موسمیاتی تبدیلی ،متبادل فنانسنگ فریم ورک پر کام جاری
اسلام آباد (وقائع نگار)وزارت منصوبہ بندی پاکستان میں موسمیاتی تبدیلی کے اثرات سے نمٹنے کیلئے متبادل فنانسنگ فریم ورک پر کام جاری ہے ۔
اس فریم ورک کا مقصد موسمیاتی منصوبوں کیلئے مختلف مالیاتی ذرائع تلاش کرنا ہے تاکہ قومی خزانے پر دباؤ کم ہو اور ترقیاتی منصوبے پائیدار انداز میں مکمل کیے جا سکیں۔ فریم ورک کے حوالے سے ہونے والی اجلاس میں، وزیر منصوبہ بندی ترقی واصلاحات وخصوصی اقدامات پروفیسر احسن اقبال نے وزارت کے موسمیاتی تبدیلی کے سیکشن کو ہدایت کی کہ وہ موسمیاتی تبدیلی اور آفات سے متعلق تیاریوں اور ردعمل کے پروگراموں کا متبادل پروگرام تیار کریں ۔اجلاس کو بتایا گیا کہ سندھ کوسٹل ہائی وے ، جو موسمیاتی خطرات سے سب سے زیادہ متاثر ہے ، کو موسمیاتی تبدیلی تعمیراتی ماڈل کے تحت بنایا جائے گا تاکہ کلائمیٹ فنانس کے لیے اہل ہو سکے ،میٹنگ کے دوران یہ بات بھی زیر غور آئی کہ وزارت مالیاتی انتظام بشمول بانڈز، گارنٹی اور مکسڈ مالیاتی ماڈلز کو قومی اور ذیلی ترقیاتی منصوبہ بندی میں ضم کرنے کیلئے جامع فریم ورک بھی تیار کرے گی۔
