اصل طاقت عوام، اختلافات سے بالا تر ہوکر خوشحال ، پر امن پاکستان کیلئے کام کریں: صدر زرداری
اسلام آباد(سٹاف رپورٹر)صدر مملکت آصف علی زرداری نے کہا ہے کہ آزادی بے پناہ قربانیوں کے بعد ملی ہے اور اس آزادی کا تحفظ ایک بہت بڑی ذمہ داری ہے جس کیلئے پوری قوم اور مسلح افواج ہر قسم کی قربانی دینے کیلئے تیار ہیں،اصل طاقت عوام ہیں، اختلافات سے بالاتر ہو کر خوشحال اورپرامن پاکستان کیلئے کام کریں۔
یوم پاکستان پرایوان صدر میں مسلح افواج کی پریڈ تقریب سے خطاب کرتے ہوئے صدر مملکت نے کہا کہ 23 مارچ قوم کیلئے ایک اہم دن ہے کیونکہ آج کے دن ہم نے قائداعظم کی قیادت میں آزادی حاصل کی اور علامہ اقبال کے خواب کی تعبیر ممکن ہوئی۔ آزادی کیلئے لاکھوں مسلمانوں نے قربانی دی اور خواب کو حقیقت میں بدل دیا ، آج کے دن ہم اپنے شہدا کو خراج عقیدت پیش کرتے ہیں۔ صدر مملکت نے کہا کہ پاکستان کی تخلیق کا مقصد مساوات، انصاف اور قانون کی حکمرانی کے اصولوں پر مبنی جدید فلاحی ریاست کا قیام تھا اور ہم ان مقاصد کو حاصل کرنے کا عہد کرتے ہیں اور اسی جذبے کے ساتھ آج کا دن منایا جا رہا ہے ۔ بھارت پاکستان کو ہمیشہ میلی آنکھ سے دیکھتا ہے ، فتنہ الخوارج اور دیگر دہشت گرد تنظیمیں اپنے ناپاک عزائم کے حصول کے لئے کوشاں ہیں، پاکستان کے عوام اور مسلح افواج متحد ہیں اور دشمن کے ناپاک عزائم کو ناکام بنائیں گے ۔ان کاکہناتھاکہ اپنی نوجوان نسل میں نفرت اور مایوسی پھیلانے کی کوششوں کا مقابلہ کرنا ہو گا،ففتھ جنریشن وار فیئر ایک چیلنج کی صورت اختیار کرچکا ہے ۔ ہم مشکلات پر قابو پانے کی صلاحیت رکھتے ہیں ، ہم ایک باحوصلہ قوم ہیں اور چیلنجز سے نہیں جھکیں گے ۔ ہمیں قو م کی توانائی اور صلاحیتوں پر اعتماد ہے اور ہم مشکلات سے کبھی نہیں گھبراتے ۔انہوں نے اس عزم کا اظہار کیا کہ تمام اندرونی اور بیرونی سازشوں کے باوجود پاکستان کی تعمیر و ترقی کا عمل جاری رہے گا۔
پاکستان کو جغرافیائی اور سیاسی مسائل کا سامنا ہے جبکہ ہماری بہادر مسلح افواج عوام کے شانہ بشانہ بے شمار قربانیاں دے رہی ہیں۔صدر مملکت نے دفاع کو مزید مستحکم بنانے ، زراعت سمیت اقتصادی شعبوں کو فروغ دینے اور نوجوانوں کے لیے روزگار کے مواقع پیدا کرنے کی ضرورت پر زور دیا۔انہوں نے کہا کہ ہم اپنی سرحدوں کی حفاظت یقینی بنائیں گے ، معیشت، زراعت مستحکم کریں گے اور توانائی کا تحفظ بھی کریں گے ،ہم اپنی نوجوان نسل کے لئے روزگار پیدا کریں گے کیونکہ نوجوان ہمارے ملک کا قیمتی سرمایہ ہیں۔ انہوں نے تمام صوبائی حکومتوں پر زور دیا کہ بنیادی صحت اور سماجی بہبود کے اقدامات پر توجہ دیں۔ یہ سفر مشکل ضرور ہے لیکن ناممکن نہیں کیونکہ اصل طاقت قوم کے پاس ہے ،عزم، محنت اور جذبہ حب الوطنی نے ہمیں ہمیشہ آگے بڑھایا ہے ۔ پاکستان کی خارجہ پالیسی استحکام اور امن کو یقینی بنانے پر مبنی ہے اور ہم اپنے پڑوسیوں اور عالمی برادری کے ساتھ باہمی احترام اور خوشحالی کے مشترکہ اہداف پر مبنی مضبوط تعلقات چاہتے ہیں۔آصف علی زرداری نے بے مثال قربانیاں دینے پر مسلح افواج اور قانون نافذ کرنے والے اداروں کو بھی خراج تحسین پیش کرتے ہوئے ان کے عزم اور بہادری کو سلام بھی پیش کیا۔صدر مملکت نے کہا کہ آج کے دن بھی ہم اپنے کشمیری بھائیوں اور بہنوں کو بھی نہیں بھولے جو طویل عرصے سے بھارت کی ریاستی دہشتگردی کا شکار ہیں۔
صدر مملکت نے اس عزم کا اعادہ کیا کہ پاکستان کشمیریوں کے حق خودارادیت کے لیے تمام عالمی فورمز پر آواز بلند کرتا رہے گا اور عالمی برادری سے مطالبہ کیا کہ وہ اقوام متحدہ کی قراردادوں پر عملدرآمد کو یقینی بنائے تاکہ کشمیری اپنے مستقبل کا فیصلہ خود کرسکیں۔صدر مملکت نے فلسطینیوں کے ساتھ پاکستان کی جانب سے یکجہتی اور ان کے حق ارادیت کے لئے پاکستان کے مضبوط عزم کا اظہار بھی کیا اور عالمی برادری پر زور دیا کہ وہ نسل کشی کو روکنے کے لیے فوری فیصلہ کن اقدامات کرے اور اس بات کو یقینی بنائے کہ کسی غیر ملکی مداخلت کے بغیر فلسطینیوں کو اپنے وطن میں مکمل آزادی کے ساتھ اپنے مستقبل اور خودمختاری کا فیصلہ کرنے کا حق دیا جائے ۔صدر مملکت آصف علی زرداری نے قوم سے اپیل کی کہ مادر وطن کے قیام کے حقیقی مقاصد کے حصول کیلئے کام کریں اور صدر مملکت نے قوم کی خوشحالی، اتحاد اور طاقت کیلئے دعا کرتے ہوئے کہا کہ پاکستانی عوام کی ثابت قدمی، محنت اور حب الوطنی نے ہمیشہ ملک کو مشکلات سے نکالا ہے ۔ صدر نے قوم سے اپیل کی کہ اپنی تمام تر توانائیاں ملک کی ترقی کے لئے وقف کریں، اختلافات سے بالاتر ہو کر ایک خوشحال اور پرامن پاکستان کے لئے کام کریں۔ ہمیں مایوسی اور منفی سوچ کو ترک کر کے اتحاد، سچائی اور امید کو اپنانا ہو گا۔ تقریب میں وزیراعظم محمد شہباز شریف، سپیکر قومی اسمبلی سردار ایاز صادق ، چیئرمین سینیٹ سید یوسف رضا گیلانی، تینوں مسلح افواج کے سربراہان، اعلیٰ فوجی افسر ، وفاقی وزرائ، ارکان پارلیمنٹ اور سفارتکاروں نے بھی شرکت کی۔
تقریب کے دوران پاک فضائیہ کی جانب سے شاندار فلائی پاسٹ کا مظاہرہ کیا گیا۔شیردل، میراج، ایف 16، جے ایف 17 تھنڈر اور جے 10 سی کی مختلف فارمیشنز نے شاندار رفتار کے ساتھ آسمان کو چیرتے ہوئے حیرت انگیز فضائی مظاہرے کئے ۔ قبل ازیں صدر مملکت نے پریڈ میں حصہ لینے والے مسلح افواج کے چاق و چوبند دستوں کا معائنہ کیاانہیں صدارتی سلامی دی گئی جبکہ قومی ترانہ بھی بجایا گیا۔صدرمملکت روایتی صدارتی بگھی میں گھوڑوں پر سوار اپنے محافظوں کے ساتھ پنڈال پہنچے تھے ۔اس موقع پر فوجی بینڈ نے قومی ترانوں پر مبنی موسیقی کی شاندار دھنیں بھی پیش کیں۔دوسری طرف ملک بھر میں یوم پاکستان ملی جوش و جذبے سے منایا گیا ۔دن کا آغاز وفاقی دارالحکومت میں 31 اور صوبائی دارالحکومتوں میں 21،21 توپوں کی سلامی سے ہوا، فضا پاک فوج کے جوانوں کے اللہ اکبر اور پاکستان زندہ باد کے نعروں سے گونج اٹھی، مساجد وگھروں میں وطن عزیز کی سالمیت اور ترقی وخوشحالی کیلئے دعائیں کی گئیں۔یوم پاکستان کے موقع پر لاہور میں شاعر مشرق علامہ اقبال کے مزار پر گارڈز کی تبدیلی کی پروقار تقریب کا انعقاد ہوا، پاک فضائیہ کے دستے نے گارڈز کے فرائض سنبھال لئے ۔
تقریب میں سول اور عسکری حکام بھی شریک ہوئے ، جبکہ ایئر وائس مارشل اختر عمران سدوزئی مہمان خصوصی تھے ،انہوں نے مزار اقبال پر پھول چڑھائے و فاتحہ خوانی کی اور مزار اقبال پر مہمانوں کی کتاب میں اپنے تاثرات قلمبند کئے ۔ پی ایچ اے کی جانب سے لاہور کے گریٹر اقبال پارک میں لیزر لائٹ شو کا اہتمام کیا گیا ۔ یوم پاکستان کے موقع پر گورنر سندھ کامران ٹیسوری اور وزیراعلیٰ سندھ سید مراد علی شاہ نے کابینہ ارکان کے ہمراہ مزارِ قائد پر حاضری دی۔ یوم پاکستان کی مناسبت سے اخبارات نے خصوصی ایڈیشن شائع کئے جبکہ ریڈیو پاکستان،پی ٹی وی اور نجی ٹی وی چینلز سے بھی خصوصی دستاویزی پروگرام نشر کیے گئے ۔ ملک بھر میں اور بیرون ممالک پاکستانی سفارتخانوں میں یوم پاکستان کی خصوصی تقریبات منعقد کی گئیں ۔ تمام سرکاری و نجی عمارتوں پر قومی پرچم لہرائے گئے ۔آئی ایس پی آر کے مطابق چیئرمین جوائنٹ چیفس آف سٹاف کمیٹی اور سروس چیفس کی جانب سے قوم کو یومِ پاکستان کی 85 ویں سالگرہ پر دلی مبارکباد پیش کی گئی۔ یوم پاکستان پر آئی ایس پی آر نے نغمہ بھی جاری کردیا۔
