جاوید ملاح قتل کیس میں نامزد دو ملزمان کی ضمانت منظور
حیدرآباد(نمائندہ دنیا)سندھ ہائی کورٹ، حیدرآباد سرکٹ بینچ نے بدین کے گاؤں گل محمد ملاح کے رہائشی جاوید ملاح کے قتل کیس میں نامزد دو ملزمان امجد ملاح اور مہتاب ملاح کی ضمانتیں منظور کر لیں۔
عدالت نے امجد ملاح کی 50 ہزار اور مہتاب ملاح کی 25 ہزار روپے کے مچلکوں کے عوض رہائی کا حکم جاری کیا۔جسٹس محمد عثمان ہادی پر مشتمل سنگل بینچ کے روبرو دونوں ملزمان نے اپنے وکلا ایڈووکیٹ الطاف سچل اعوان اور ایڈووکیٹ فاطمہ زہرہ انصاری کے ذریعے درخواستیں دائر کی تھیں۔ وکلا نے مؤقف اختیار کیا کہ سیکنڈ ایڈیشنل سیشن جج بدین نے دونوں کی ضمانتیں مسترد کر کے جیل بھیج دیا تھا، حالانکہ کیس میں ان کا کوئی براہ راست کردار نہیں۔وکلا نے مزید کہا کہ قتل کیس کا مرکزی ملزم شکیل ملاح ہے ، جو مدعی فریق سے مبینہ ساز باز کے بعد ضمانت پر آزاد ہے ۔ عدالت نے فریقین کے دلائل سننے کے بعد ملزمان کی ضمانت منظور کرتے ہوئے ان کی فوری رہائی کا حکم دے دیا۔
