190ملین پاؤنڈ ریفرنس کا محفوظ فیصلہ موخر ،آج نئی تاریخ کا اعلان متو قع
اسلام آباد (اپنے نامہ نگارسے ،مانیٹرنگ ڈیسک ) تحریک انصاف کے بانی عمران خان اور ان کی اہلیہ بشریٰ بی بی کیخلاف 190ملین پاؤنڈ ریفرنس کا فیصلہ آج (پیر کو ) نہیں سنایا جائے گا۔
گزشتہ دنوں احتساب عدالت نے 190 ملین پاؤنڈ ریفرنس کا فیصلہ محفوظ کیا تھا اور اعلان کیا گیا تھاکہ فیصلہ 23 دسمبر کو سنایا جائے گا۔اب ذرائع کا کہنا ہے کہ بانی اور بشریٰ کے خلاف 190 ملین پاؤنڈ ریفرنس کا فیصلہ نہیں سنایا جائے گا۔ذرائع کا کہنا ہے کہ عدالتی عملے کی جانب سے پی ٹی آئی کے وکلا کو آگاہ کر دیا گیا ہے اور احتساب عدالت اسلام آباد آج 190 ملین پاونڈ ریفرنس پر فیصلے کی نئی تاریخ دے گی۔ذرائع نے بتایاکہ 190 ملین پاؤنڈ ریفرنس کا فیصلہ جنوری 2025 کے پہلے ہفتے میں سنایا جائے گا۔خیال رہے کہ 190 ملین پاؤنڈ ریفرنس کا ٹرائل ایک سال میں مکمل ہوا اور نیب نے ٹرائل کے دوران 35 گواہان کے بیانات ریکارڈ کرائے ۔ بانی کے وکلا نے گواہان پر جرح کی۔190 ملین پاؤنڈ ریفرنس میں اہم گواہان سابق پرنسپل سیکرٹری اعظم خان، سابق وزیراعلیٰ پرویزخٹک، سابق وفاقی وزیر زبیدہ جلال نے بھی بیان ریکارڈ کروایا۔ 190 ملین پاؤنڈ ریفرنس میں گزشتہ سال 27 فروری کو فرد جرم عائد کی گئی تھی۔
