بیوی کی خدمت، شوہر 10سال بعد کومے سے نکل آیا
بیجنگ(نیٹ نیوز)چین میں ایک خاتون کی 10 سال تک مسلسل بے لوث خدمت شوہر کو کومے سے زندگی کی طرف لے آئی۔
ساؤتھ چائنا مارننگ پوسٹ کے مطابق چین کے آنہوئی صوبے سے تعلق رکھنے والی سُن ہونگشیا کے شوہر 2014 میں دل کے دورے کے سبب کوما میں چلے گئے جس کے بعد وہ مسلسل 10 سال تک ان کی خدمت کرتی رہیں اور ہار نہیں مانی۔ ان کو ہمیشہ سے یقین تھا کہ ان کے شوہر اس ٹراما سے نکل آئیں گے۔ برسوں تک کی جانے والی دیکھ بھال نے ان کے شوہر کو دوبارہ اٹھنے میں مدد دی۔سوشل میڈیا پر اس جوڑے کی وائرل ہونے والی ایک ویڈیو میں دیکھا جا سکتا ہے کہ سُن ہونگشیا اپنے خاوند کے ہوش میں آنے کے بعد ان کے ساتھ بیٹھی ہیں۔ ان کے شوہر کے چہرے پر آنسو بہہ رہے ہیں اور ان کی اہلیہ ان کو گزشتہ چند برس کے متعلق بتا رہی ہیں۔ اہلیہ کا کہنا تھا کہ اگرچہ وہ بہت تھک چکی ہیں، لیکن ان کو لگتا ہے کہ ایک بار خاندان دوبارہ مل جائے تو ہر چیز بامعنی ہوجائے گی۔
