پھولنگر،قصور:خاتون سمیت 2افراد قتل
قصور(نمائندہ دنیا) پھولنگر اور قصور میں مبینہ طور پر خاتون سمیت 2افراد کوقتل کر دیا گیا۔ نتھے خالصہ کے رہائشی ماجد اصغر نے پولیس تھانہ صدر پھول نگر کوبتایا میری 32سالہ بیوی نسیم بی بی والدین کو ملنے کیلئے میکے گئی۔
جب میں اسے لینے کیلئے گیا تو سسر دلاور نے بتایا تمہاری بیوی وفات پاگئی ،کمرے میں گیا تو وہ مردہ حالت میں پڑی تھی جس کے جسم پر تشدد کے نشانات تھے ۔ مجھے شبہ ہے کہ میرے برادر نسبتی وکیل احمد وغیرہ نے اسے قتل کیا ہے ۔ کوٹ غلام محمدخاں قصور کی رہائشی حافظہ مریم ثاقب نے پولیس تھانہ اے ڈویژن قصور کو بتایا میرا شوہر ثاقب حسین نسیم حیات روڈ قصور پر نجی سکول کے سامنے موٹرسائیکل پر جارہاتھا کہ پکی حویلی ہزارہ راجہ جنگ کے رہائشی راؤ کاشف علی خاں ساتھیوں کے ہمراہ موٹرسائیکل پر آیا اور میرے خاوند کی موٹرسائیکل کے قریب پہنچ کر اُسے فائرمارکر موت کے گھاٹ اُتار دیا۔
