فضل الرحمن نے احتجاج کرنا ہے تو پختونخوامیں کریں :بلاول
اسلام آباد(سٹاف رپورٹر، نیوز ایجنسیاں )چیئرمین پیپلزپارٹی بلاول بھٹوزرداری نے کہاہے کہ مولانا فضل الرحمن کو احتجاج کرنا ہے تو کے پی میں کریں۔پیپلزپارٹی کے چیئرمین بلاول بھٹوزرداری نے پریس کانفرنس سے خطاب میں کہا کہ مولانا فضل الرحمن احتجاج کریں مگر احتجاج حقیقت پر مبنی ہونی چاہیے ۔
مولانا تحقیقات کریں ان کے لوگ غلط بیانی کر رہے ہیں۔انہوں نے کہا کہ پارلیمنٹ کے مشترکہ اجلاس میں اپوزیشن کے احتجاج سے دنیا کو غلط پیغام گیا۔ اپوزیشن کا احتجاج جمہوری نہیں تھا۔ پارلیمانی دائرے میں اپوزیشن کی تنقید کو ویلکم کرتے ہیں۔بلاول بھٹو کا مزید کہنا تھا کہ صدر آصف زرداری نے ساتویں بار پارلیمنٹ سے خطاب کرکے تاریخ رقم کی۔ عوام اورکمزور معاشی حالات سے ملک کو نکالنے کے لیے روڈ میپ دیا۔ بدقسمتی سے اپوزیشن نے اپنی الگ تاریخ رقم کی۔انہوں نے کہا کہ سیاست آپ کا حق ہے تاہم خارجہ پالیسی پر سب کو ایک ہونا چاہیے ۔ مشترکہ اجلاس میں موجود سفیر اپنے ممالک کو اپوزیشن کے کردار پر سائفر بھیجیں گے ۔بلاول بھٹو زرداری نے کہا کہ وفاقی کابینہ میں شامل نہ ہونے کا فیصلہ حتمی ہے جبکہ بلوچستان میں کابینہ کی تشکیل (ن) لیگ کی مشاور سے کی جائے گی ۔
