گوہر کی آرمی چیف سے ملاقات کی تصدیق،سیاسی رنگ دینا افسوسناک:سکیورٹی ذرائع

گوہر کی آرمی چیف سے ملاقات کی تصدیق،سیاسی رنگ دینا افسوسناک:سکیورٹی ذرائع

اسلام آباد(خصوصی نیوز رپورٹر،دنیا نیوز) تحریک انصاف کے چیئرمین بیرسٹر گوہر علی خان نے آرمی چیف سے ملاقات کی تصدیق کردی۔اڈیالہ جیل کے باہر میڈیا سے غیر رسمی گفتگو کرتے ہوئے چیئرمین پی ٹی آئی بیرسٹر گوہر خان کا کہنا تھا کہ پشاور میں میری اور علی امین گنڈا پور کی آرمی چیف سے ملاقات ہوئی ہے ، آرمی چیف سے ملاقات خوش آئند ہے ۔

انہوں نے کہا کہ ملاقات میں آرمی چیف کے سامنے پی ٹی آئی کے تمام معاملات اور مطالبات رکھے ہیں، امید ہے اب صورتحال بہتر ہو جائے گی، مذاکرات خوش آئند ہیں، میں شروع سے یہی کہہ رہا تھا چیزیں بہتر ہونی چاہئیں۔بیرسٹر گوہر کا مزید کہنا تھا کہ آرمی چیف سے ملاقات میں ملکی استحکام کے حوالے سے تمام امور پر بات چیت ہوئی، دوسری جانب سے بھی مثبت جواب ملا ہے ۔ دریں اثنا سکیورٹی ذرائع کا کہنا ہے آرمی چیف کی بیرسٹرگوہر اور علی امین گنڈاپور سے پشاور میں بات چیت سکیورٹی صورت حال پر ہوئی، دونوں رہنما ئوں سے بات چیت انسداد دہشت گردی کے معاملات کے تناظر میں ہوئی، سکیورٹی معاملات پر بات چیت کو سیاسی رنگ دینا مناسب نہیں، کوشش کی گئی ہے کہ سکیورٹی معاملات پر ہونے والی بات چیت کو سیاسی رنگ دیا جائے جو افسوس ناک ہے ، سکیورٹی ذرائع نے وزیراعلیٰ خیبرپختونخوا علی امین گنڈاپور اور پی ٹی آئی چیئرمین بیرسٹر گوہر کی آرمی چیف جنرل عاصم منیر سے ملاقات کی تفصیلات بیان کردیں،سکیورٹی ذرائع نے ان دعوؤں کی تردید کرتے ہوئے کہا آرمی چیف جنرل عاصم منیر کی بیرسٹر گوہر اور علی امین گنڈاپور سے پشاور میں بات چیت خیبرپختونخوا میں سکیورٹی اور انسداد دہشت گردی معاملات کے تناظر میں ہوئی اس دوران کوئی سیاسی گفتگو نہیں ہوئی، بیرسٹر گوہر نے سیاسی معاملات پر بات کرنے کی کوشش کی جس پر انہیں جواب دیا گیا کہ سیاسی معاملات پر گفتگو سیاستدانوں سے کریں ، ملاقات کو سیاق و سباق سے ہٹ کر پیش کیا گیا ،کوشش کی گئی ہے کہ سکیورٹی معاملات پر ہونے والی بات چیت کو سیاسی رنگ دیا جائے جو افسوس ناک ہے۔

روزنامہ دنیا ایپ انسٹال کریں