چند روزہ وزارت کیلئے آخرت خراب کرنے کو تیار نہیں، مصطفی کمال
اسلام آباد(مانیٹرنگ ڈیسک)وفاقی وزیر صحت سید مصطفی کمال نے کہا ہے کہ وزارت صحت سب سے خطرناک وزارت ہے، یہاں براہ راست انسانوں سے ڈیلنگ ہے، غلطی کی گنجائش نہیں، دوسری وزارتوں کی طرح نہیں کہ کوئی غلطی ہوئی تو درست کرلی گئی۔
کراچی میں میڈیا سے گفتگو کرتے ہوئے انہوں نے کہا کہ جب کوئی انسان دکھ یا بیماری میں مبتلا ہوتا ہے تو وہ اسپتالوں میں جاتا ہے، یہ وزارت چند دنوں کی ہے، مجھے اللہ نے اگر یہاں مخلوق کی خدمت کے لیے رکھا ہے تو میں اپنا کام کروں گا، دستیاب وسائل کو برائے کار لاکر عوام کی تکلیف کم کرنے کی کوشش کریں گے تو میں سمجھوں گا ہم کامیاب ہوگئے ۔مصطفی کمال نے کہا کہ چند روز کی وزارت کے لیے میں آخرت خراب کرنے کو تیار نہیں ہوں، اسلام آباد کے علاوہ ہمارے پاس براہ راست اسپتال نہیں ہیں، ہمارے یہاں جو ریگولیشنز ہیں، پاکستان میڈیکل اینڈ ڈینٹل کونسل (پی ایم ڈی سی)، ڈرگ ریگولیٹری اتھارٹی آف پاکستان (ڈریپ) اور نرسنگ کونسل کا نظام ہے، ہم ایسی پالیسیاں لانا چاہتے ہیں جن کے اثرات نیچے تک جاسکیں اور لوگوں کے صحت کے مسائل کم ہوں۔وفاقی وزیر نے کہا کہ آنے والے دنوں میں مثبت تبدیلیاں دکھائی دیں گی، چیزیں بہتر ہوتی ہوئی نظر آئیں گی، سرکاری اسپتالوں میں علاج کی صورتحال کو بہتر بنانے پر توجہ دی جارہی ہے ، 70 فیصد ایسے لوگ اسپتالوں میں جاتے ہیں جنہیں اسپتال جانے کی ضرورت ہی نہیں، یہ اس وجہ سے ہے کہ ہمارے پاس بیسک ہیلتھ یونٹ کی سہولتیں ہی نہیں، دنیا بھر میں اسپتالوں میں وہ مریض جاتے ہیں جنہیں بیسک ہیلتھ یونٹس کی جانب سے ریفر کیا جاتا ہے ، چھوٹے مسائل تو ٹیلی میڈیسن کی سطح پر حل کیے جاتے ہیں۔
مصطفی کمال نے کہا کہ آنے والے دنوں میں انقلابی اقدامات کریں گے ، تاہم پاکستان میں وہ وقت کبھی نہیں آئے گا کہ ہم ہر بیمار شہری کو صحت کی سہولت فراہم کرسکیں، تاہم ہم نے ایسے نظام کی ابتدا کردی ہے ، جس کے ذریعے ہر شہری کو علاج کی سہولت دستیاب ہوسکے گی۔ انہوں نے شکوہ کیا کہ کراچی میں بجلی کی ایک کمپنی کو اجارہ داری دی گئی ہے ، دنیا بھر میں لوگوں کے پاس مختلف کمپنیوں سے بجلی خریدنے کا آپشن ہوتا ہے ، کراچی میں ایک ہی بجلی کمپنی کی اجارہ داری کا نظام ختم کرنے کی ضرورت ہے ۔ انہوں نے کہا کہ سندھ بلڈنگ کنٹرول اتھارٹی (ایس بی سی اے) کی جانب سے رہائشی پلاٹوں کو کمرشل میں تبدیل کرنے کی مخالفت کرتے ہیں، نئی قانون سازی سے شہر تباہ ہوجائے گا، تمام غیرقانونی تعمیرات قانونی ہوجائیں گی، کراچی سے معمولی سے ہمدردی رکھنے والی انتظامیہ بھی ایسا نہیں کرسکتی، آج کراچی بد ترین شہروں میں شامل ہوگیا ہے ۔مصطفی کمال نے کہا کہ وزیراعظم کی جانب سے بجلی کی قیمت میں کمی کے فیصلے سے معلوم ہوتا ہے کہ یہ حکومت عوام کی مشکلات کو کم کرنے کے لیے مشکل فیصلے بھی کرسکتی ہے، یہ بہت بڑا ریلیف ہے ، جو آج کے اس مہنگائی کے دور میں عوام کو دیا گیا ہے، ابھی کوئی آئیڈیل سچویشن نہیں ہوگئی ہے ، لیکن یہ بھی بہت بڑا کام ہے جو عوام کے لیے شہباز شریف نے کیا ہے ۔انہوں نے کہا کہ میں بجلی کی قیمتوں میں کمی پر صنعتکاروں کو بھی مبارکباد پیش کرتا ہوں۔
