ایران فرار ہونے والے 2 ملزم انٹرپول کی مدد سے گرفتار
سرگودھا (سٹاف رپورٹر)چار سال قبل قتل کر کے بیرونِ ملک فرار ہونے والے دو ملزموں کو ایران سے انٹرپول کی مدد سے گرفتار کر لیا گیا۔ حسن جلیل اور فخر عباس تھانہ بھیرہ کو مطلوب تھے ۔ ملزموں نے اکتوبر 2021 میں حماد علی رضا کو اغوا کرکے قتل کر دیا تھا اور بعدازاں بیرون ملک فرار ہوگئے تھے ۔
پولیس کو یہ دونوں چار سال سے مطلوب تھے ۔قتل میں ملوث دیگر دو ملزموں کو پولیس پہلے ہی گرفتار کر چکی ہے ، جنہیں عدالت سزائے موت سنانے کا حکم جاری کر چکی ہے ۔ سپیشل آپریشنز سیل کی ٹیم نے جدید ٹیکنالوجی کا استعمال کرتے ہوئے مرکزی ملزموں کا سراغ لگایا اور قانونی تقاضے مکمل کرنے کے بعد انہیں انٹرپول کے ذریعے ایران سے گرفتار کیا۔آر پی او محمد شہزاد آصف خان نے کہا کہ آئی جی پنجاب کی ہدایات کے مطابق بیرون ملک فرار تمام اشتہاریوں کی گرفتاری کے لیے مربوط اور مؤثر کارروائیاں جاری ہیں۔
