مہنگائی میں کمی،آنیوالے دنوں میں مزید کامیابیاں ملیں گی:شہبازشریف
لاہور،اسلام آباد(اپنے کامرس رپورٹر سے ،نامہ نگار،دنیا نیوز،مانیٹرنگ ڈیسک)وزیر اعظم شہباز شریف نے کہا ہے حکومتی اقدامات کی بدولت مہنگائی میں واضح کمی آئی، آنیوالے د نوں میں مزید کامیابیاں ملیں گی ، پاکستان اور چین ترقی کی نئی راہوں پر گامزن ہیں،پاک امریکا تعلقات نئے دورمیں داخل ہو رہے ہیں۔
ملکی معیشت درست سمت میں گامزن ہو چکی،ریلوے کی شاندار بحالی پر وزیر ریلوے حنیف عباسی کی پذیرائی کریں گے ،پاکستان نے بھارت سے تاریخی جنگ جیتی ، دنیا اس کی معترف ہے ،شکست خوردہ بھارت کو اقوام عالم میں ذلت آمیز رسوائی کا سامنا ہے ، امریکی صدر ٹرمپ جب کہتے ہیں جنگ ہم نے رکوائی مودی کے زخم تازہ ہو جاتے ہیں،ملکی ترقی کیلئے ہمیں محنت اور دیانت کو اپنا شعار بنانا ہو گا۔ان خیالات کا اظہار انہوں نے منگل کے روز لاہور ریلوے سٹیشن پرپاک بزنس ایکسپریس ٹرین کی افتتاحی تقریب سے خطاب کرتے ہوئے کیا۔اس موقع پر وزیر ریلوے حنیف عباسی، وزیر اطلاعات عطا اللہ تارڑ ،ریلوے حکام و دیگر بھی موجود تھے ۔وزیر اعظم نے کہا مدتوں بعد مجھے ریلوے سٹیشن لاہور آ کر بہت مسرت ہوئی،یہاں خوشگوار تبدیلی دیکھنے کو ملی،پاکستان ریلوے میں مثبت تبدیلی نظر آ رہی ہے ،پاک بزنس ٹرین میں صرف اشرافیہ کیلئے ہی نہیں بلکہ عام آدمی کے لیے یورپی ریلوے کی طرز پر شاندار سفری سہولیات فراہم کی گئی ہیں۔ حنیف عباسی نے ناممکن کو ممکن کر دکھایا اور ریلوے کو دوبارہ پاؤں پر کھڑ ا کر دیا،انہوں نے میرا مان بڑھایا ،ریلوے کی بہتری کے حوالے سے آج میرا خواب شرمندہ تعبیر ہوتا ہوا نظر آ رہا ہے ۔
یہ ابھی پہلا قدم ہے ابھی منزلیں بہت ہیں ،ملک کے دیگر شہروں میں بھی اس طرح کی ٹرینیں چلائیں گے ،دنیا کو دکھا دیں گے اگر نیت نیک اور ارادہ مصمم ہو تو مشکل سے مشکل ہدف بھی حاصل کیا جا سکتا ہے ۔وزیر اعظم نے کہا ریلوے کی بہتری کیلئے خدمات کا کریڈٹ خواجہ سعد رفیق کو بھی جانا چاہیے ،پی ڈی ایم دور میں سعد رفیق نے بھی ریلوے کو بہتر انداز میں چلانے کی کوشش کی،اراضی واگزار کرانے اور ریلوے سٹیشنز کو بہتر کرنے کے حوالے سے انہوں نے مجھے متعدد بار بریفنگ دی۔قوم کو فتح مبین کی مبارکباد دیتے ہوئے وزیر اعظم نے کہا 9 مئی کے معرکہ حق میں پاک فوج نے دلیری اور مہارت کے ساتھ دشمن کا مقابلہ کیا،جنگ میں فتح کے بعد پاکستان کا عالمی سطح پر وقار بلند ہوا،دنیا نے دیکھا کس طرح ہماری فضائی ،بری اور بحری افواج نے بہادری ، مہارت اور جدید ٹیکنالوجی کو بروئے کار لاتے ہوئے بہت ہی کم وقت میں اپنے سے بڑے دشمن کو ناکوں چنے چبوائے ،میں ایک ایک لمحے کا گواہ ہوں،بطور وزیراعظم افواج پاکستان کے ساتھ مشورہ کر رہا تھا، فیلڈ مارشل کے ساتھ رابطے میں تھا، کچھ لوگوں کا خیال تھا پاکستان ہندوستان کا مقابلہ نہیں کر سکتا لیکن اس جنگ کے بعد یہ سوچ ختم ہوگئی ۔پاکستان نے بھارت کو جنگ میں تاریخی شکست دی،یہ پاکستان کی سفارتی کامیابی کی زندہ مثال ہے ۔
امریکی صدر ڈونلڈ ٹرمپ نے متعدد بار کہا ہم نے جنگ رکوائی، پاکستان کی اس سے بڑی ڈپلومیٹک کامیابی اور کیا ہو سکتی ہے ،امریکی صدر جب کہتے ہیں کہ پاک بھارت جنگ ہم نے رکوائی تو مودی کے زخم دوبارہ تازہ ہو جاتے ہیں۔وزیر اعظم نے کہا ہمارے ایٹمی اثاثے قومی سلامتی کے ضامن ہیں،دشمن ہماری طرف میلی آنکھ سے دیکھنے کی جرأت نہیں کر سکتا۔ملکی معاشی حالات کے حوالے سے انہوں نے کہا عسکری فتح کے ساتھ ساتھ معاشی میدان میں بھی کامیابی ملی ہے ،حکومتی اقدامات کی بدولت مہنگائی میں واضح کمی آئی ہے ،افراط زر کی شرح میں5 فیصد کمی آئی ،معاشی اشاریے بہتری کی طرف گامزن ہیں ۔ معاشی کامیابی ٹیم ورک کا نتیجہ ہے ،آنے والے دنوں میں معاشی میدان میں مزید کامیابیاں حاصل ہوں گی۔چین پاکستان شاندار تعلقات کے حوالے سے وزیر اعظم نے کہا پاکستان اور چین ترقی کی نئی راہوں پر گامزن ہیں، چین کے ساتھ سی پیک فیز 2 کے لیے پوری طرح کوآرڈی نیشن ہے ۔وزیر اعظم نے کہا امریکا کے ساتھ از سر نو تعلقات استوار کئے جا رہے ہیں ۔قبل ازیں شہباز شریف نے مسافر لاؤنج،استقبالیہ اور لاہور ریلوے سٹیشن کے مختلف شعبہ جات کا دورہ کیا اور انتظامات کو سراہا۔بعد ازاں انہوں نے پاک بزنس ایکسپریس ٹرین کا افتتاح کیا اور ٹرین کوچز کا معائنہ کیا۔
اس موقع پر وفاقی وزیر نے وزیر اعظم کو بریفنگ دی اور بتایا پاک بزنس ٹرین لاہور سے کراچی کے درمیان چلے گی اور لاہور سے ساڑھے 18 گھنٹے میں کراچی پہنچے گی۔دریں اثنائوزیراعظم شہباز شریف نے کہا ہے کئی دہائیوں میں پہلی بار بجلی تقسیم کار کمپنیوں کے خسارے میں کمی آنا انتہائی خوش آئند ہے ۔ کابینہ کمیٹی برائے توانائی کے اجلاس کی صدارت کرتے ہوئے وزیراعظم نے کہا کمپنیوں کے خسارے میں کمی سے ان کی نجکاری کا عمل آسان ہو جائے گا ۔ وزیراعظم نے وفاقی وزیر پاور ڈویژن سردار اویس احمد لغاری ، وفاقی سیکرٹری ڈاکٹر محمد فخر عالم اور ان کی ٹیم کی ستائش کرتے ہوئے پاور سیکٹر اصلاحات کے حوالے سے ان کی شاندار کارکردگی کو سراہا۔وزیراعظم نے بہترین کارکردگی دکھانے اور خسارے میں کمی لانے والی بجلی کمپنیوں کے چیف ایگزیکٹو افسروں کو ستائشی خطوط بھیجنے کی ہدایت کی۔
اجلاس کو پاور ڈویژن کی جانب سے بجلی کمپنیوں اور گردشی قرضوں پر بریفنگ دی گئی۔اجلاس کو بتایا گیا کمپنیوں کا خسارہ 193 ارب روپے کم ہوا ہے ۔لاہور الیکٹرک سپلائی کمپنی اور ملتان الیکٹرک پاور کمپنی نے خسارے میں کمی کے حوالے سے سب سے اچھی کارکردگی دکھائی ۔ کابینہ کمیٹی نے پاور ڈویژن کی سفارش پر نیشنل الیکٹریسٹی پلان سٹریٹجک ڈائریکٹو 87 میں ترامیم کی منظوری دے دی۔ ان ترامیم کے تحت بجلی کی ترسیل کے اخراجات 12.55 روپے فی کلو واٹ اور بڈنگ پرائس اس میں شامل ہو گی۔وزیر اعظم سے کرغزستان کابینہ کے ڈپٹی چیئرمین عادل بیسالوف کی قیادت میں کرغزستان کے اعلیٰ سطح کے وفد نے ملاقات کی۔ وزیر اعظم نے وفد کا خیر مقدم کیا اور آئی جی سی کے پانچویں اجلاس کے کامیاب انعقاد پر اطمینان کا اظہار کیا۔ انہوں نے پاکستان اور کرغزستان کے درمیان پروٹوکول اور مفاہمت کی متعدد یادداشتوں (ایم او یوز) پر دستخط کو سراہا اور انہیں تجارت، توانائی، تعاون، روابط اور عوامی تبادلوں کے فروغ کی جانب اہم قدم قرار دیا۔
