امتِ مسلمہ یا عالمِ اسلام؟

'او آئی سی‘ مسلم دنیا کی نمائندہ ہے یا امتِ مسلمہ کی؟ اس سے وابستہ ہماری توقعات حقیقی ہیں یا خیالی؟

امتِ مسلمہ، ایک روحانی اور مذہبی تصور ہے۔ اس زمین پر آباد ہر آدمی جو نبیﷺ کو آخری نبی و رسول اور اسلام کو اپنا دین مانتا ہے، اس میں شامل ہے۔ بھارت کے کروڑوں مسلمان اس کا حصہ ہیں اور امریکہ کے لاکھوں مسلمان بھی۔ 'عالمِ اسلام‘ سے مراد وہ ریاستیں ہیں جہاں مسلمان اکثریت میں ہیں اور زمامِ کار ان کے ہاتھ میں ہے۔ عالمِ اسلام کی یہی تعریف معروف ہے۔ او آئی سی ان ممالک کی نمائندہ ہے، امتِ مسلمہ کی نہیں۔

مسلم ممالک کی تشکیل قومی ریاست کے ماڈل پر ہوئی ہے۔ تمام مسلمان ممالک دراصل قومی ریاستیں ہیں۔ ایسی ریاستیں جن کی اساس نسل اور جغرافیہ ہے۔ سعودی عرب، عربوں کا ملک ہے اور ترکی ترکوں کا۔ یہ اساس ان ممالک کے مفادات کا تعین کرتی ہے۔ یہ ممالک جو حکمتِ عملی اختیار کرتے ہیں، اس کا تعلق ان کے قومی مفادات سے ہوتا ہے۔

سعودی عرب اور بھارت کے تعلقات کو اگر قومی ریاست کے پس منظر میں دیکھا جائے تو اس میں کوئی بات اچنبھے کی نہیں ہے۔ مسئلہ اس وقت پیدا ہوتا ہے جب ہم امتِ مسلمہ کو ایک سیاسی وحدت سمجھتے ہوئے، سعودی عرب سے یہ توقع رکھتے ہیں کہ وہ مقبوضہ کشمیر کے مسلمانوں کی تائید میں کھڑا ہو جائے گا۔ ہم ایسا اس لیے سمجھتے ہیں کہ ہمارے خیال میں امتِ مسلمہ ایک سیاسی وجود کا نام ہے اور اس کا حصہ ہوتے ہوئے ہر مسلمان ملک کے لیے لازم ہے کہ وہ اہلِ کشمیر کے ہمقدم ہو۔

کشمیر کے مسئلے کو ایک دوسرے زاویے سے دیکھیے۔ او آئی سی کا قیام ایک بڑے واقعہ کے پس منظر میں ہوا۔ یہ مسجد اقصیٰ کو آگ لگانے کا واقعہ تھا۔ اس پر مشترکہ ردِ عمل کیلئے عالمِ اسلام کی ایک کانفرنس بلائی گئی جو او آئی سی کے تصور میں ڈھل گئی۔ اب مقدس مقامات کی حفاظت اور فلسطین کی آزادی، او آئی سی کے چارٹر کا حصہ بن گئے۔ قوموں کے حقِ خود ارادیت کو اگر چہ اس چارٹر میں شامل کیا گیا ہے لیکن کشمیر کا مسئلہ اس کا حصہ نہیں بن سکا۔ گویا او آئی سی کی نظر میں فلسطین اور کشمیر کے قضیے یکساں حیثیت نہیں رکھتے۔

1969ء میں، جب پہلی اسلامی سربراہی کانفرنس کی تیاری ہو رہی تھی، بھارت نے درخواست کی کہ اسے او آئی سی کا رکن بنایا جائے۔ اس درخواست کو رد کر دیا گیا؛ تاہم بھارت کی اپیل پر اجلاس میں بھارت کے مسلمانوں کی نمائندگی کیلئے وفد بھیجنے کی اجازت دی گئی۔ رباط میں بھارت کے سکھ سفیر سے کہا گیا کہ وہ ابتدائی اجلاس میں بھارت کی نمائندگی کرے۔ پاکستان نے اس پر احتجاج کیا کہ بھارت میں جب مسلمانوں کا قتلِ عام ہورہا ہے، ایک غیرمسلم کیسے ان کی نمائندگی کر سکتا ہے؟ یہ احمد آباد کے فسادات کا حوالہ تھا جو ان دنوں میں جاری تھے۔ اب پاکستان مقبوضہ کشمیر کے مسلمانوں کی نمائندگی کرتا ہے مگر آج تک اس کا کوئی ٹھوس نتیجہ نہیں نکل سکا۔

امت کے مذہبی تصور اور عالمِ اسلام کی سیاسی تشکیل سے کچھ اور مسائل بھی پیدا ہوئے‘ جیسے 1974ء میں یوگنڈا کو او آئی سی کا رکن بنایا گیا، درآں حالیکہ وہاں کی اکثرت غیرمسلم تھی اگرچہ ان کا صدر مسلمان تھا۔ بعد میں ایک مسیحی ان کا صدر بن تومسئلہ پیدا ہواکہ وہ 'عالمِ اسلام‘ کا حصہ ہے یا نہیں؟ 1981ء میں تیسری اسلامی سربراہی کانفرنس کا افتتاحی اجلاس بیت اللہ میں رکھا گیا۔ لبنان او آئی سی کا حصہ مگر وہاں کا صدر مسیحی ہے۔ اب مسئلہ یہ ہے کہ غیرمسلم بیت اللہ کی حدود میں داخل نہیں ہوسکتا، اس لیے انہیں اجلاس میں شرکت سے روکنا پڑا۔

یہ توایسے مسائل ہیں جن کا تعلق امت اور قومی ریاست جیسے تصورات کے باب میں مسلم فکر کے ابہام سے ہے۔ بعض مسائل وہ ہیں جوعملی نوعیت کے ہیں۔ مثال کے طور پر اوآئی سی قائم ہوئی تو چار بڑے ادارے بنائے گئے۔ ان میں سے ایک عالمی اسلامی عدالت بھی تھی۔ اس کا ایک مقصد مسلم ممالک میں پیدا ہونے والے باہمی تنازعات کو حل کرناہے۔ عراق اور ایران میں آٹھ برس جنگ جاری رہی۔ سعودی عرب اور یمن میں جنگ جاری ہے۔ آج تک اس فورم سے کوئی ایسا جھگڑا طے نہیں ہوسکا۔ اس میں اگرچہ یہ لکھا ہے کہ یہ عدالت اسی وقت موثر ہوگی جب فریقین، اس کے فیصلے کو قبول کر نے پرآمادہ ہوں۔ آج تک یہ آمادگی پیدا نہ ہوسکی۔

فلسطین کا مسئلہ چارٹر کا حصہ ہونے کا باوجود جس نہج پر آگے بڑھ رہا ہے، وہ ہمارے سامنے ہے۔ اسرائیل کو تسلیم کرنے کے باب میں عالمِ اسلام کی آمادگی بڑھتی چلی جارہی ہے۔ عربوں کی مزاحمت ختم ہوچکی۔ ترکی اسرائیل کے ساتھ اپنے تعلقات کو بہتر بنا رہا ہے۔ گویا ایک مسئلہ چارٹر کا حصہ ہوتے ہوئے بھی غیر اہم ہوگیا ہے۔ اسلام آباد میں ہونے والی کانفرنس میں، متن تو دور، حاشیے میں بھی مسئلہ فلسطین دکھائی نہیں دیا۔

یہ وہ بے رحم زمینی حقیقتیں ہیں جن سے صرفِ نظر ممکن نہیں۔ اس میں یہ سبق پوشیدہ ہے کہ وہ مسئلہ جو او آئی سی کے قیام کا محرک بنا، اگر آج اتنا غیر اہم ہو گیا ہے کہ زیبِ داستاں کے لیے بھی شامل نہیں تو مسئلہ کشمیر کے حل کے لیے، یہ فورم کیسے موثر ہو سکتا ہے۔ اس کا یہ مطلب ہرگز نہیں کہ یہ فورم ختم کر دینا چاہیے۔ ضرورت اس بات کی ہے کہ او آئی سی کے بارے میں ہم اپنے تصورات درست کریں تاکہ ہم اس فورم سے کوئی ایسی توقع نہ باندھیں جوپوری نہ ہو سکے اورپھر ہمارے لیے دل شکنی کا باعث بنے۔ میں اگر اپنی بات کا خلاصہ کروں تو اسے چند نکات کی صورت میں بیان کیا جا سکتا ہے:

1۔ امتِ مسلمہ ایک روحانی اور مذہبی تصور ہے۔ اس اعتبار سے ساری دنیا کے مسلمان بھائی بھائی ہیں۔ یہ کسی سیاسی وحدت کا نام نہیں۔

2۔ اوآئی سی مسلم ممالک کا ایک فورم ہے۔ وہ ممالک جو قومی ریاست کے تصور کے مطابق قائم ہوئے ہیں۔ ان ممالک سے یہ توقع نہیں کی جانی چاہیے کہ یہ اپنے قومی مفادات سے بے نیاز ہوکر کوئی حکمتِ عملی اختیار کریں گے۔

3۔ او آئی سی یورپی یونین کی طرح کوئی اتحاد نہیں بن سکتا۔ اس کی وجہ یہ ہے کہ یورپ کے ممالک ایک طرف جغرافیائی وحدت رکھتے ہیں اور دوسری طرف وہ باہمی جھگڑوں سے نکل چکے۔ مسلم دنیا، ایک تو مختلف علاقوں میں پھیلی ہوئی ہے اوردوسرا، اس کا بھی کوئی امکان نہیں کہ باہمی جھگڑوں سے بلند ہوسکے۔

4۔ اوآئی سی کوایک معاشی اتحاد بنایا جا سکتا، وہ بھی ایسے منصوبوں کے ساتھ جن سے باہمی مفادات متاثرنہ ہوں۔ یہ بھی آسان نہیں۔ گوادر اور چاہ بہار ہی کی مثال کوسامنے رکھ لیں تو بات سمجھ میں آ جائے گی؛ تاہم اگر مسلم قیادت بالغ نظر ہوتو اس باب میں پیشرفت ممکن ہے۔

5۔ اسلاموفوبیا جیسے مسائل پریکساں موقف اپنایا جا سکتا ہے جن کا تعلق اسلام کے تعارف اوراس کے بارے میں پھیلائی گئی غلط فہمیوں کے ازالے سے ہے۔

اگر یہ سب نکات سامنے رہیں تو ہم اس مایوسی سے بچ سکتے ہیں جو اوآئی سی کے حوالے سے ہمارے ہاں پائی جاتی ہے۔ خرابی او آئی سی میں نہیں، ان توقعات میں ہے جو خیالی اور رومانوی ہیں۔

روزنامہ دنیا ایپ انسٹال کریں