور کی آبادی تو ''ڈبل‘‘ سے بھی زیادہ ہو گئی‘ لیکن کراچی کی آبادی کیوں نہ بڑھ سکی؟ اس سوال کا جواب صرف ادارہ شماریات کے پاس ہے۔ منی پاکستان کہلائے جانے والے شہر کراچی کو آبادی کی دوڑ میں پیچھے چھوڑ دیا گیا۔ اعداد و شمار چیخ چیخ کر یہ کہہ رہے ہیں کہ آئندہ مردم شماری میں لاہور کو ملک کا سب سے زیادہ آبادی والا شہر بنا کر سب کو حیران کر دیا جائے گا۔ حالیہ نتائج میں تو لاہور کو پاکستان کا سب سے بڑا ڈویژن بنا دیا گیا ہے‘ جس کی آبادی ایک کروڑ 93 لاکھ جبکہ کراچی ڈویژن کی آبادی ایک کروڑ 60 لاکھ بتائی گئی ہے۔ ماہرین کے مطابق کراچی میں ہزاروں کی تعداد میں کثیر منزلہ عمارتیں موجود ہیں جبکہ لاہور میں عام طور پر چار منزلہ عمارتیں ہیں۔ اس کے علاوہ پورے ایشیا میں سب سے زیادہ کچی آبادیاں کراچی میں ہیں۔ رقبے کے لحاظ سے بھی کراچی اور لاہور میں بہت بڑا فرق ہے... اس لیے آبادی میں فرق قریب کا نہیں بلکہ آدھے آدھے کا ہونا چاہیے۔

معاشی ماہرین کا کہنا ہے کہ کراچی اور لاہور‘ دونوں شہروں کی طرف نقل مکانی ہوئی ہے۔ کراچی میں جو نقل مکانی ہوتی رہی ہے وہ آبادی پنجاب‘ خیبر پختونخوا، باجوڑ، سوات‘ کوئٹہ اور دیگر علاقوں سے آئی ہے‘ جہاں روزگار کے مواقع نہیں ہیں... یا پھر گزشتہ کچھ برسوں سے وہاں جنگ کی صورتحال رہی ہے۔ ایک معاشی ماہر نے یہ دعویٰ کیا ہے کہ مردم شماری کی جب لسانی تفصیلات آئیں گی تو اس میں بھی تبدیلی کے امکانات موجود ہیں... اس میں اردو سپیکنگ کا شیئر کم دکھایا جائے گا جبکہ سندھی اور پشتون بولنے والوں کا شیئر بڑھایا جا سکتا ہے... سرائیکیوں کو پنجابی شمار کیا جاتا ہے یا وہ خود پنجابی بتاتے ہیں اس کا بھی وقت آنے پر معلوم ہو گا۔

کراچی کے ساتھ ایک اور ہاتھ یہ بھی ہوا ہے کہ عارضی رہائشی افراد کو ان کے آبائی علاقے میں گنا گیا ہے۔ اس عمل سے مردم شماری پر تحفظات اور خدشات کو مزید تقویت مل رہی ہے۔ معترضین یہ بھی کہتے ہیں کہ کراچی میں ایک بڑی تعداد ان لوگوں کی ہے جو رہتے کراچی میں ہیں... سڑکیں کراچی کی استعمال کرتے ہیں... سیوریج سسٹم کراچی کا استعمال کرتے ہیں... پانی کراچی کا استعمال کرتے ہیں... گیس کراچی کی استعمال کرتے ہیں... بجلی کراچی کی استعمال کرتے ہیں... تو ان کے حصے کا مالیاتی فنڈ ان کے آبائی علاقوں کو کیسے دیا جا سکتا ہے؟ ایک رپورٹ میں یہ دعویٰ بھی کیا گیا ہے کہ عارضی رہائشی افراد کے حوالے سے خدشات کو دور کرنے کے لئے مصدقہ اعتراضات معلوم کئے جانے کے بعد تیسری پارٹی کے ذریعے ''رینڈم سروے‘‘ بھی کرایا جا سکتا ہے اور قانون میں اس کی گنجائش موجود ہے۔

کراچی کے ایک ٹاؤن پلانر ڈاکٹر عارف حسن کا کہنا ہے کہ کراچی کی آبادی ڈیڑھ کروڑ نہیں ہو سکتی۔ انہوں نے یہ بھی انکشاف کیا کہ کراچی کی آبادی کم ظاہر کرنے کی سیاسی وجوہات ہو سکتی ہیں۔ کراچی کی آبادی بڑھا دیں تو ''سٹیٹس کو‘‘ متاثر ہو سکتا ہے... انہوں نے بھی اس نکتے کو اٹھایا کہ ملیر اورگڈاپ کو دیہی علاقہ غلط شمار کیا گیا کیونکہ ملیر ٹاؤن دیہی علاقہ نہیں ہے اور گڈاپ کا ایک تہائی حصہ دیہی نہیں ہے۔

ایک طرف کراچی کی آبادی کم کی گئی تو دوسری جانب سندھ کی آبادی میں بھی ''ڈنڈی‘‘ ماری گئی ہے... اسی لئے ایم کیو ایم پاکستان کی جانب سے احتجاج کے اعلان کے بعد پیپلز پارٹی بھی میدان میں آ گئی ہے۔ کراچی کی آبادی کم دکھانے کا معاملہ چنگاری سے شعلہ بن سکتا ہے۔ شاید اسی لئے ڈاکٹر فاروق ستار نے آرمی چیف سے انصاف کی اپیل کر دی ہے۔

مردم شماری کے نتائج پر پاکستان کا ہر طبقہ مختلف پلیٹ فارمز پر اظہار خیال کر رہا ہے۔ اس میں سب سے دلچسپ اور چٹکلوں اور طنز بھرے تبصرے سوشل میڈیا پر کئے جا رہے ہیں‘ کیونکہ مردم شماری کے بعد لوگوں کی توقعات کچھ اور تھیں‘ لیکن نتائج کچھ اور آئے، مردم شماری کا عبوری نتیجہ آتے ہی سوشل میڈیا پر بھی شور مچ گیا... جتنے منہ اتنی باتیں شروع ہو گئیں۔ کراچی کی آبادی پر لوگوں نے دل کھول کر فیس بک، ٹوئٹر اور دیگر ویب سائٹس پر اظہار کیا۔ کسی نے کہا‘ آدھا کراچی پوچھ رہا ہے، مردم شماری سے ہمیں کیوں نکالا؟ ... کسی نے تبصرہ کیا‘ بِک گئی ہے مردم شماری۔ یہ بھی لکھا گیا کہ یہ کراچی کی نہیں نیو کراچی کی آبادی ہے۔ ملک کی خواتین کی تعداد مردوں سے کم سامنے آنے پر بھی لطیفے بنائے جا رہے ہیں۔ ایک دل جلے نے یہ پیغام بھی دیا کہ ''جس تناسب سے لاہور کی آبادی بڑھ رہی ہے ایک وقت آئے گا کہ صرف لاہور شہر سے ہی دو تہائی اکثریت لے کر کوئی بھی اپنی حکومت بنا لے گا‘‘۔ مزاحیہ پوسٹس اپنی جگہ مگر سوشل میڈیا پر کراچی والوں نے مردم شماری کے نتائج پر شکوک و شبہات کا دل کھول کر اظہار کیا ہے۔ سوشل میڈیا پر یہ میسیج بھی گردش کر رہا ہے کہ ''اب تو یہ شک پختہ ہو گیا ہے کہ لاہور کے پانی میں کسی نے ''ویاگرا‘‘ملا دیا ہے جبکہ کراچی کے پانی میں ''پودینہ‘‘ شامل کر دیا گیا ہے‘‘... کسی نے یہاں تک کہہ دیا کہ ''سینسس‘‘ کے لئے ''سینس‘‘ سے کام نہیں لیا گیا۔

روزنامہ دنیا ایپ انسٹال کریں