13اضلاع میں آغوش پروگرام کا آغاز،حاملہ ماں اور نومولود کو 23ہزار ملیں گے
لاہور(سٹاف رپورٹر) وزیراعلیٰ مریم نوازکے ویژن کے تحت اپنی نوعیت کے پہلے اور منفردآغوشپروگرام کاباقاعدہ آغاز کر دیا گیا ہے ۔ مریم نوازکی ہدایت پر دو سال سے کم عمربچوں کی ماؤں اور حاملہ خواتین کوآغوش پروگرام کے تحت 23ہزار روپے ملیں گے ۔
پہلے مرحلے میں 13اضلاعآغوش پروگرام کے تحت نومولود بچوں کی ماؤں اور حاملہ خواتین کوامداد ی رقم ملے گی۔ آغوش پروگرام کا آغاز ڈیرہ غازی خان، تونسہ، راجن پور، لیہ، مظفر گڑھ،کوٹ ادو،بہاولپور، رحیم یارخان، بہاولنگر، بھکر، میانوالی، خوشاب اور لودھراں سے کیا جارہا ہے ۔ حاملہ خاتون کی پہلی دفعہ مراکز صحت/ مریم ہیلتھ کلینک میں رجسٹریشن پر2 ہزارروپے دئیے جائیں گے ۔ حاملہ خاتون کوبچے کی پیدائش تک متواتر طبی معائنہ کے لئے وزٹ پر امدادی رقم دی جائے گی۔ مراکز صحت سے مفت طبی معائنہ کے بعد آغوش پروگرام کے کیش ایجنٹ سے امدادی رقم حاصل کی جا سکے گی۔ حاملہ خواتین کو ہر بارمراکز صحت وزٹ پر1500 روپے ملیں گے جبکہ ٹوٹل 6ہزار روپے دئیے جائیں گے ۔ آغوشپروگرام کے تحت مرکز صحت پر بچے کی پیدائش پر4ہزارروپے کاتحفہ ملے گا۔ پیدائش کے بعد 15دن کے اندر پہلے طبی معائنے پر2ہزار روپے ملیں گے ۔
پیدائشی سرٹیفکیٹ کا مرکز صحت میں اندارج کروانے پر 5ہزار روپے دئیے جائیں گے ۔ آغوش پروگرام کے تحت نومولود بچے کو حفاظتی ٹیکے لگوانے پر 4ہزار روپے ہر بار 2ہزارروپے دئیے جائیں گے ۔ وزیراعلیٰ مریم نوازشریف کی ہدایت پر خواتین کی رہنمائی اور معلومات کے لئے خصوصی ٹال فری نمبر 1221بھی فعال کر دیا گیا ہے ۔ وزیراعلیٰ مریم نوازنے کہا صحت اور علاج ہر ماں اور بچے کا بنیادی حق ہے حکومت اپنا فرض ادا کرے گی۔ہسپتالوں میں ماؤں اور بچوں کو بیماری کی حالت میں دیکھنا انتہائی تکلیف دہ ہے ۔سرکاری وسائل پرپسماندہ اور دوردراز علاقوں کے عوام کا پورا پورا حق ہے ۔ماں اور بچے کی صحت خصوصی توجہ کی متقاضی ہے ، صحت مند ماں ہی صحت مندخاندان کی ضامن ہے ۔ پسماندہ علاقوں میں طبی سہولیات کے ساتھ خواتین کی مالی معاونت بھی کررہے ہیں۔آغوش پروگرام سے نہ صرف ماں بلکہ بچہ بھی صحت مند زندگی کا آغاز کرے گا۔
