ای چالان کے حوالے سے شہریوں کیلئے سہولت متعارف
ٹریفک ہیلپ لائن 1915 اور ایس ایس پی ٹریفک ساؤتھ کمپلیکس کا افتتاحہیلپ لائن شہریوں اور پولیس کے درمیان رابطے مزید موثر بنائے گی،آئی جی
کراچی (مانیٹرنگ ڈیسک)سندھ پولیس نے فیس لیس ای ٹکٹنگ (ای چالان) کے حوالے سے شہریوں کیلئے زبردست سہولت متعارف کروا دی۔آئی جی سندھ غلام نبی میمن نے ٹریفک ہیلپ لائن 1915 اور ایس ایس پی ٹریفک ساؤتھ کمپلیکس کا افتتاح کر دیا، ٹریفک ہیلپ لائن 1915 سینٹرل پولیس آفس کراچی جبکہ ایس ایس پی ٹریفک آفس ساؤتھ آرٹلری میدان میں قائم کیا گیا ہے ۔افتتاحی تقاریب میں ایڈیشنل آئی جی کراچی، ڈی آئی جیز ٹریفک، ٹریننگ، ایس ایس پیز ٹریفک ساوتھ، اے وی ایل سی، پی ڈی آئی ٹی سمیت دیگر سینئر افسران بھی موجود تھے ۔ڈی آئی جی ٹریفک کراچی پیر محمد شاہ نے ٹریفک ہیلپ لائن اور ایس ایس پی ٹریفک ساؤتھ کے دفتر سے متعلق بریفنگ دی۔انہوں نے بتایا کہ ٹریفک 1915 کو ڈیجیٹلائزڈ کر دیا گیا ہے ، اب شہری گھر بیٹھے 1915 کے ذریعے ای چالان کے بارے میں باآسانی معلومات حاصل کر سکتے ہیں۔ آئی جی سندھ نے کہا کہ جدید سہولیات سے آراستہ دفاتر ٹریفک پولیس کی کارکردگی میں مؤثر کردار ادا کرتے ہیں، ای چالان کے آغاز کے بعد سہولت سینٹرز موثر کردار ادا کر رہے ہیں، ٹریفک ہیلپ لائن 1915 فی زمانہ شہریوں کو فوری رہنمائی اور شکایات کے ازالے کیلیے ایک جدید سہولت ہے ۔غلام نبی میمن نے مزید کہا کہ ٹریفک ہیلپ لائن 1915 شہریوں اور ٹریفک پولیس کے درمیان رابطے کو مزید مؤثر بنائے گی۔
