ایک منفرد ترجمۂ قرآن

کیا شب و روز ہیں اور کیسی بحثیں ہیں جن سے زبان و قلم آلودہ ہیں؟

سحری سے پہلے قرآن مجید کھولا۔ سورہ بقرہ سامنے تھی۔ عالم کا پروردگار یہود و نصاریٰ پر اتمامِ حجت کر رہا ہے۔ ساتھ ہی زریتِ ابراہیم کی ایک دوسری شاخ بنی اسماعیل میں سے امتِ مسلمہ کی تاسیس کا اعلان ہو رہا ہے۔ یہود کے جرائم کا ذکر ہے اور میں اس میں اپنا چہرہ دیکھ رہا ہوں۔ اُسی لمحے یہ سوال میرے سامنے آ کھڑا ہوا۔

'البیان‘ زیر مطالعہ ہے۔ استاذ گرامی جاوید احمد صاحب غامدی کا ترجمہ قرآن۔ ترجمہ کیا ہے، ایک جہاںِ نو کی دریافت ہے۔ برسوں سے ' تفہیم القرآن‘ کا سحر طاری ہے۔ سید ابوالاعلیٰ مودودی نے ارادہ کیا کہ عربیٔ مبین کی ترجمانی اردوئے مبین میں ہو۔ اللہ نے انہیں کوثر و تسنیم سے دھلا قلم عطا فرمایا تھا۔ ایک اردو دان کو قرآن مجید سے اس طرح وابستہ کیا کہ وہ اللہ کی کتاب کو اپنے دل پر نازل ہوتا محسوس کرنے لگا۔ قرآن مجید سے جو تعلقِ خاطر مولانا مودودی کے ترجمۂ قرآن سے پیدا ہوا، وہ مجھے 'البیان‘ تک لے آیا۔

زاویۂ فراہی میں جس طرح کتاب اللہ کے عجائب منکشف ہوئے، 'البیان‘ اس کا نقشِ ثالث ہے۔ امام حمیدالدین فراہی نے مدرسہ ٔ اصلاح کے حجرے میں قرآن مجید کے جو معارف دریافت کیے، وہ اس باب کا نقشِ اوّل تھا۔ ان کا زیادہ کام تدبرِ قرآن کے ان اصولوں پر ہے، جن کی بنیاد پر اللہ کی کتاب کے مفاہیم تک رسائی کا یہ مکتب استوار ہوا۔ ان اصولوں کی بنیاد پر انہوں نے قرآنِ مجید کی تفسیر لکھنے کا آغاز کیا۔ حیاتِ مستعار میں وہ چند آخری سورتوں کی تفسیر ہی لکھ پائے۔ ان کے شاگردِ رشید امام امین احسن اصلاحی کو اﷲ نے توفیق دی، انہوں نے اپنے استاذ کے کام کو آگے بڑھایا، اور یوں تدبر قرآن کے نام سے تفسیر کا تاج محل وجود میں آیا۔ مولانا اصلاحی سے یہ شمع جاوید احمد غامدی صاحب کو منتقل ہوئی۔ اللہ نے کرم کیا اور پانچ جلدوں میں یہ ترجمۂ قرآن مکمل ہو گیا۔

تفسیر کے اس مکتب کے کئی امتیازات ہیں۔ دو کی حیثیت اساسی ہے۔ ایک یہ کہ قرآن مجید کی زبان اُم القریٰ، مکہ کی عربیٔ معلیّٰ ہے۔ یہ زبان جانے بغیر قرآن کے اسرار نہیں کھلتے۔ دوسرا یہ کہ قرآن مجید کا ایک نظم ہے۔ یہ نظم آیات میں ہے، سورتوں میں ہے اور پورے قرآن میں ہے۔ قرآن مجید متفرق اقوالِ زریں کا مجموعہ نہیں، ایک مربوط کلام ہے۔ اس نظم کو دریافت کیے بغیر قرآن کے مفاہیم تک رسائی ممکن نہیں۔ ہماری تفسیری روایت میں سب اہلِ علم نے ان باتوں کو تسلیم کیا ہے۔ امام فراہی کا کمال یہ ہے کہ انہوں نے اسے سائنس بنا دیا۔

مولانا امین احسن اصلاحی نے قرآن مجید کے اس نظم کو ترجمہ نہیں، تفسیر میں کھولا ہے۔ اگر تدبر قرآن کا ترجمہ پڑھا جائے تو آیات کا ربط واضح نہیں ہوتا۔ اس کے لیے تفسیر کی طرف رجوع کرنا پڑتا ہے۔ تفسیر ایک سنجیدہ طالب علم کی تشفی کا سامان تو کرتی ہے لیکن قرآن کا عام قاری اس نعمت سے محروم رہتا ہے، جو تفصیلی مطالعے کی مشقت نہیں اٹھا سکتا۔ اس لیے یہ ضرورت باقی تھی کہ قرآن مجید کا نظم خود ترجمے سے ظاہر ہو جائے اور عام قاری بھی کتاب اللہ کے حسن بیان کو جان سکے۔ 'البیان‘ نے اس کمی کو پورا کر دیا ہے۔ نظم کی دریافت کے اس عمل میں شاگرد کئی بار اپنے استاد سے مختلف نتائج تک پہنچا۔ جیسے استاد کو اپنے استاد سے اختلاف کرنا پڑا کہ علم کی روایت ایسے ہی آگے بڑھتی ہے۔

غامدی صاحب نے اس کے دیباچے میں لکھا ہے: ''یہ قرآن مجید کا اردو ترجمہ ہے۔ آں سوئے افلاک کے اس شہ پارہء ادب کا حسنِ بیان تو کسی دوسری زبان میں منتقل کرنا ممکن نہیں۔ میں نے البتہ اس ترجمے میں یہ کوشش کی ہے کہ اس کا مدعا نظمِ کلام کی رعایت سے اردو زبان میں منتقل کر دوں۔ تراجم کی تاریخ میں یہ اس لحاظ سے پہلا ترجمہ قرآن ہے کہ اس میں قرآن کا نظم اس کے ترجمے ہی سے واضح ہو جاتا ہے۔ اس کے لیے مزید کسی شرح و وضاحت کی ضرورت نہیں رہتی‘‘۔

اسلام اس کے سوا کچھ نہیں کہ آخرت کا انذار ہے۔ اسی کی خبر دینے اور اسی کا آوازہ لگانے کے لیے اللہ کے رسول اور نبی مبعوث کیے جاتے رہے۔ ہر رسول نبی ہوتا ہے مگر ہر نبی رسول نہیں ہوتا۔ رسول زمین پر اللہ کی عدالت بن کر آتا ہے اور رسول کے مخاطب قوم کے لیے وہ قیامت اس دنیا میں برپا ہو جاتی ہے جو ایک دن سارے عالمِ انسانیت کے لیے برپا ہونی ہے۔ رسول اتمامِ حجت کا نام ہے۔ سیدنا محمدﷺ منصبِ رسالت ہر فائز تھے۔ اللہ نے آپ کی صورت میں آخری بار اتمامِ حجت کر دیا۔ قرآن مجید رسالت مآبﷺ کی سرگزشتِ انذار ہے۔ اس سرگزشت کے کئی مراحل ہیں۔ انذار، انذارِ عام، اتمامِ حجت، ہجرت و برات اور رسول کی مخاطب قوم کے لیے جزا و سزا کا بیان۔

مو لانا اصلاحی کے نزدیک اس سرگزشت کے حوالے سے قرآن مجید کے مضامین سات ابواب پر مشتمل ہیں۔ ان کا کہنا ہے کہ قرآن مجید نے خود کو 'سبع من المثانی‘ کہہ کر اس جانب اشارہ کر دیا ہے (سورہ حجر)۔ سات جوڑے (مثانی) سے مراد یہ ہے کہ ہر باب میں سورتیں جوڑے کی صورت میں ہیں۔ عام طور پر ہر باب ایک یا ایک سے زیادہ مکی سورتوں سے شروع ہوتا اور ایک یا ایک سے زیادہ مدنی سورتوں پر ختم ہو جاتا ہے۔ اکثر سورتیں توام ہیں جیسے بقرہ اور آلِ عمران۔

قرآن مجید کا نظم کس طرح نفسِ مضمون کی تفہیم پر اثر انداز ہوتا ہے، اس کا اندازہ 'البیان‘ کے مطالعے سے ہوتا ہے۔ اس امت کا اجماع ہے کہ قرآن مجید کی موجودہ ترتیب توقیفی یعنی اللہ کی طرف سے ہے۔ یہ وہ ترتیب نہیں ہے جس میں قرآن نازل ہوا۔ ظاہر ہے کہ یہ بات کسی حکمت سے خالی نہیں۔ اسی حکمت کو دریافت کرنے کا نام نظمِ قرآن ہے۔ ہماری تفسیری روایت میں اس کا اعتراف کرنے کے باوجود اس نظم کو دریافت کرنے کی کوئی سنجیدہ اور مربوط کوشش سامنے نہیں آئی۔ یہ نظم دریافت نہیں کیا جا سکتا جب تک ام القریٰ کی زبان پر دسترس نہ ہو۔ اس کے لہجے اور اسالیب سے واقفیت نہ ہو۔ امام فراہی نے 'اسالیب القرآن‘ جیسی کتابیں لکھ کر یہ بات واضح کر دی۔

یہ آسان کام نہیں تھا۔ اس کے لیے امام فراہی جیسے عبقری کی عمر لگ گئی۔ امام اصلاحی نے نصف صدی اس کی نذر کی۔ جاوید غامدی صاحب کی تنہائیاں بھی کم و بیش پچاس سال سے اسی پر غور و فکر سے آباد ہیں۔ اس طرح 'البیان‘ یہ کہا جا سکتا ہے کہ تین نسلوں کا حاصل ہے۔ لوگ خیال کرتے ہیں کہ یہ چند سالوں کا معاملہ ہے۔ جاوید غامدی کسی ٹی وی چینل کی دریافت کا نام نہیں۔ یہ پچاس سال کی ریاضت کا حاصل ہے۔ ان کی جن آرا پر آج لاعلمی کے باعث حاشیے چڑھائے جاتے ہیں‘ ان میں سے اکثر 1970ء کی دہائی میں سامنے آ چکی تھیں۔ 1988ء سے تو میں براہ راست ان سے واقف ہوں۔

'البیان‘ میں مختصر حواشی بھی ہیں۔ تاہم ترجمہ بڑی حد تک تفسیر سے بے نیاز کر دیتا ہے۔ الا یہ کہ کوئی کسی فقہی یا کلامی مسئلے پر مزید تفصیل کا طالب ہو۔ ان دنوں سورہ بقرہ سامنے ہے۔ یہود کے جرائم کا تذکرہ ہے۔ کیسے انہوں نے اللہ تعالیٰ سے میثاق باندھا اور توڑا۔ بار بار باندھا اور توڑا۔ ترجمے میں نظم ایسے واضح ہے کہ کہیں سلسلہ کلام ٹوٹنے نہیں پاتا۔ معلوم ہو جاتا ہے کہ کہاں عالم کا پروردگار یہود سے میری طرف رخ کرتا ہے اور مجھے عبرت دلاتے ہوئے متوجہ کرتا ہے کہ میں نے بھی اپنے اللہ سے ایک میثاق کر رکھا ہے۔

کیا مجھے اس کا احساس ہے۔ رمضان کے شب و روز ہیں۔ میرا مالک بطورِ خاص میری طرف متوجہ ہے اور میں کہاں متوجہ ہوں؟

روزنامہ دنیا ایپ انسٹال کریں