لوگ آج بھی معین اخترکے بارے میں پوچھتے ہیں :انورمقصود
کراچی (شوبزڈیسک ) عالمی شہرت یافتہ مصنف، مزاح نگار اور میزبان انور مقصودنے کہاہے کہ آج بھی لوگ معین اختر کے ساتھ ان کے پروگرام کی پرانی ویڈیوز دیکھتے ہیں تو ان سے متعلق سوالات کرتے ہیں۔
انور مقصود نے اپنی اہلیہ عمرانہ مقصود کے ہمراہ ایک انٹرویو میں مرحوم معین اختر کی یادوں کو تازہ کرتے ہوئے ان سے جڑے دلچسپ واقعات کا ذکر کرتے ہوئے کہا کہ وہ اب بھی یقین نہیں کر سکتے کہ معین اختر ہم میں نہیں رہے ، لوگ آج بھی ان سے پوچھتے ہیں کہ کیا وہ اور معین اب بھی ساتھ کام کرتے ہیں، کیونکہ اکثر لوگ ان کی پرانی ویڈیوز دیکھتے ہیں اور سمجھتے ہیں کہ یہ حالیہ تبصرے ہیں۔انہوں نے مزاحیہ انداز میں کہا کہ معین کو ہم سے بچھڑے 12 سال ہو چکے ہیں، لیکن جب لوگ یہ سوال کرتے ہیں تو وہ یہی جواب دیتے ہیں کہ ‘ملک کے حالات ہی نہیں بدلے ، جو اس وقت تھا وہی آج بھی ہے اور شاید مستقبل میں بھی یہی رہے گا۔’
