صدر کا پی او ایف واہ کا دورہ ، چیئرمین نے پیداواری یونٹس پر بریفنگ دی
اسلام آباد(سٹاف رپورٹر)صدرِ مملکت آصف علی زرداری نے پی او ایف واہ کا دورہ کیا، چیئرمین پی او ایف واہ لیفٹیننٹ جنرل سید طاہر حمید شاہ نے استقبال کیا۔
اس موقع پر وفاقی وزیر دفاعی پیداوار محمد رضا حیات ہراج اور سیکر ٹری دفاعی پیداوار لیفٹیننٹ جنرل (ر) محمد چراغ حیدر بھی موجود تھے ۔چیئرمین پی او ایف نے صدرِ مملکت کو پی او ایف واہ کے مختلف پیداواری یونٹس کے بارے میں بریفنگ دی۔ اور کہا کہ پی او ایف واہ ملک کی دفاعی ضروریات کو پورا کرنے میں کلیدی کردار ادا کر رہا ہے ، بریفنگ میں پی او ایف کی فنی صلاحیتوں اور دفاعی پیداوار میں ادارے کی کوششوں کو اجاگر کیا گیا۔صدرِ مملکت نے فیکٹریز کے مختلف پیداواری یونٹس کا دورہ کیا۔صدرِ مملکت نے فیکٹریز کے عملے کی فنی مہارت، عزم اور پیشہ ورانہ صلاحیتوں کو سراہا۔انہوں نے ملکی دفاع کو مضبوط بنانے میں پی او ایف کے مؤثر کردار کی تعریف کی۔صدرنے موجودہ اور آئندہ سکیورٹی چیلنجز کے تناظر میں قومی دفاعی صلاحیتوں کو مزید مستحکم کرنے کی ضرورت پر زور دیا۔
