پاکستان کو دوسرے ٹی 20 میں ویسٹ اندیز کے ہاتھوں شکست
فلوریڈا(سپورٹس ڈیسک )ویسٹ انڈیز نے پاکستان کو دلچسپ مقابلے کے بعد دوسرے ٹی ٹونٹی میں 2 وکٹوں سے شکست دے کر سیریز 1-1 سے برابر کر دی اوراب فیصلہ کن میچ آج کھیلاجائیگا،میزبان ٹیم نے 20ویں اوور کی آخری گیند پر ہدف حاصل کیا۔۔۔
جیسن ہولڈر نے شاہین شاہ آفریدی کو چوکا لگا کر جیت کا جشن منایا۔ویسٹ انڈیزکو 17-2016 کے بعد پاکستان کے خلاف کسی ٹی ٹونٹی میچ میں کامیابی حاصل ہوئی ہے ۔ویسٹ انڈیز کی جیت میں گوڈاکیش موتی کے 28، شائی ہوپ کے 21 اور جیسن ہولڈر کے 16 رنز نے نمایاں کردار ادا کیا۔ امریکی ریاست فلوریڈا کے شہر لاؤڈرہل میں کھیلے گئے دوسرے میچ میں پاکستان نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 9 وکٹوں کے نقصان پر 133 رنز بنائے تھے ۔پاکستان کی جانب سے حسن نواز 40 رنز بناکر نمایاں رہے ، کپتان سلمان آغا نے 38 اور فخر زمان نے 20 رنز کی اننگز کھیلی۔قومی ٹیم کے دیگر بیٹر کوئی خاطر خواہ کارکردگی نہیں دکھا سکے ، صائم ایوب 7، صاحبزادہ فرحان 3، محمد حارث 4، حسن علی 8 اور محمد نواز 2 رنز بناکر آؤٹ ہوئے ۔شاہین شاہ آفریدی 2 اور سفیان مقیم نے 1 رن سکور کیا جبکہ فہیم اشرف بغیر کسی رن کے آؤٹ ہوئے ۔ویسٹ انڈیز کی جانب سے جیسن ہولڈر نے 4 اوورز میں 19 رنز دے کر 4 وکٹیں حاصل کیں اورمین آف دی میچ رہے ،قومی ٹیم میں حارث رؤف کی جگہ حسن علی کو شامل کیا گیا تھا جبکہ ویسٹ انڈیز کی ٹیم میں بھی دو تبدیلیاں کی گئی تھیں۔واضح رہے کہ پہلے ٹی ٹونٹی میچ میں پاکستان نے ویسٹ انڈیز کو 14 رنز سے شکست دی تھی۔
