فوڈ سکیورٹی اینڈ ایگریکلچر،محکمہ زراعت کے اشتراک سے تقریب
لاہور (سٹاف رپورٹر)محکمہ زراعت پنجاب اور اس کے سٹریٹجک شراکت دار، فوڈ سکیورٹی اینڈ ایگریکلچر سنٹر آف ایکسیلینس(FACE) جو کہ ایک غیر منافع بخش تنظیم ہے کے اشتراک سے تقریب منعقد کی گئی۔
یہ شراکت داری پنجاب میں جدید زرعی طریقوں کے فروغ کی جانب ایک اہم پیش رفت ہے ، جس کا مقصد فیلڈ افسروں کی صلاحیتوں میں اضافہ کرنا ہے تاکہ وہ جدید فصلوں کے انتظام اوراے آئی پر مبنی زرعی ٹیکنالوجی کو مؤثر انداز میں اپنا سکیں۔اس اشتراک کے تحت کئی اہم اقدامات کئے جا رہے ہیں جن میں فیلڈ افسروں کیلئے فصل کی پیداوار میں اضافہ، سیٹلائٹ ڈیٹا کا استعمال، ڈرون کے ذریعے زرعی ایپلیکیشنز اور مخصوص فصلوں کے حوالے سے سیمینارز شامل ہیں۔ عالمی معیار کی تربیت کو یقینی بنانے کیلئے فیس نے بین الاقوامی زرعی ماہرین کی خدمات حاصل کی ہیں۔اس منصوبے کا ایک اہم پہلو 60 مقامات پر ڈیجیٹل پیسٹ ٹریپس کی تنصیب ہے ۔ یہ جدید ٹیکنالوجی کیڑوں کی بروقت نشاندہی اور شناخت میں مدد دیتی ہے ۔علاوہ ازیں FACE نے زرعی یونیورسٹیوں کے 30 طلبا کا انتخاب کیا ہے جنہیں تین ماہ کی پیڈ انٹرن شپ فراہم کی جا رہی ہے ۔ تقریب میں سیکرٹری زراعت، فیلڈ افسروں ، تعلیمی اداروں کے نمائندگان، کسانوں اور FACE کی انتظامیہ سمیت متعدد سٹیک ہولڈرز نے شرکت کی۔
