منشیات سے آزاد پاکستان گولڈ کپ سائیکل ریس کا انعقاد
کراچی(اسٹاف رپورٹر)سندھ سائیکلنگ ایسوسی ایشن کے زیر اہتمام منشیات سے آزاد پاکستان گولڈ کپ سائیکل ریس کا افتتاح ڈائریکٹرجنرل ادارہ ترقیات کراچی سید شجاعت حسین نے مزار قائد سے کیا۔
منشیات کے خلاف 100 روزہ آگاہی مہم کے موقع پر ڈی جی کے ڈی اے نے کہا کہ نوجوان نسل کو منشیات سے مکمل آزادی دلانے کے لئے ہمیں کھیلوں کو فروغ دینے کی اشد ضرورت ہے ، گولڈ کپ سائیکل ریس کا انعقاد نوجوانوں کو کھیلوں کی طرف متوجہ کرنے کا باعث بنے گا۔ ریس میں 35 سائیکل سواروں نے شرکت کی، ریس 22کلومیٹر طویل فاصلے پر محیط تھی، سائیکل ریس کا آغاز مزار قائد سے ہوا جو مقررہ راستے سے ہوتی ہوئی عائشہ مسجد ڈی ایچ اے پر اختتام پذیر ہوئی۔ ڈی جی کے ڈی اے سید شجاعت حسین نے پہلی، دوسری اور تیسری پوزیشن حاصل کرنے والے کامیاب کھلاڑیوں میں انعامات تقسیم کئے ۔ ڈی جی کے ڈی اے نے مزید کہا کہ ادارہ ترقیات کراچی کھیل کے شعبہ میں پبلک پرائیویٹ سیکٹر کے ساتھ بھرپور تعاون جاری رکھے گا، نئی نسل کو نشے سے نفرت زندگی سے پیار ہر سطح پر آگاہی فراہم کی جائے ، سائیکلنگ کو فروغ دیا جائے تاکہ شہری نشے سے چھٹکارا حاصل کرنے کے ساتھ ساتھ صحتمندانہ زندگی گزار سکیں۔ آخر میں ڈی جی کے ڈی اے نے سندھ سائیکلنگ ایسوسی ایشن کے سیکریٹری جنرل کلیم اعوان کی کاوشوں کو سراہا۔
